MATTHEW 26 - LEKHARABU INTHENG (BSI)

Jesu Dōina Ṭōnmantluk

¹ Jesu’n hihei seng amantheisō hei pha, asonlehei hneng,

² “Nangni’n nanmanhret, ni 2 sōa Rakan Kût sik jo kae, khana Mihring Sapa kha thingrakea makhei hlonna sik antapek sōt sik jo kae,” ati.

³ Khava pha Thempu Kalen Caiaphas innpuia, thempu kalenhei leh Jehudi upahei intûp jo hei,

⁴ khana marûk a Jesu kha sura thatna sik anmantluk jo.

⁵ Tâk anmani’n, “Revei pha hinchu tlomak rih, akinchu mipui kâra inhnokna kasōk sik,” antia kae.

Bethany a Jesu Thai Antamanthi

⁶ Bethany khōa vun kaphâr nat kaṭhamak a aleikanapa, Simon inna Jesu leika-om.

⁷ Jesu’n bu asâk lai, nuhmei inkhat in aman katamtak thai Alabaster peng inkhat ahei choia alu chunga asunthlōn jo.

⁸ Sonlehei khan kha anhmu pha anhnuk kana a, “Heisa mo hiseng a’nhmang jo?” tia inder hei.

⁹ “Hiva thai marim katui hi aman katamtak a jōra sêr kha sara khōdeng katheihei sempek thei hei kae!” anti.

¹⁰ Anmani ṭonghri kha Jesu’n amanhret joa anhnenga ati, “Heisa mo nuhmei hi amalung nantamanhōi pek mak? Amanu hin kei sik a akaṭha leh marit ka-om ṭōn atlo kae.

¹¹ Sara khōdeng katheihei khachu nanta-ompui ṭhak sik hei kae, tâk kei chu nangni leh omsap ṭhak mak min.

¹² Amanu’n hiva thai marim katui kachunga asun hin kei vûmna sik a intlukna amannei eng kae.

¹³ Tûnchu, kadiktak a kahri pek chei kae, hiva ṭong kaṭha hi raleichunga anhrina hmun rakip a, amanu mandonsōtna inkhat a aṭōn leitlo hi a’nhriṭhak sik jo kae.”

Judas in Jesu Pek sōt sik a Akahnōm

¹⁴ Khava pha sonle 12 hei kâra inkhat Judas Iscariot intipa kha thempu kalenhei hneng kasea

¹⁵ khana ader hei, “Ke’n Jesu kapek sōt chei inchu heimo nantapek sik eng?” ava ti. Anmani’n dangka 30 anteia anpek jo.

¹⁶ Khava pha inphut Judas in Jesu kha pek sōt theina sik hlamkot ajōng joa kae.

Sonlehei leh Jesu’n Rakan Kût Bu Antasâk

¹⁷ Chê philo Buhlom Revei kani hma-inkei ning sonlehei kha Jesu hneng kahong heia, “Nang sik a Rakan Kût bu sâkna khon mo kantamantluk sik namadu?” anhongti.

¹⁸ Ama’n anhnenga ati, “Khōpuia son mi inkhat hneng se ruh, hinga vahri ruh: ‘Oja khan, kapha hong katlung jo; kei leh kasonlehei na-inna Rakan Kût kantahmang sik kae ati,’ vati ruh.”

¹⁹ Sonlehei kha Jesu tahri kapōa anvatloa, khana khan Rakan Kût bu sik kha anmantluk jo.

²⁰ Khōhlei ahongtluk jo pha, Jesu leh asonle 12 hei busâk sik a in-ong jo hei.

²¹ Bu ansâklai Jesu’n, “Kahri pek chei kae, nankâra inkhat in mikut a apek sōt sik eng,” ati.

²² Sonlehei anmalung kadong hêr joa inkha-khat in ahnenga ander et, “Kei natina eng chu chang hêrmak nu, Rōngpu?”

²³ Jesu’n amasôn heia, “Kei leh thleng shunga kut inporsap khan kei apek sōt sik eng.

²⁴ Mihring Sapa kha ṭong intheng tahri kapōa akathi sik kae, tâk Mihring Sapa kha mikut chunga akapek sōt sikpa kha heituk a ṭitpek aka-om jo mo! Ama ale’ntet hêrmak achang inchu ama sik a akaṭha jôk sik kae!” ati.

²⁵ Akapek sōt sik Judas khan heikaṭonga, “Oja, kei natina eng chu changmak nu?” ati. Jesu’n ahnenga, “Nang in khanga nati jo,” atipek.

Rōngpu Jân-thlaisâk

²⁶ Anmani’n ansâklai, Jesu’n buhlom har kha aloa manpâkna derna anei, khana akhōia asonlehei hneng apek heia, “Lo una sâk ruh, hivahi kataksa kae,” ati.

