NEHEMIAH 5 - LEKHARABU INTHENG (BSI)

Sarahei Suk manrimna

¹ Pha bongkhat kahnunga mipui katamtak nuhmei leh pase he’n an-Jehudi changpui hei chunga inphinna anleiphut jo.

² Mi ahlek in anhri, “Kan-innshung kalen ung, kanhringna sik a sâng leh be arangei.”

³ Ahlop he’n anhri, “Bu hngōi makna sik a sâng leh be hmuna sik a kanhlei leh Kanvomhrui rahōn leh kan-innhei sêr pûkna bandhop matung sik kasōk jo.”

⁴ Alak-hei khan anhri nôk, “Kanvomhrui rahōn leh kanhlei chunga reng ramsêrṭhei pekna sik sêr kanta pûk sik kachang jo.

⁵ Ni-Jehudi changpui hei leh eini hi jât inkhat rōk me kae. Nisahei hi anmani sahei kapōa akaṭha hei changmak mo? Tâk-kha nisahei hi sōk nimanchang sik heia kasōk jo. Nisanu ṭhahrep hei chu sōk a nijōr jo hei. Eini atlo sik manhret mak jo me, ajârchu eini hlei leh vomhrui rahōnhei kha anlosō pek jo me.”

⁶ Anmani inphinna hei kha kathei phat a, kei kahnuk leikana jo

⁷ khana ṭōn tlo sik a kamandon jo. Mipui hlamkakeihei leh ṭōnkarônhei kha themmô kapek heia kati, “Nangni’n nansōpui Jehudihei nansuk manrim jo hei!” Ṭong kasōk kha mandonna sik a ke’n mipui intûpna inkhat kaleibek

⁸ khana kahri, “Nitor lai seng ni-u ninai Jehudihei ram hlop mihei hnenga antajōr sik hei kha katlen hei rih. Tûn hi nan-u nannaihei kha, anmi changpui nangni hnenga anbinga anhei injōrna sik a rumhrat a nantlo jo hei!” Hlamkakeihei kha sip antia ahri sik manhret mak hei.

⁹ Khava sōa ke’n kahri, “Nangni tatlo hi nanṭhe jo! Nangni Pathen nantajui sik khana akadik nantatlo sik kasōk. Khan chu eini inrepui jât-hlop he’n nichunga manuisōna sik ajâr nangni’n pek mak tin chei.

¹⁰ Mipuihei kha sêr leh sâng kahnenga inphut kamanpûk jo hei, khana ka’nṭhōipui hei leh kei sik a ṭōn katlohei kha’m kamanpûk hei. Tûnchu anmani’n ahei pek male hei rasoh nitina khachu mandon mak jo rih.

¹¹ Nanhnenga antabat rakip bângpek hei ruh – sêr, hmuchi, ju, olive thai achanga. Khana a’nhlei, vomhrui rahōn, olive kunghei khana innhei inrangtak a pek male jo hei ruh!”

¹² Hlamkakei he’n anmasôn eng, “Nahri kapōa kantlo sik. Ankarōihei kha kanpek male sik hei khana bât hei kha khômmak jo ni’ung.” Thempuhei kha kabek hei khana an-intepna kha anjuina sik a mipui hmaikunga anhlam kakeihei kha intepna kamannei hei.

¹³ Khava sōa kakhōna kaleikhit katingsoi kha kalosōt a, kakathingsōt jo. Ke’n kati, “Hing’hin tu nanchang inum nan-intepna kajuimak kha Pathen in akathingsōt sik chei. Pathen in nan-innhei leh nantanei rakip alosōt sik khana heite inkhatbek dahlon mak ning.” Khana aka-om rakip in anhri, “Amen!” antia Rōngpu kha anleimanpâk a kae. Khana hlamkakeihei khan anṭong intepna kha anjui jo.

Nehemiah’n Phâmrai asetmakna

¹⁴ Ke’n Judah ram shunga vaikarôn kachangna kum 12 shung senga, Artaxerxes Reng changna kum 20 tlukna inphut 32 tlukna kârsenga, kei leh kapare patung he’n ram vaikarôn inkhat rahōi kasōk sâk leh in kha leisâk mak ung.

¹⁵ Kei mak hma vaikarôn aleikachang rakip in mipuihei sik a rônkahrik leikachang hei, ju leh thlai sik a dangka 40 sasâm ni khat a anleider hei. Tâk-kha ke’n ahlopdet a ṭōn kaleitlo, ajârchu Pathen kakaja a kae.

¹⁶ Karatha neina rakip bang sakmanther nôkna khan kaleipek, khana karōi inkhatbek leilo mak eng. Kei sik a ṭōnkatlo rakip in sak mantherna khan anleibôm eng.

¹⁷ Kankimvea jât-heia inphut kahnenga akahong hei, achung chônna Jehudihei leh anhlam kakeihei 150 sasâm hi kadokhânga kalei vei ri hei.

¹⁸ Ani tina ke’n sehratche inkhat, kemōng kâra akaṭhapen 6 khana âr hingja vâng kalei vei hei, khana ni 10 tlukna akaia juther kaleipek ri hei. Tâk-kha mipuihei rônkahrik kha ke’n kalei hmua, khava jâra ke’n ram vaikarôn inkhat in achen hlam kasōk kha leider mak hei eng.

¹⁹ Eh Pathen, nahnenga kader che kae, hiva mipuihei sik a katlona hi kei ṭhatna inkhat a amandon pek roh.