MICAH 5 - LEKHARABU INTHENG (BSI)

¹ Jerusalem mihei, nanremi mantûp hei ruh. Eini ankakekhum tlit jo me! Anmani’n Israel hlamkakeihei anbuhlu jo hei!

Bethlehema Inphut Vaikarôn Inkhat sik a Pathen Intepna

² Rōngpu’n ahri, “Bethlehem Ephrathah, nang Judah shunga khōpui akasinpen hei kâra inkhat che kae, tâk nanga inphut Israel sik a, hmalaia inphut innshung hrui kanei, vaikarôn inkhat kahei majōr sik.”

³ Khava jâra sa kanei sik nuhmei khan asa kha aneimak hma seng Rōngpu’n amihei kha a-inrepuihei kut a adahlon sik heia kae. Khana rehring sura miram a aka-om Israelhei seng kha vōi khat anmihei leh inchun nôk sik jo hei.

⁴ Ama ahong phatak leh, Rōngpu leh Rōngpu Pathen ama khet a alûrna inphut ratha hratna akajōng khan ama’n amihei vai arôn sik kae. Ama mihei kamōng tak a ka-om sik hei, ajârchu raleichung pumpuia mihe’n ama lenna anhnōm sik a kae,

⁵ khana ama’n mōngna ahei choi sik. Assyria he’n nirama re anheitloa nirekur hei ansukkhōi pha, nihlam kakei kahratpen hei kha anmani re katuk sik a nitir sik hei.

Huksōtna leh Karâkna

⁶ Nimrod ram a Assyria mihei kha re hmangchâk ratha neina vânga anmani’n antor sik, khana Assyria he’n nirama re anheitlo pha anmani’n Assyrianheia inphut anhuk sik me.

⁷ Alakahring seng Israel mihei kha Rōngpu’n jât rakip sik a ajōngtir hlimsengna radaitui kapō kha ka-ang sik hei, phidông kakek chunga khō rahme kasûr kapō kae sik. Khahei kha mihring chunga changloa, Pathen chunga a’nngai sik hei kae.

⁸ Jât-hei kâra dahlona aka-om hei kha ratu shunga a-emak leh ramhânga sâk kajong shabakkai kapō hei kha kae: kemōng rup kâra kahlut a anmani asur heia, ahar-ahak a akapirtan sik hei, inhukna sik a inhōrna om mak a kae.

⁹ Israel in a’ndōipui hei ator sik hei khana ankhenga asuk manhmang sik hei.

¹⁰ Rōngpu’n ati, “Khava pha khan nanshakor hei kaṭhōisōtpet sik hei khana nanshakor gârihei kaman hmangsō sik hei.

¹¹ Nanram shunga khōpuihei kamanhmang sik hei khana nanrekur rakip kasuk mathlek sik hei.

¹² Nantahmang dôi rakip kasuk manhmang sik khana tlâ-sân kathem kasea kadahlon sik che.

¹³ Nalim hei leh a’ntheng hlung chopuihei kamanhmang sik; nanbinga nantasyem kha vōi khat kamuk mak jo tin chei.

¹⁴ Nanrama Asherah pathennu limsyem kha kakei mathlak sik khana nankhōpuihei kasuk manhmang sik hei.

¹⁵ Khana kahnuknat lôtna, kaṭong kajuimak jât rakip chunga phu kahlō sik hei.”