²⁷ Khava sōa ama’n kōklei kha aloa, Pathen manpâkna anei, khana anhnenga apek jo hei. Ama’n ati, “Hi nankhenga in ruh,

²⁸ hivahi Pathena intepna chunga mêrchîkna a’ntat, mi katamtak set rangei mandamna sik a akalōng kathisen kha kae.

²⁹ Ke’n kahri pek chei kae, kapa rengram a nangni leh vomhrui tuither kha ni-insap mak kârseng, tuna inphut a hiva vomhrui tui ke’n avea in nôk mak jo ning.”

³⁰ Khana anmani’n hla inkhat anleisak a Olive Tlâng ting kasesōt jo hei.

Jesu’n Peter Inphe sik Ahri sōt

³¹ Khava sōa Jesu’n anhnenga ati, “Tûnjân tak hin nankhenga kei nandahlon enga katlânsō sik chei, ajârchu ṭong intheng in ahri, ‘Pathen in kemōng kakhempa athat sik, khana kemōng rup-hei kha a’nchekdâk sik hei kae.’

³² Tâk kei kathōisōtsō leh, nanhma Galileea leikase sik eng.”

³³ Peter hongkaṭonga, Jesu hneng, “Ankhenga andahlon che’num, kei chu dahlon hêrmak che ning!” ati.

³⁴ Jesu’n Peter hneng, “Kahri pek che kae, tûnjân âr akhōng mak hma vōi 3 manhret mak eng nati sik kae,” ati.

³⁵ Peter in amasôn, “Nang leh akathisap sik me achang inum khanga chu tihêr mak ning!” Alak sonle rakip inum in-ang et a antia kae.

Gethsemane Rahōn shunga Jesu’n Ader

³⁶ Khava sōa Jesu’n asonlehei leh Gethsemane inti hmun a leikase hei, ama’n ahnenga, “Kei soson kasea derna kavanei shunga nangni hin le’n ong ruh,” ati hei.

³⁷ Peter leh Zebedi sa 2 hei aleiṭhōi hei. Malung inrimna leh lungdongna’n amakhusi jo,

³⁸ khana anhnenga ati, “Kamalung inrengna hi inhnakreia asuk manchip sik jo eng. Hin om-una ahei enṭhak ruh.”

³⁹ Hmating ajingte kasea, ahmai raleia kakhup a, “Apa, achangthei sik inchu, hiva inrengna kōklei hi keia inphut alosōt pek roh! Tâk kei racham changmak sona nang racham chang rasoh,” ati.

⁴⁰ Asonle 3 hei hneng he’nlea aleikaje hei kha avahmu hei; Peter hneng, “Pung khat rōk um nangni’n nantathōkpui tor mak eng mo?

⁴¹ Mathlemna nantlâk makna sik der una thōk ruh; Rathla’n chu intluk, tâk taksa’n chu katlasama kae,” ati.

⁴² Vōi khat nôk Jesu kasea avader, “Apa, hiva inrengna kōklei hi kei ta-inmak sik a losōtthei achangmak inchu nang racham kha chang jo rasoh.”

⁴³ Ama vōi khat he’nle nôk a sonlehei aleikaje hei kha avahmu nôk hei; anhmit hmu jâra le’nṭhang tor mak jo hei.

⁴⁴ Avea Jesu’n adahlon heia kasea hma a akaṭong kapō-pōa vōi 3 tlukna avader nôk jo.

⁴⁵ Khava sōa sonlehei hneng he’nlea anhnenga, “Tûn katlung châm a’nhnga cheia alakaje chei mo? Enruh! Mihring Sapa kha mikasehei ratha neina thōia pek sōtna sik pha kha hong katlung jo.

⁴⁶ Thōi ruh, se jo rih. Enruh, ani kapesōt sikpa kha hin ka-om jo!” ati.

Jesu Antasur

⁴⁷ Jesu’n khanga ahrilai, 12 hei kâra Judas kha heikatlung jo. Ama leh mi katamtak in chemjâm leh sung anheichoia thempu leh upahei mansena thōia kahong jo hei.

⁴⁸ Akapek sōt sikpa khan mipuihei hneng chîkna inkhat aleipek hei: “Ke’n kamajôp pa kha nanta madupa kha kae. Kha sur ruh!” atipek hei.

⁴⁹ Judas kha Jesu hneng intlunhrek a kahonga, “Mōngna’n ompui che rasoh, Oja,” atia avamajôp jo.

⁵⁰ Jesu’n amasôn, “Ṭhōnpa, natlo sik kha inranga tlo jo roh!” Khava pha, anmani kahong heia Jesu kha ansur jo, anmatutlit jo.

⁵¹ Jesu leh a’nṭhōi mi inkhat khan achemjâm aradok a Thempu Kalen sōkpa kōr atuk mathlâk jo.

