NAHUM 3 - LEKHARABU INTHENG (BSI)

¹ Chom sik leh vōkkhōi sik a karōi kasip a aka-om, mikathat, mikahōn khōpui kha inhmang jo!

² Rangei ruh! Sungvōk rasa, gâri kâng inlir rasa, Shakorhei inthok rasa, shakor gâri inthok rasa!

³ Shakor kachōng he’n hma ansong, anchem kavâr rik-rak, ankasei kadi rik-rak hei! Mi kalōng inbuk hei, mi kathi aja intei tor mak, khahei chunga mi inpai inthlûk hei!

⁴ Notinu Nineveh kha karâkna inpek jo. Amanu kha enhnōm leh madu sik kasip a kae, phung leh jât-hei ajôr heia sōk amanchang heia kae.

⁵ Chunghnung Rōngpu’n ati, “Nineveh, ke’n nang kakarâk sik che! Pōnsi derkei loa kada sik che, jât he’n hmu hei che rasoh! na’nzakna kha hmu hei rasoh.

⁶ Hnōise pum a katlo sik che akachok vânga kamakhu sik che. Ṭit leh mater tak a mihe’n an-en sik che.

⁷ Nang kahmu rakip in ankahnung inle sik hei, Anmani’n anti sik, ‘Nineveh inhmanga ka-om jo! Tu’n mo ama inlungset sik? Tu’n mo ama lungmōng athlâk sik?’”

⁸ Nineveh, nang Egypt khōpui, Thebe kanek a akaṭhachet che mo? Ama’m bang kapōa akahrung sik tuidung inkhat anei, Nile tuidung kha ama kur kae.

⁹ Ama’n Ethiopia leh Egypt chunga vai arôn, aratha neina abângna om mak; Lybia kha ama inthloppui kae.

¹⁰ Achang inum, Thebea mihei kha rehringa anleiṭhōi heia kae. Hlamlen rakir rakip a ansahei anvōk a, anthat heia kae. Anhlam kakeihei ankhōp heia anṭhōi hei khana ankasur he’n insem heia kae.

¹¹ Nineveh, nang um ju inrui khō inhret maktak a katlu sik che! Nang um naka-en kada heia inphut inphesōt sik a natlo sik.

¹² Narekur rakip hei kha theichang kahmin kung apō sik: Thingkunghei kha kanok roh, theikara kha nabei shunga katla inhlut sik hei!

¹³ Naremihei kha nuhmei kapō hei kae, khana naram kha nakadōihei hmaikunga inhrung tor loa kangira kae. Nasōngkot kot khârhei hmei in akângsō sik hei.

¹⁴ Kakekhuma na-omna sik intluk inna tui the roh, khana narekur manngar chet roh! Ṭek syemna sik matlak chōn kachep roh, khana ṭek syemna kha intlukdek roh!

¹⁵ Hei-hei natloa achang inum, nang rohlon sik che kae a-emak leh re shunga that sik che kae. Nang khai he’n antasâksō hmuchi kapōa manram sik che kae. Nang khaihei kapōa kapung chea kae!

¹⁶ Marvâna ârsihei kanek a invei katlo hingja naneihei! Tâk tûnchu anmani kha mathla anmazera akajōng khaihei kapōa kase jo hei.

¹⁷ Nahlam kakeihei kha phebi thla banga akakop khâikhu rup kapō hei kae. Tâk kani aheilum pha leh khonting mo akajōng jo hei ti tûte’num manhret mak hei.

¹⁸ Assyria rengkalen, naram vaikarônhei kathi jo hei, khana nami kalûrhei area sik a kaje jo hei! Namihei tlâng chunga inchai kathek jo hei, anmani inna anhei kaṭhōi male sik a tûte om mak hei.

¹⁹ Nanat intônbi mandamna sik om mak, nakôkna bi kha dam tor mak jo. Nang sukkhōina ṭong akathei rakip in inpâk a ankut ankaben. Abângna kase narahe-setna inphut tu mo inkhat a’nphesōt jo aka-om mo?