MATTHEW 5 - LEKHARABU INTHENG (BSI)

Tlâng Chunga Mantheina

¹ Mipuihei kha Jesu’n ahmu heia tlâng chung inkhat a kakea in-ong jo. Khana asonlehei akimvea ho’ntûp hei,

² khana ama’n amanthei manphut jo hei:

Inpâkna Kadiktak

³ “Rathla a antlâksamna inhret hei anmahâm kaṭha; marvân rengram kha antâ kae!

⁴ “Ṭajai kasui hei kha anmahâm kaṭha; Pathen in lungmōng athlâk sik hei!

⁵ “Malung innem hei kha anmahâm kaṭha; Pathen ṭongtepna kha anchen sik!

⁶ “Pathen lungdo katlo hnōm hei kha anmahâm kaṭha; Pathen in pui katluk a amankhop sik hei!

⁷ “Milak chunga lungsetna kaneihei kha anmahâm kaṭha; Pathen in alungset sik hei!

⁸ “Malung intheng hei kha anmahâm kaṭha; Pathen antahmu sik kae!

⁹ “Intōk inchamna katlohei kha anmahâm kaṭha; Pathen in asahei ati sik hei!

¹⁰ “Pathen tarangei kha antlo jâra suk manrimna ka-om hei kha anmahâm kaṭha; marvân Rengram kha antâ kae!

¹¹ “Kei nanjui eng jâra mi’n inzakna anpek cheia antlo manrim cheia khana nanchunga akaṭhamak maleisei hingja anhri pha a nanmahâm kaṭha;

¹² Inpâk ruh khana tlai ruh, ajârchu marvân chunga inpâkman kalen kha dapek jo chei kae. Nanhma aleika-om sânkathemhei kha’m hinga anta leisuk manrim hei kae.

Chi leh Vâr

¹³ “Nangni mihring jât pumpui sik a chi kapō chei kae. Chi kha a-êna asep jo’nchu, avea man-e theina sik ahlam om mak jo. Hnemna kase kachang jo, achang jâra anhlonsōt a mihe’n anchōn rachia kae.

¹⁴ “Nangni vânhnōi pumpui sik a vâr kapō chei kae. Tlâng chunga a’nsak khōpui kha inthup tor mak.

¹⁵ Tûte’num thaihmei adet kha hrai thōia makhu phungmak, tâk amatungna chunga ada khana innshunga ka-om rakip sik a ara-âng manvâr.

¹⁶ Khava kapōhrep a nanvâr kha mihei hmaikunga akavâr nger sik kae, khanba nanṭōn kaṭha tlo kha anmani’n anhmu sik a kha marvâna nanpa kha antachoi ka-ân sik kae.

Dân Chungchânga Mantheina

¹⁷ “Moses Dân leh sânkathemhei ṭonghei kha akasuk inhmang sik akajōng eng kae tia amandon mak ruh. Khava kasuk inhmang sik a kei akajōng changmak eng, tâk anmantheina kha hui atlungna sik a akajōng eng kae.

¹⁸ Mandon sōt ruh marvân leh ralei a-omlai seng, Dân rahme khana ajâr kasinpen inkhatbek inhmang mak ning, heirakip a’nchai mak hma seng.

¹⁹ Kha achang jâra tu achang inum hiva ṭongpek kasinpen hei-inkhat ajuimak inchu, khana mihe’m khanga tlo sik a amanthei he’nchu marvân rengram a akasinpen akachang sik kae. Inkhat ting chu, tu achang inum dân kajui khana mihe’m khanga a’nthei khan marvân Rengram a akalen kachang sik.

²⁰ Khan chu ke’n kahri pek chei kae, Pathen lungdo tlona chunga khan Dân ojahei leh Phariseehei kanek a nangni taksenthei nanchang rōk leh khan marvân Rengram kha akahlut tor sik chei kae.

Hnuknat Chungchânga Mantheina

²¹ “‘Mi that mak roh; tu achang inum mikathat kha aṭong a’ntan sik kae’ tia hmalai mihei taleihri nangni’n nanthei jo.

²² Tâk tûn ke’n kahri pek chei kae: tu achang inum asōpui chunga hnuk kana mi kha aṭong a’ntan sik kae. Tu achang inum asōpui kha, ‘Ṭhatna kase’ ati’nchu, Sehmang-pachonghei hmaikunga ṭhōi sik kae; khana tu achang inum asōpui hnemna kase, mikamo ati’nchu, hmeikhur jōnna thinathei shunga aka-om sik kae.

²³ Khava jâra maichâm chunga nang in Pathena tōk sik kutchoi nahei choi inchu, khana khan nasōpui inkhat in nachunga adōina che kha namandonsōt inchu,

²⁴ nakutchoi kha maichâm hma khan da hi roh, inranga se ina nasōpui kha va’nchampui hi roh, khava sō leh hong inle ina nakutchoi kha Pathen hneng vatōk roh.

