MIJAHEI 13 - LEKHARABU INTHENG (BSI)

Aka-en Inthlip hei

¹ Rōngpu’n Moses hneng ahri,

² “Phung 12 heia inphut hlamkakei inkha-khat kadei hei roh Israelhei kapek sik Canaan ram ka-en inthlip sik a tir hei roh.”

^3-15 Moses’n ṭong kha ajuia Paran ram thōia inphut hlamkakeihei kha atirsōt hei, khahei khachu: Phung Hlamkakei Reuben Zaccur sapa Shammua Simeon Hori sapa Shaphat Judah Jephunneh sapa Caleb Issachar Joseph sapa Igal Ephraim Nun sapa Hoshea Benjamin Raphu sapa Palti Zebulun Sodi sapa Gaddiel Manasseh Susi sapa Gaddi Dan Gemalli sapa Ammiel Asher Michael sapa Sethur Naphtali Vophsi sapa Nahbi Gad Machi sapa Geuel

Phung Hlamkakei

¹⁶ Hiseng repa hei hi Moses’n ram ka-en inthlip sik a atir jo hei. Ama’n Nun sapa Hoshea kha Joshua tia arahming athleng pek jo.

¹⁷ Moses’n atirsōt lai hei ama’n anhnenga ahri, “Hina inphut sak ting se ruh, Canaan ram thlâng intonga hlut ruh khanga se una tlângrama jōn ruh.

¹⁸ Khong khova ram mo, mi heija mo aka-om hei, heituk mo akahrat hei ti kha vamanhret sōt ruh.

¹⁹ Ram kaṭha mo, ramkase mo, khōpui kur tukloa mo, kur a’ntuk khuma mo aka-om hei vamanhret sōt ruh.

²⁰ Aralei thai aka-om mo khan chu ratu inthûk ram mo vamanhret sōt ruh. Khava hmun a kara ṭhahrep nantaheirôn nger sik kae.” (Khavakha vomhrui ahmin inphut bina thla kae).

²¹ Khava jâra mihei kha sak ting kase jo hei khana thlânga Zin ram thōia inphut sak a Hamath Rakanna hnenga ka-om Rehob jōnna katlunga anthlira anva-en mathlip jo.

²² Anmani ahma inkeia thlâng intong ramting kase heia Hebron katlung hei, khana mipum kalenhei innshunga inkhat Anakim inti jât-hei sōn Aheman, Sheshai leh Talmai phunghei leika-om hei. (Hebron kha Egypt ram a Zoan kanek a kum 7 mak hma ale’nsyem jo kae.)

²³ Anmani Eshkol Phaichama kahong hei, khana khan vomhrui bâk inkhat antuktan, abōr akahrik hêr inkhat kakai, mi 2-in sungtlōn vâng anhei kadom. Kapothei leh theichang kara’m ṭhahrep anheirôn.

²⁴ (Khava hmun kha Israel sahe’n vomhrui bor hei antuktan jâra, Eshkol Phaicham anti jo).

²⁵ Ram shung kha ni 40 shunga anva-ensōa, repa hei kha

²⁶ Moses, Aaron leh Israel vaipui hnenga Paran ram thōia Kadesh hmun a he’nle jo hei. Antavahmu hei kha thang ankōi jo khana kara anta heirôn kha anmalâr pek jo hei.

²⁷ Anmani’n Moses hneng anhri, “Keini’n aram kha kanva-en mathlip jo, kara kōnna leh ralei thai omna sik a kanva hmusōt; hinahin aram kara ṭhahrep ka-om.

²⁸ Tâk-kha khana aka-om mihei kha ratha kaneitak mihei kae, ankhōpui kalenhei khana kur kaṭha antukkhum hei. Akaṭhamak chet chu, mipum kalenhei sōn leh pâr khana khan kanvahmu hei.

²⁹ Amalek-hei kha thlang intonga ka-om hei; Hit, Jebush, khan chu Amorhei kha tlângrama katla hei; khana Canaanhei kha Mediterranean tui-ôngpui panga leh Jordan Tuidung pang kajuia ka-om hei.”

³⁰ Caleb in Moses dōina a’nphin hei kha arakôk mandai heia ahri, “Tûn, eini’n nivasō sik hei khana aram kha nivahlō sik kae; sova lona sik a katluk a ratha ninei.”

³¹ Tâk-kha Caleb leh inṭhōia akase mihei khan anti, “Changmak, anmani kasō sik a rahōi sōk mak me: sova hmun a ka-om mihei kha eini kanek a ratha kaneihei kae.”

³² Khang’khan anmani’n anram va-en madip kha Israelhei kâra dik loa thangkōina anmanthang jo. Anmani’n anti, “Aram khan khava hmun a ka-om hei inveina sik masō tor mak. Mi kantahmu rakip hei kha inshâng hêr hei,

³³ khana keini’n Anak sōn leh pârhei, pum kalenhei kapha khana khan kanvahmu hei. Keini kha khaikhu kasin kapōhrep a indon ung, anmani’n num khanga anhmu sik ung.”