MATTHEW 4 - LEKHARABU INTHENG (BSI)

Jesu Enmansinna

¹ Khava sōa Rathla khan Jesu kha nêrdiram a Diabol in enmansin sik a aṭhōisōt jo.

² Sûn 40 leh jân 40 thlai ahngōi jo pha, Jesu kha avon kaṭâm jo.

³ Khava sōa Diabol kha ahnenga kahonga ati, “Nang Pathen sapa nachang inchu hiva hlunghei hi buhlom changna sik ṭong pe roh.”

⁴ Tâk Jesu’n amasôn, “‘Mihring hi buhlom vâng rōk a hring tor mak, tâk Pathen ṭongsō rakip vâng khan akahring sik kae,’ tia ṭong intheng in ati.”

⁵ Khava sōa Diabol khan Jesu kha Khōpui Intheng Jerusalema khan aṭhōia, Bek-inn chung inshânga aman ngira,

⁶ khana ahnenga ati, “Nang Pathen Sapa nachang inchu, nabinga inchôm inthla roh, ajârchu hing’hin ṭong intheng in ahri: ‘Pathen in nachungchânga angevahei ṭong apek sik hei, hlunga nake nasuk makna sik, anmani’n ankut vâng anleimado sik che.’”

⁷ Jesu’n amasôn, “Tâk ṭong intheng in hing’hinum ahri, ‘Nang in na-Rōngpu na-Pathen enmansin mak roh.’”

⁸ Khava sōa Diabol khan Jesu kha tlâng inshângtak inkhat chunga aṭhōia, vânhnōi raleichung rengram rakip leh anlûrnahei amanhmua,

⁹ Diabol in ati, “Nang in na-inkuna kei nakamuk eng inchu hiseng hei hi kapek sik che.”

¹⁰ Khava sōa Jesu’n amasôn, “Seitan, Sesōt roh! Ṭong intheng in hinga ati, ‘Nang in Rōngpu na-Pathen rōk kha nakamuk a narazen sik kae!’”

¹¹ Khanachu Diabol khan Jesu adahlon jo; khana marvân ngevahei kajōng heia anjōng inthōpui jo.

Galileea Jesu’n Aṭōn Aphut

¹² John kha kurkhum a anda jo ti Jesu’n athei pha, Galilee ramting kasesōt jo.

¹³ Nazareth khōa om mak jo, Jebulun leh Naphtali ramṭhen shunga Galilee Dîr panga Capernaum khōpuia aka-om sik a kase jo.

¹⁴ Hivahi sânkathem Isaiah taleihri kha huitlungna sik a ale’ntlo kae:

¹⁵ “Zebulun ram leh Naphtali ram a, tuipui jōnna hlam, Jordan rekhat ting Jât-hlop hei ram Galilee!

¹⁶ Khō inthim thōia ka-om mihe’n vâr kalen inkhat anhmu sik. Khana thina ram daihlim thōia aka-om hei chunga vâr kha hong kavâr sik.”

¹⁷ Khava pha inphut Jesu’n aṭong ahrile manphut jo, “Nanset tloa inphut hong inhe ruh, ajârchu marvân Rengram kha kahnai jo!”

Jesu’n Nga Kasur Mi 4 Abekna hei

¹⁸ Galilee dîr panga Jesu kalôna Simon (Peter um anti) leh anaipa Andreu hei unai 2, nga kasur mihei, dîr shunga len anta leivora nga anta leijong kha ahmu hei.

¹⁹ Jesu’n anhnenga, “Hong una ajui ruh, khana ke’n mi surje manthei chei rong,” ati hei.

²⁰ Khavatak a anmani’n anlen andahlona anjui jo.

²¹ Khanga kaselea ahlop unai 2, Zebedi sahei, James leh John avahmu hei. Anrakōng shunga anpa Zebedi leh len anmantluk a aleika-om hei kha avahmu hei. Jesu’n abek hei,

²² khavatak a anmani’n rakōng leh anpa kha andahlona ama anjui jo.

Jesu’n Mi katamtak Aman theina

²³ Galilee ram pumpuia Jesu kalôna, Intûpna innheia amanthei hei, Rengram chungchânga Ṭong kaṭha ahrile, khana mihei natna hei seng amandama kae.

²⁴ Syria ram pumpuia aṭong hi inthang jo, khana akadam mak hrinat inralak a khōdeng kathei: ṭai kahlut, hring-ê karôn, lang kangōi, ahnenga anheiṭhōi hei, Jesu’n aleimandam hei.

²⁵ Galilee, Khōpui Sôm, Jerusalem, Judea, khana Jordan rekhat a ramheia inphut mipui katamtak in ama anjui joa kae.