MARK 14 - LEKHARABU INTHENG (BSI)

Jesu Dōina Ṭōnmantluk

¹ Tûn hi Rakan Kût leh Che philo Buhlom revei tlona sik ni 2 mak hma kae. Thempu kalenhei leh Dân oja he’n Jesu kha marûk a surna sik khana thatna sik ahlam anleijong.

² Anmani’n anti, “Hiva rehōi shunga hinchu tlohêr mak rih, akinchu mipui inhnokna hong ka-om khâk sik.”

Jesu Bethany a Thai Antamanthi

³ Bethany khōa kaphâr karôn Simon inna Jesu kha leika-om. Jesu’n bu aleisâk lai, nuhmei inkhat nard reipâr-tui vânga insyem mankatamtak thai marim katui alabaster kōk kasip phet ahei choia kahong. Amanu’n thaibôm kha avōkkhōia marim katui kha Jesu luchunga aleisun pek.

⁴ Khava hmun a mi ṭhahrep hei chu anhnuk kana joa khat leh khat inbektō heia anti, “Thai marim katui manhmang hi heimo ahnemna?

⁵ Hivahi dangka 300 kakhea nijōr theia kae khana sêr kha sarahei hneng pek thei kae.”

⁶ Tâk Jesu’n ati, “Amanu abinga dahlon ruh! Heisa mo ama nantamanrim? Nuhmeinu hin ṭōn kaṭhatak inkhat kei sik a atlo jo kae.

⁷ Sarahei chu nan-ompuisap ṭhak sik hei, nangni’n nanmadu pha rakip a nan-inthōpui thei hei. Tâk kei chu ahei tik a nangnihei leh omsap mak min.

⁸ Amanu hin atorhrep kha atlo kae; thai marim katui kataksa chunga akano hi ka’nvûm sik amak hma inrinna sik a atlodek jo kae.

⁹ Tûnchu, kaman chênpek chei kae raleichung pumpuia ṭong kaṭha anhrina hmun rakip a, aṭōn tlo hi amanu mandonsōtna a’nhri sik jo kae.”

Judas in Jesu Pek sōt sik Akahnōm

¹⁰ Khava sōa sonle 12 hei kâra Judas Iscariot intipa khan mikut a Jesu apek sōt theina sik thempu kalenhei hneng leikasea kae.

¹¹ Anmani’n aṭong kha anthei pha katlai jo hei, khana ahnenga sêr pek sik a intep jo hei. Khava jâra Judas khan Jesu kha pek sōt theina sik hlam inkot ajong joa kae.

Jesu’n Asonlehei Rakan Kût Thlai Asâkpui hei

¹² Che philo buhlom revei kani hma-inkei ning, Rakan Kût hme sik kemōngte that ning kania, Jesu sonle he’n ander, “Rakan Kût sâklôm tlona sik khon mo akase unga kantamantluk sik namadu?”

¹³ Khava pha Jesu’n asonlehei kâra 2 atir heia hinga amanthei hei, “Nangni khōpuia son se ruh, khana tuibe indom mi inkhat in a’ntōpui sik chei. Ama kahnung kha

¹⁴ ahlutna inn katlung jui ruh, inn kapupa hneng, ‘Oja khan kasonlehei leh kei Rakan Kût sâklôm tlona sik innden kha khomo?’ ti ruh.

¹⁵ Khava pha ama’n inn chungden kalentak, manhlengsa leh mantluksa inkhat amanhmu sik chei, khana khan heirakip eini sik a nantamantluk sik kae.”

¹⁶ Sonle he’n andahlona khōpuiting kase jo hei, khana Jesu’n amanthei hei kapōa heirakip anvahmu jo; khana Rakan Kût sâklôm tlona sik anmantluk jo.

¹⁷ Khōhlei ahongtluk jo pha Jesu’n asonle 12 hei leh kahong jo hei.