⁵² Jesu’n ahnenga, “Nachemjâm kha apaia thōn male roh. Chemjâm kahmang rakip khan chemjâm vâng akathi sik kae.

⁵³ Kapa hnenga inthōpuina kadertor khana inrangtak a marvân ngeva remi legion 12 kakhe ajōngtir pek sik eng ti hi manhret mak che mo?

⁵⁴ Tâk khanga achang inchu hinga kasōk sik tia Ṭong intheng taleihri kha heikhong mo hui akatlung sik?”

⁵⁵ Khava pha Jesu’n mipuihei hneng, “Dân kajuimak inkhat kasur sik kapōa chemjâm leh sung inthōa kei kasur akahong chei mo? Ani tina bek-inna in-ong enga kalei manthei chei; aleisur mak chei.

⁵⁶ Tâk hihei seng hi sânkathem he’n ṭong inthenga antamazet kha huitlungna sik a akasōk jo kae,” ati. Khava sōa sonlehei seng in ama andahlona katlân jo hei.

Jesu Upa Rup-hei Hmaikunga

⁵⁷ Jesu kasur hei khan Thempu Kalen Caiaphas inna anṭhōi jo, khana khan Dân ojahei leh Sehmang-Pachong le’ntûp hei.

⁵⁸ Thempu kalenpen lâmte katlunga Peter khan inkârjap a ahei jui. Lâmte shunga kasea heimo kasōk sik enhnōm jâra mikahrunghei kâra va’n-onga kae.

⁵⁹ Thempu kalenhei leh Sehmang-Pachong he’n Jesu thatna sik maleiseia sâkhi anleijong;

⁶⁰ tâk mi katamtak hmating heikasōk heia adikmakna anhri ravâng, inkhatbek hmutor mak heia kae. Hnungpena mi 2 hmating kahong heia

⁶¹ “Hiva mi hin, ‘Pathen Bek-inn hi kaṭhet a ni 3 sō leh avea kasaksōt tor sik’ ati,” anhei ti.

⁶² Thempu Kalen kha kangira Jesu hneng, “Nakadōia anmaherna che hi heite masôn mak hei tin che mo?” ati.

⁶³ Tâk Jesu chu kadai hngera leika-om. Thempu Kalen khan ahnenga, “Akahring Pathen rahminga tûn hâksêrna thōia kada che kae: namanthei sik unga kader che kae: nang Pathen Sapa, Messiah nachang inchu amanthei roh?” ati.

⁶⁴ Jesu’n amasôn, “Nang in khanga nahri jo. Khana nankhenga kahri pek chei kae: tuna inphut Mihring Sapa kha Akahratpen ama changting a’n-ong leh marvâna sumtuk chunga ajōng ṭum kha nanhmu sik!”

⁶⁵ Hi atheia Thempu Kalen kha apōn akei hlera, “Pathen hmumasina ṭong ahri jo! Sâkhi katamtak rangei mak jo! Ama’n Pathen hmumasina ahri kha tûntak khan nanthei jo!

⁶⁶ Heimo nanmandon?” ati hei. Anmani’n anmasôn, “Ama aṭhe jo, akathi nger sik kae.”

⁶⁷ Khava pha anmani’n ahmai anmachi thlōna ankaben jo; ama inben hei khan

⁶⁸ ander, “Messiah, keini sik a sânsōt roh! Tu mo nakavōk kha hri roh!” anti.

Peter in Jesu Ahri manhlem

⁶⁹ Vânga lâmtea Peter kha in-onga aleiomlai Thempu Kalen sōknu inkhat ahnenga kahonga, “Nang um Galileea Jesu leh le’nṭhōi chei,” ati.

⁷⁰ Tâk ankhenga hmaikunga leihnōm mak. “Nang in heimo nahri manhret mak eng,” tia amasôn,

⁷¹ khana ama kha lâmte heihlutna kekot a kasōk jo. Alak sōknu inkhat in ahmua khava hmun a ka-om pasehei hneng “Ama hi Nazareth Jesu leh a’nṭhōi hei kae,” ati.

⁷² Avea Peter in hnōm mak a aleimasôn, “Kei khōmâk kasâm kae mipa kha manhret mak eng.”

⁷³ Pha bongkhat sōa khava hnenga akangir pasehei Peter hneng kahong hei. “Kadiktak a nang ankâra inkhat che kae. Hei-achanga, naṭong jôm hin nang amalâr che!” anti.

⁷⁴ Khava pha Peter in ati, “Kei intep eng, akadik kahri kae! Kadikmak inchu Pathen in akarâk rasoh! Mipa kha manhret mak eng!” Khava laitak ârkhōng hong kakhōng jo,

⁷⁵ khana Peter in Jesu ṭong: “Âr akhōng mak hma, vōi 3 manhret mak eng nati sik eng kae,” aleiti kha amandonsōt jo. Ama kasesōt a inhnaktak a vakaṭap jo.