²⁵ “Mi inkhat in dân dungjuia amaher chea, ṭongtan hmun a aṭhōi che’nchu, ṭongtana hmun a nase mak hma, apha omlai inchampui roh. Khava khan nase jo inchu ṭongkatan hneng apek sik chea kha ṭong katanpa khan police hneng apek sōt sik che, khana kurkhum a ankhum sik che.

²⁶ Kadiktak a kahri pek che kae, naleichoi nasêr kha napek sō mak kârseng nang kha khan antakhum sik jo che kae.

Mikajông Chungchânga Mantheina

²⁷ “‘Jông mak roh,’ inti ṭong hi nangni’n nanthei jo.

²⁸ Tâk tûn ke’n kahri pek chei kae: mi inkhat in nuhmei inkhat en kadikmak a a-en inchu mi kha amalunga akajông jo kae.

²⁹ Khava jâra nachang tinga nahmit in setna amantlo che achang inchu, khersōt inna hlon roh, ajârchu nataksa pumpui hmeikhura hlon manhlut kanek a, nataksa bâk inkhat inhmang kha nang sik a kaṭha jôk.

³⁰ Nakut changting in setna amantlo che achang inchu, tansōt inna hlon roh! Ajârchu nataksa pumpui hmeikhura ahlut sik kanek a, nabân inkhat inhmang kha nang sik kaṭha jôk.

Inṭhen Chungchânga Insena

³¹ “Hing’hinum le’nhri, ‘Tu achang inum anuhmei inṭhenpui mi khan, indana malârna lekha inkhat apek nger sik kae.’

³² Tâk tûnchu ke’n kahri pek chei kae: jông leh kîk jâra tei loa, mi inkhat in anuhmei a’nṭhenpui inchu, khana amanu khan puise ther anei inchu, amanu kha amapa’n amanjông jo kae; khana amanu ka-ompui mipa kha’m akajông jo kae.

Intepna Chungchânga Mantheina

³³ “Khan nôk chu, ‘Ṭong na-intepna kha sukkhōi mak roh, tâk Rōngpu ângshunga tlo sik a naṭong intepna hei kha hui mathlung roh,’ tia hmalai mihei hneng ale’nhri hi’m nangni’n nanthei joa.

³⁴ Tâk tûn ke’n kahri pek chei kae: ṭong intepna inkhat nannei pha, ṭong sekamna hmangmak ruh, Marvân pan ina ṭong sekamna tlomak ruh, ajârchu Pathen len in-ongna kae;

³⁵ achangmak leh ralei kapan a ṭong sekamna neimak ruh, ajârchu ake manhngana kae; a-emak leh Jerusalem kapan a ṭong sekamna neimak ruh, ajârchu Rengkalen khōpui inkhat kae.

³⁶ Khan chu nanlu kapan a ṭong sekamna neimak ruh, ajârchu nangni’n nansam rahme inkhat rōk um manbang achangmak leh mandum tor mak chei.

³⁷ ‘Ôk’ a-emak leh ‘Dâng’ ti hnâm ruh, hiva kakhea nahri kha Akaṭhamak Inkhatpa a inphut ahei kasōk kae.

Phuhlō Chungchânga Mantheina

³⁸ “‘Hmit inkhat sik a hmit inkhat, khana ha inkhat sik a ha inkhat,’ tia a’nhri kha nangni’n nanthei jo.

³⁹ Tâk tûn ke’n kahri pek chei kae: nanhnenga dikmak katlo chunga phu hlōmak ruh, tâk tu inkhat in nangambe changting akaben inchu inkhat ting kha’m madopek roh.

⁴⁰ Khana mi inkhat in nazakkō jâra ṭong tanna amaher che’nchu, vâng intong zakkō kalen kha’m peksa roh.

⁴¹ Sepei kalen inkhat in aphurrôn kahrik kilometre inkhat rumhrat a amanrôn che’nchu, kilometre 2 rôn pek roh.

⁴² Mi inkhat in heikhat ader che pha, pe roh; khana mi inkhat in heikhat apûk hnōm inchu, manpûk roh.

Ni’nrepui Lungset sik

⁴³ “‘Naṭhōnhei lungset hei roh, khana nakadōi hōt hei roh,’ ale’nti kha nanthei jo.

⁴⁴ Tâk tûn kahri pek chei kae: nakadōihei lungset hei roh khana nakasuk inrim hei sik derpek hei roh,

⁴⁵ khavakha marvâna ka-om nanpa sa nanchang theina sik a kae. Ajârchu ama’n akaṭha leh akaṭhamak chunga kani amansat et, khana akadik leh akadik mak katlo chunga khō amansûrsap a kae.

⁴⁶ Nangni inlungset hei rōk kha nanlungset he’nchu, Pathen in heitloman mo apek sik chei? Ramsêrṭhei kaṭhei heibek kha’num khanga antloa kae!

⁴⁷ Khana nanṭhōnhei rōk kha nanrakôk he’nchu, chônngai kakhea heimo nantatlosa aka-om? Khōvelhei kha’num khanga antloa kae!

⁴⁸ Marvâna nan-Pa kha pui katluk kapōa, nangni um pui akatluk nger sik chei kae.