MATTHEW 8 - LEKHARABU INTHENG (BSI)

Jesu’n Mi inkhat Amandam

¹ Tlânga inphut Jesu ajōng ṭum pha, mipui katamtak he’n akahnung anleijui.

² Khava kahnunga ṭit ka-om tak vunnatna karôn inkhat kahonga ahma a inkuna ahri, “Apu, nang in ka’ntheng sik namadu’n chu, namantheng tor eng”, ati.

³ Jesu’n akut azera asit a, “Ke’n kamadu, intheng roh,” ati. Khava phatak a khan anatna kha intheng jo.

⁴ Jesu’n ama hneng, “Rangei roh! Tûte hneng hrimak roh, tâk thempu hneng intlunhrek a se roh, en che rasoh, khana na’ntheng kha mi rakip hneng a’nchênna sik Moses ṭongpek dungjuia tōkna vanei roh,” ati.

Jesu’n Roman Ṭōnpui karônpa Sōk Amandam

⁵ Jesu Capernaum ahlut pha, Roman ṭōnpui karônpa inkhat ahnenga kahonga inthōpuina sik aleingek a:

⁶ “Apu, kasōk damloa inna rakhum chunga ka-om, inhling theiloa khōdeng katheitak a ka-om,” ati.

⁷ Jesu’n ati, “Kei kase sik enga kha kavamandam sik.”

⁸ “Oh changmak, Apu,” Ṭōnpui karônpa khan ati. “Ka-inna nahong sik hi karahōi sōk mak. ṭong rōk kha pek roh, kasōkpa kadam sik.

⁹ Kei um kachunga ṭōnpui karônhei ratha neina thōia aka-om inkhat eng kae, khana kei thōia sepei ka-om hei. Ke’n inkhat hneng ‘Se roh!’ kati leh ama kase; khava inkhat hneng, ‘Hong roh!’ kati leh kahong; khana kasōk hnenga ṭong kapek a, ‘Hi tlo roh,’ kati leh ama’n atloa kae,” ati.

¹⁰ Jesu’n athei pha inlak asak joa akahnung kajui mipuihei hneng, “Kahri pek chei kae, hinghrep a taksenna kanei Israel kâra inkhatbek um lahmu mak eng.

¹¹ Inchêna kahri pek chei kae nisō leh tlaitlâk tinga inphut mi katamtak kahong sik hei, khana Abraham, Isaac khana Jacob leh marvân rengram a revei sâkna in-ongsap sik hei.

¹² Tâk Rengram a aka-om sik mihei kha inthimna shunga anhlonsōt sik hei, khana khan kaṭap sik hei khana anha ankarôt sik jo,” ati.

¹³ Khava sōa Jesu’n ṭōnpui karônpa hneng khan, “Inna se jo roh, nataksenna khan atlopek sik che,” ati. Khana ṭōnpui karônpa sōkpa kha khava phatak a khan kadam jo.

Jesu’n Mi katamtak Amandam hei

¹⁴ Jesu kha Peter inna leikase, khana khan Peter terpi hritluna akana a jekhuma akaje kha avahmu.

¹⁵ Ama’n akut kha aleisit pek; hritlun khan amasō jo, khana amanu kha kathōia razen aphut jo.

¹⁶ Khōhlei achang jo pha, mipui he’n Jesu hneng ramṭai karôn katamtak ahnenga anheiṭhōi hei. Jesu’n rathla kaṭhamak-hei kha ṭong inkhat vâng aleihnongsōt hei, khana akana rakip aleimandam hei.

¹⁷ Hivahi Isaiah sânkathem taleihri, “Ama khet in ninatna rakip aloa khana hri rakip arônsō jo,” ti kha huitlungna sik a atlo kae.

Jesu Kahnung Kajui sik hei

¹⁸ Jesu’n akimvea mipui anka-om kha amanhret pha, asonlehei kha dîr rekhat ting ansena sik ṭong apek jo hei.

¹⁹ Dân oja inkhat ahnenga kahonga. “Oja, nasena hmun rakip a jui sik chea intlukdek a akahong eng kae,” ati.

²⁰ Jesu’n amasôn, “Ram-ui he’n khurhei annei, khana vahe’n rabuhei annei, tâk Mihring Sapa khan lu manhngatna leh châmhngatna hmun neimak,” atipek.

²¹ Asonle kachang mihlop inkhat in, “Apu, ahma inkeia inle hi rong, kapa vavûm hi rong,” ati.

²² Jesu’n amasôn, “Ajui roh, akathi he’n ankathi kha vûm hei rasoh.”

Jesu’n Thlipui Amandai

²³ Jesu rakōng inkhat a leikahlut a, asonle he’n anle’nṭhōi pui.

²⁴ Manhret manloa dîr kha thlipui inhnaktak in avōk jo, rakōng kha tlâksuk rong ati jo. Tâk Jesu chu kajea leika-om.

²⁵ Sonlehei ahnenga kase heia anva mathō, “Apu, ahuk roh! Keini kathi sik jo ung,” anti.

²⁶ Jesu’n amasôn hei, “Heisa mo hingtuk a nantaṭit. Heituk a taksenna katlôm chei mo!” Khava sōa ama kathōia, thli leh tui in-nông kha adaina sik a arakôk jo, khan chu kadairip jo.

²⁷ Mi rakip in inlak anleisak jo. Anmani’n, “Khong khova mi jo mo? Thlipui leh tui in-nông kapha’n aṭong antajui hi,” anti.

Jesu’n Ṭai karôn Mi Inhni Amandam hei

²⁸ Dîrpang khat ting Gadara ramṭhen a Jesu ahong pha, thlânkhura inphut ahei kasōk ṭai karôn 2 he’n anlei intōpui. Khava mihei kha ṭai anleirôn khana ṭit ka-om tak anchang jâra khava hlamting tûte inlônmak hei.

²⁹ Khava laitak khan ka-ông heia, “Eh Pathen Sapa, heimo manlo sik namadu ung? Pha atluk mak hma karâkna kankapek sik a akajōng jo che mo?” anti.

³⁰ Inkârrei loa thlai kasâk a ka-om vok katamtak leika-om hei.

³¹ Ṭaihei khan Jesu hneng anngek a, “Nang in nahnong sōt sik ung achang inchu, vok rup-hei kâra son atir roh,” anti.

³² Jesu’n anhnenga, “Se ruh” ati hei; khana anmani kasōk heia vok-hei shunga kahlut jo hei. Vok rup pumpui hei kha karepang inhrâp a katlânsuk heia dîr shunga katla inhlut jo hei khana kathisō jo hei.

³³ Ankakhemhei katlân heia khōpuia kahlut jo hei. Khana khan thuhming rakip, ṭai karônpa chunga omchen kasōk kha anvahri jo.

³⁴ Khava jâra khōpui shunga mi rakip Jesu inhmupui sik heikasōk hei; khana anmani’n ama anhmu pha anramṭhen kha adahlona sik anngek jo.