MIJAHEI 10 - LEKHARABU INTHENG (BSI)

Dangka Pengkunhei

¹ Rōngpu’n Moses hneng ati,

² “Mipui bek mantûpna leh rephōr ṭhetna mipui bek mantûpna hmang sik a sekvâng hem a dangka pengkun 2 syem roh.

³ Pengkun 2 kha anjōngṭum sōt inchu ka-omna Pōn-inn hlutna kot kunga nankimvea vaipui a’ntûp sik hei kae.

⁴ Tâk pengkun inkhat rōk a’nhring inchu, phung hlamkakeihei rōk nahnenga ahon’tûp sik hei kae.

⁵ Bongkhat rōk antum inchu, nisōting rephōra ka-om phunghei kasesōt sik hei.

⁶ Vehni changna bongkhat antum inchu, thlâng tinga ka-om phunghei kasesōt sik hei. Khava jâra tum manbong hei kha rephōr ṭhetna sik a hmang sik kae,

⁷ tâk vaipui bek mantûpna sik khachu tum mansôt sik kae.

⁸ Pengkunhei kha Aaron sapa, thempu he’n antatum sik kae. “Hiva sena dân hi ahei tik a antajui ṭhak sik kae.

⁹ Nanram shunga re nankōn pha leh, nanjōng kasō nan-inrepui heia inphut inhrungna sik, rekōn manhretna sik apengkun hi tum ruh. Nan-Pathen Rōngpu ke’n, nankadōi heia inphut ka’nthōpui sik chei khana kahuk sik chei.

¹⁰ Khana inpâkna rōi heia, Thlather Reveihei leh beklanga rehōi ralak-heia, romanvâm inthoina leh inlôikhômna inthoina nantōk pha pengkunhei hi nantatum ri sik kae. Khan chu ke’n ka’nthōpui sik chei kae. Kei nan-Rōngpu nan-Pathen eng kae.”

Israel Sahei Rephōr Ṭhet

¹¹ Mipui he’n Egypt ram anhei dahlonsō kum 2 tlukna, thla hni tlukna, ni 20 ning, Rōngpu omna Pōn-inn chunga sumtuk kha inhlik sōt jo,

¹² Israelhei kha Sinai nêrdiram a inphut anramse inphut jo hei. Sumtuk kha Paran ramhânga inhnga jo.

¹³ Moses hneng Rōngpu ṭongpek kapōa anmani inthon jo hei,

¹⁴ khana ansesōt pha rakip a sedân inkhat kha anjui ri. Judah phungṭhen pōnlek thōia seng kha, Amminadab sapa Nahshon hlamkeina, arup-rup a kasesōt masa hei.

¹⁵ Issachar phung kha Zuar sapa Nethanel in hlam aleikei hei.

¹⁶ Zebulun phung kha Helon sapa Eliab in hlam aleikei hei.

¹⁷ Khava sōa Pōn-inn kha anṭhetsōt sik a kha khana Pōn-inn a’ndom Gershon leh Merari phung he’n akase inphut sik heia kae.

¹⁸ Abânna, Reuben phung hlamkeina rup-hei pōnlek thōia hei kha, arup-rup a, Shedeur sapa Elizur hlamkeina thōia akase inphut sik heia kae.

¹⁹ Semion phunga Zurishaddai sapa Shelumiel in hlam aleikei.

²⁰ Gad phung kha Deuel sapa Eliasaph in hlam aleikei hei.

²¹ Khava sōa Kohath inti Levi phung he’n se anphut sik, neinâk intheng kha ankadom sik. Abânna rephōr kha anheitlung pha, Pōn-inn kha anmatungsōt nôk sik a kae.

²² Abânna, Ephraim phung hlamkeina pōnlek thōia hei, arup-rup a, Ammihud sapa Elishama hlamkeina se anphut sik.

²³ Manasseh phung kha Pedahzur sapa Gamaliel in hlam aleikei hei,

²⁴ Benjamin phung kha Gedioni sapa Abidan in hlam aleikei hei.

²⁵ Achaina pena, Dan phung hlamkeina rup-hei pōnlek thōia, ṭhen rakip hei kahnungpena aka-ensuihei kha, Ammishaddai sapa Ahiezer hlamkeina, arup-rup a se anphut sik.

²⁶ Asher phung kha Okhran sapa Pagiel in hlam akei hei,

²⁷ Naphtali phung kha Enan sapa Ahira in hlam aleikei hei.

²⁸ Israel sahe’n rephōr anṭhet pha khana ansesōt pha rakip a arup-rup a ansesōtna sik dân kha kae.

²⁹ Moses’n anuhmei naipa Jethro sapa Midian mi Hobab hneng ati, “Rōngpu’n keini apek sik a ahrina hmun kajōna a’nphut sik jo ung kae. Ama’n Israel nei leh haona sik a le’ntep, khava jâra, hong roh inṭhōi rih, kannei leh kanhaona hei kha kanchen pui sik che.”

³⁰ Habab in amasôn, “Dâng, kei ka’ntetna ram a inle sik jo eng.”

³¹ Moses’n ati, “Lungsettak a keini adahlon mak roh. Nangni’n ramhâng thōia kanrephōr sakna sik hmun kha’m namanhret, keini hlam nanikei thei sik ung.

³² Keini leh ni’nṭhōi inchu, Rōngpu’n vângṭhat apek rakip ung kha nang um kanchen pui sik che.”

Mipui Inthonsōt

³³ Mihe’n Sinai Tlâng intheng kha andahlon pha, ni 3 hlam a kase hei. Anrephōr matungna hmun kajongsōt sik a Rōngpu ṭongtep thingbôm kha pha rakip a anhma anmankei ṭhak a kae.

³⁴ Rephōr rakip a inphut an-inthonsōt pha Rōngpu sumtuk in sûna chu anchunga amakhu ri hei.

³⁵ Ṭongtep bôm kha se anphut katai, Moses’n hinga ati sik, “Ṭhōi jo roh, Rōngpu; na’nrepuihei kha kathek chai hei roh nakahōt hei kha ṭit-inpirna mantlân jo hei roh!”

³⁶ Khana an-inhngat kataia, ama’n hinga ati sik, “Rōngpu, Israel innshung lishing lishing hei hneng jo’nle jo roh.”