NEHEMIAH 13 - LEKHARABU INTHENG (BSI)

Ramlak Mihei leh Inṭhenna

¹ Moses Dân kha rasa kasōk a mipui hneng antei pha, Ammonhei leh Moab he’n Pathen mihei intûpna kâra area tlâk theimak hei ning tina ṭongrup kha anhmusōt jo.

² Hivahi Ammonhei leh Moab he’n Israelhei kha Egypt a inphut anhonglai khan bu leh tui anleipek mak hei jâra kae. Khava kanek a, anmani’n Israelhei kha hâksêrna sik a Balaam hnenga sêr anleipek, tâk kan-Pathen in hâksêrna kha vângṭhat amanchang pek ung.

³ Hiva dân antatei kha Israel he’n anthei pha, anmani’n ram hlop mi rakip anrupte kâra inphut anṭhensōt jo hei.

Nehemiah Syemsōtna hei

⁴ Bek-inn neinâk dana den katintapa Eliashib thempu kha Tobiah leh pha kasôttak intōk tak a leika-om hei.

⁵ Sâng leh thai marim katui ale’ntōksōt hei, Bek-inna hmang sik hmangchâk-hei, thempuhei sik a tōknahei khana hmuchi, ju leh olive thai Levihei hneng, Bek-inna hlakasak hei hneng leh Bek-inn kahngâk-hei hnenga antapek sem sômhei dana sik a innden kalentak inkhat hi Tobiah tahmang sik a Eliashib in aleihnōm pek.

⁶ Hinga achanglai hin, kei Jerusalema leiom mak eng, ajârchu Artaxerxes in Babylon reng achangna kum 32 tlukna khan ahnenga thangkakōi sik a kei le’nle nôk eng. Pha bongkhat sō leh ama hnōm pekna kha kalei hmua

⁷ Jerusalema hong inle eng. Bek-inna innden inkhat Tobiah tahmang sik a Eliashib in aleihnōm pek hi kahmu pha kamalung aleitôn.

⁸ Kei leikahrâng enga Tobiah neinâk-hei kha kalei hlon kathor pek hei.

⁹ Inndenhei kha beklanga sukmantheng theina sik khana bek-inn hmangchâk-hei, hmuchi tōknahei, khana bero hei da malena sik a ṭong kapek hei.

¹⁰ Bek-inn hlapu hei leh alak Levi he’n Jerusalem andahlona anhleia leikase jo hei ti hi ke’n kamanhret jo, ajârchu mipuihei khan sâk leh in pui katluk a leipek mak jo hei.

¹¹ Bek-inn kha andon mak jâra aṭōn karônhei kha ke’n kalei rasei hei. Khana Levihei leh hlapu hei kha kaheiṭhōi male nôk heia athera ṭōn kalei mantlo hei.

¹² Khava sōa Israelhei khan sâng, ju, olive thai sem sômhei kha Bek-inn neinâk dana denheia anheichoi manphut nôk jo.

¹³ Neinâk dana denhei katinta sik a athōia mihei hi ke’n kada hei: Thempu Shelemiah, Dân inhret Zadok, Levi mi Pedea. Mattaniah tupa, Zaccur sapa Hanan kha anmani kabôm sik kae. Hiva mihei hin anṭōn tlopui hei hneng malung inthengtak a neinâk ansem sik tia taksenthei kachang hei ti hi ke’n kamanhret hei.

¹⁴ Nabek-inn leh khava kamukna sik a ke’n katlohei hi amandonsōt pek roh, ka-Pathen.

¹⁵ Khava pha khan Judah mihe’n Châmhngat kani ning vomhrui anta lei-ep kha ke’n kaleihmu. Alak-hei khan sâng, ju, vomhrui, theichang leh neinâk alak-hei Jerusalema rôn sik a Shakōrtung chunga phur anmantluk, khana ke’n Châmhngat kani ning heite anjōr makna sik a ṭong kaleipek hei.

