MIJAHEI 17 - LEKHARABU INTHENG (BSI)

Aaron Khōnghre

¹ Rōngpu’n Moses hneng ati,

² “Israel mihe’n khōnghre 12 aphung et a hlamkakei inkhat et in anhei pekna sik che manthei hei roh. Ami et rahming kha ama khōnghre chunga mazet roh

³ khana Levi kathleng khōnghrea khan Aaron rahming mazet roh. Phung hlamkakei rakip akhōnghre inkhat et sik kae.

⁴ Khahei kha ka-omna pōn-Inna choi hei roh, ṭongtep Bôm hma ka’nhmupuina che hmun a khan vada hei roh.

⁵ Khava sōa kakadeisōt mipa khōnghre kha adôn hong kacher sik. Hing’hin Israel sahe’n nachunga anṭong hrina hi kamanbâng sik hei kae.”

⁶ Khanga Moses’n Israelhei ahri pek jo hei, anhlam kakei rakip he’n phung inkhat a khōnghre inkhat et, akhenga 12 anpek jo, khana Aaron khōnghre kha’m khahei kha leh andasa jo.

⁷ Khang’khan Moses’n khōnghre hei kha Pōn-inn shunga Rōngpu Ṭongtep Bôm hma avada jo hei.

⁸ Ajîng kania, Moses Pōn-inn shunga avahlut pha Levi phung kathleng Aaron khōnghrea adôn aleikacher kha avahmu jo. Inhmōm jo, kapâra almond thei leikahmin jo hei!

⁹ Moses’n khōnghre kha achoi heia Israelhei ava manhmu jo hei. Anmani’n ṭōn kasōk kha anhmu jo, khana hlamkakeihei khan ankhōnghre et anlo male nôk jo.

¹⁰ Rōngpu’n Moses hneng ati, “Aaron khōnghre kha Ṭongtep Bôm hma son vada male roh. Hivahi Israelhei maṭhitna a’nda sik kae, anṭonghri kha anbângmak inchu akathi sik hei kae.”

¹¹ Moses’n Rōngpu ṭongpek kapōa atlo jo.

¹² Israel he’n Moses hneng anti, “Kha achang inchu keini inchaina jo kae!

¹³ Tu mo inkhat Pōn-inn ahei kahnai bek kha’m akathi nger sik achang inchu keini kankhenga akathisa jo ung kae!”