MIJAHEI 12 - LEKHARABU INTHENG (BSI)

Miriam Karâk a A-om

¹ Moses’n Kushit jōr inkhat a-ompui jo jâra Miriam leh Aaron in anhrimaset.

² Anmani’n anti, “Moses inphut rōk a mo Rōngpu’n ṭong ahri, eini hneng um ahri ri changmak mo?” Rōngpu’n anṭong hri kha athei jo.

³ (Moses chu malung innem kae, raleichunga nun-innem rakip hei kakhea nun-innem kae).

⁴ Rōngpu’n manhret manloa Moses, Aaron khana Miriam hei hneng ati, “Nangni 3 kha ka-omna Pōn-inna hong ruh.” Anmani kase hei,

⁵ Rōngpu kha sumtuk kacho shunga jōng kaṭum, Pōn-inn hlutna kot kunga kangir, khana ahei beksōt hei, “Eh Aaron! Miriam!” Anmani 2 kha anhmating inthon det hei,

⁶ Rōngpu’n anhnenga ati, “Kaṭong hri sik hi tûn rangei ruh! Nankâra sânkathemhei an-om pha hmangtalâra anhnenga inlâr ri eng, anrahmanga ka’n bekpui ri hei.

⁷ Kasōk Moses ka’n bekpui kha leh chu in-ang mak; ama chu kami Israel mipui rakip ka-ensui sik a kanganse kae.

⁸ Khava jâra hmaichanga, inthengtak a, ṭong inthup omloa, ka’n bekpui kae; karavâng kapha hmen ahmu jo kae! Kasōk Moses dōina heikhonga mo ṭong nanta hri ngam?”

⁹ Rōngpu kha anchunga ahnuk kana jo; khanga asesōt pha

¹⁰ Pōn-inn kha sumtuk khan adahlon jo. Miriam vun kha sōkphutrōia hong kaphâr joa kavur kapōa kachek jo. Aaron in amanu kha ahei-en pha, nat in akatōmbit jo kha ahmu pha,

¹¹ ama’n Moses hneng ati, “Apu, lungsettak a hiva kanmona setna sik a karâkna hi amanthōk mak roh.

¹² Amanu hi heikhat akathisa ajō’ntea, aravōi ṭhen khat a’nsâksō jo kapōa manchang mak roh.”

¹³ Khava jâra Moses khan Rōngpu hneng ka-ônga ader, “Eh Pathen, amanu hi mandam roh.”

¹⁴ Rōngpu’n amasôn, “Apa’n amanu hmai aleimachi thlōn achang inchu khava inzakna kha ni 7 ade sik kae. Khava kapōa, amanu kha rephōr vângting Kani vekhat thaksōt ruh, khava sō leh nanheiṭhōi male thei sik.”

¹⁵ Miriam kha ni 7 sik a rephōr vângting anthaksōt jo, amanu anheiṭhōi male mak kârseng, mipui kha le’nthonsōt mak hei.

¹⁶ Khava sōa Hazeroth andahlona Paran ramhânga rephōr ansak jo.