MICAH 2 - LEKHARABU INTHENG (BSI)

Misara Suk manrimna Kapek hei Revân

¹ Hmit harpuma akaje khana akaṭhamak ṭōn mantlukna kaneihei sik a heituk a ṭitpek ka-om hei mo! Jîngkâr ahong pha, pha kaṭha anhmutak leh ṭhatmak anmantlukna kha antlosōt a kae.

² Anmani’n hlei anmadu pha, khavakha ansur; inn anmadu pha, anlo hei. Tûte inkhat innshung karōi kha hrung theina om mak a kae.

³ Khava jâra Rōngpu’n ati, “Ke’n nanchunga khōdeng theina masōna sik intluk eng, khana nangni’n khana inphut inphesōt tor mak tin. Nangni khōdeng theina nanhmu sik, khana avea inlensaktak a lôntor mak jo tin.

⁴ Khava pha kha ahong pha, mihe’n nangni thuhming kha inrengna tekhing inkhat a anhmang sik, nangni taleithōk chungchânga hiva inrengna hla hi anmani’n anhongsak sik: Keini inhmang cher jo ung! Rōngpu’n kanram alopek jo ung Keini rehringa anikasur hei hneng apek jo ung.”

⁵ Khava sōa, Rōngpu mihei hneng ram kha pekmalena pha ahong tlung kâra chu, nangni inkhatbek sik a chen neimak tin chei.

⁶ Mihe’n kahnenga anhrilea anti, “Kanhnenga hrile mak roh. Khava rakip chungchânga hrile mak jo roh. Pathen in hmai kayum renga adamak ning.

⁷ Israel mihei hi hâksêr kachen sik a nanmandon mo? Rōngpu kha thōktorna neimak jo mo? Khava kapōtak a ama’n atlo sik mo? Akadik katlohei hneng ama’n lungset a hrina neimak a mo?”

⁸ Rōngpu’n amasôn, “Nankadōihei chunga nantatlo kapōa kamihei nanbuhlu hei. Inna inhukna kanchen sik tia a’ndon mihe’n rehmun a inphut hong inle hei, tâk nangni khana khan anzakkō kasut sik a nanhlō heia kae.

⁹ Nangni’n kami nupuihei kha an-inn lungset a inphut nanhnongsōt hei, khana ahei tik a sik a mahâmṭhat kapek ansahei kha nanchom hei.

¹⁰ Thōi ina se jo ruh; hinahin inhuk theina om mak jo. Nangni setna khan hiva hmun hi inhmangna amanchang jo.

¹¹ “Hiva mihei hin maleisei leh hōnna kasip sânkathem khana, ‘Nangni sik a ju leh theitui kalōng sik’ tia kasânsōt hei kha anmadua kae.’

¹² “Tâk-kha nangni dahlona ka-om Israel mi seng, ke’n kakhôm manchun hi sik chei. Kemōng in anrōnga anhong inle kapōa ke’n nangni kaheiṭhōi manchun sik chei. Kemōng khemna hmun a kemōng kasip tlit kapōa, nanram hi vōi khat mi kasip tlit sik hei.”

¹³ Pathen in anmani sik hlam amahlâng pek sik hei khana rehring sura an-omna inphut aheiṭhōisōt sik hei. Anmani khōpui kot khâr kha anvōkkhōia kasōksōt sik hei. Anrengpa, Rōngpu khet in aṭhōisōt sik hei.