¹⁶ Tyre khōpuia mi ahlek Jerusalema leika-om hei, khana Châmhngat kani ning kanmihei hneng jōr sik a nga leh neinâk rakip khōpuia anheirôn hei.

¹⁷ Jehudi hlamkakeihei kha karasei heia kaleihri, “Nangni’n ṭhatmak nantatlo hi enruh! Nangni’n Châmhngat kani hi a’nthengmak nanmanchang jo.

¹⁸ Hiva khōpuia Pathen in inhmangna aleimasōk pha khan hivakhet jâra hin nanpu sōnhei kha karâkna aleipek hei kae. Khava katlunga kha’num Châmhngat kani kha manbōkna nanneia Israelhei chunga Pathen hnuknat akhechetna sik nantloa kae.”

¹⁹ Khava jâra Châmhngat kani rakip a’nphutna, khōhlei aheichang jo pha, khōpui kekot-hei kha kamna sik a khana Châmhngat kani ning kha athlengsō mak kârseng mahlâng makna sik a ke’n ṭong kaleipek hei. Châmhngat kani ning khōpui shunga heite anheirôn manhlut makna sik a kami ahlek kekot heia kaman ngir hei.

²⁰ Neinâk ajât rakip kajōrhei kha khōpui bang vângting Misyem ning jân kha vōi khat vōi 2 leikarek hei.

²¹ Ke’n ṭong kaleipek hei, “Vânga oma jîngkâr heitlung sik hngâk kha heite hnemmak ning. Hivahi avea nantlo nôk inchu nanchunga rumhrat kahmang sik kae.” Khana inphut chu Châmhngat kania avea hong inlemak jo hei.

²² Châmhngat kani ning kha inthengtak a anser jo ti manchênna sik a Levihei kha intheng sōtna anneina sik a ṭong kapek hei. Hiva sik jâra hinum, Eh Pathen kei amandonsōt roh, nalungset len jâra kei hi aṭhensōt roh.

²³ Khava pha khan Jehudi pase katamtak in Ashdod, Ammon leh Moab jōr anlo jo hei ti hi ke’n kahmu sōt jo.

²⁴ Ansahei her khat in Ashdod ṭong a-emak leh ṭong alak anjôm jo khana kanṭong kha heikhonga jôm sik ti hi manhret mak hei.

²⁵ Pasehei kha kalei rasei hei, kalei hâksêr hei, kalei vōk hei khana ansam kalei phoipek hei. Khan chu anmani leh ansa he’n ahei tik chenna ram hlop jōr anlo makna sik Pathen rahminga intepna kamannei hei.

²⁶ Ke’n kati, “Solomon rengpa setna intlo kha ram hlop nuhmeihei kae. Jât ralak renghei kanek a akalenpen reng kha ama kae. Pathen in ama kha alungset a Israelhei chunga reng aleimanchang, kha’num ama’n hiva setna shunga leikatla a kae.

²⁷ Kha achang inchu nangni tatlo hi keini’n kanta juia ram hlop nuhmei kanta ompui heia Pathen ṭong kha kantajui mak sik mo?”

²⁸ Joiada kha Thempu Kalen Eliashib sapa kae, tâk Beth Horon khōpuia Sanballat sanu kha Joiada sapa inkhat in aleiompui, khava jâra Joiada kha ke’n Jerusalem kalei mandahlon jo.

²⁹ Mandon sōt roh, Eh Pathen khava mihei khan thempu ṭōnhmun khana thempu leh Levihei hneng naṭongtep kha heituk a antamanbōk jo mo!

³⁰ Mipuihei kha ram hlop neinâk rakip a inphut kalei manthengsōt hei; mi inkha-khat in anṭōn et anmanhretna sik a thempu leh Levihei sik a sedân kaleisyem pek hei.

³¹ Apha aphat a anta heichoi sik ro-inthoina sik thing, khana mipui he’n hmuchi hma-inkei, khana kara hma-inkei akahmin hei kha anhei choina sik ke’n kaleimantluk pek hei. Eh Pathen, hiseng hei hi mandonsōt hei roh khana hiva sik a rahming ṭhatna kha apek roh.