¹⁸ Anmani’n dokhâng chunga ansâklai, Jesu’n ati, “Kahri pek chei kae, kei leh akasâksap inkhat in mikut chunga apek sōt sik eng kae.”

¹⁹ Sonlehei kha anmalung kadong jo, inkhat bânna inkhat in ahnenga der anphut jo, “Kei natina eng khet chu changmak nu, kachang mo?”

²⁰ Jesu’n amasôn hei, “Nangni 12 kâra inkhat kachang sik, thleng shunga kei leh buhlom inporsap inkhat hi kae.

²¹ ṭong intheng in ahri kapōa, Mihring Sapa kha akathi sik kae; tâk Mihring Sapa kapesōt sikpa kha heituk a ṭitpek aka-om jo mo! Ama sik a chu ale’ntet hêrmak inchu kaṭha jôk sik a kae.”

Rōngpu Jân-thlaisâk

²² Anmani’n ansâklai, Jesu’n buhlom har kha aloa, manpâkna derna aneia, ahar akhōia asonlehei hneng apek hei, “Inlo ruh, hivahi kataksa kae,” ati.

²³ Khava sōa ama’n kōklei inkhat aloa, Pathen manpâkna aneia anhnenga apek hei; ankhenga khana inphut an-ina kae.

²⁴ Jesu’n ati, “Hivahi mi katamtak sik a akalōng kathisen, Pathen intepna chunga mêrchîkna katatna thisen kha kae.

²⁵ Kahri pek chei kae, Pathen Rengram a juther kha ka-inmak kârseng hiva ju hi in nôk mak jo ning.”

²⁶ Khava sōa anmani’n hla inkhat ansak a, Olive Tlâng ting kase jo hei.

Jesu’n Peter Inphe sik Ahri sōt

²⁷ Jesu’n anhnenga ahri, “Nangni nankhenga katlânsōt sik chei khana nandahlon sik eng, ajârchu ṭong intheng in ati, ‘Pathen in kemōng kakhempa kha athat sik, khana kemōnghei kha inchekpet sik hei.’

²⁸ Tâk kei hi kahringa keimatho kachangsō leh Galileea nanhma a leikase sik eng.”

²⁹ Peter in amasôn, “Alak-hei seng in andahlon che’num ke’nchu dahlon hêrmak che ning.”

³⁰ Jesu’n Peter hneng ati, “Kahri pek che kae, tuning jân ârkhōng in vōi 2 akhōng mak hma vōithumtak kei hi manhret mak eng nati sik kae.”

³¹ Tâk Peter in inhnakchet a amasôn, “Nang leh nithisap sik achang inum, khanga chu tihêr mak ning!” Khana sonle ankhenga in-ang et a khanga anti et a kae.

Jesu’n Gethsemanea Derna anei

³² Anmani Gethsemane inti hmun khan kahong jo hei; khana Jesu’n asonlehei hneng ahri, “Derna kaneilai hinahin le’n ong ruh.”

³³ Ama’n Peter, James leh John aleiṭhōi hei. Inrimna leh inrengna achunga jōng katlung jo,

³⁴ khana anhnenga ati, “Kamalung inrim reia thina khop kachang jo. Hinahin om-una inrin ṭhak ruh.”

³⁵ Ajingte kahladet a kasea, raleia inbok a, a-ethei sik inchu khava inrimna pha kha achunga asōk makna sik a ader.

³⁶ Ama’n ader, “Apa, Kapa! Nang sik a chu heirakip kae theipet. Hiva inrimna kōklei hi keia inphut alosōt pek roh. Kha’num kei lungdo changmak sona, nang lungdo chang rasoh.”

³⁷ Khava sōa ama hong inlea sonle 3 hei kha anleikaje kha avahmu hei, ama’n Peter hneng, “Simon, nang akaje che mo? Pung khatbek sik a’m kahara om torlo che mo?

³⁸ Khana anhnenga ati, “Inrin ṭhak ruh, mathlemna nantlâk makna sik der ruh. Rathla’n chu amadu, tâk taksa chu katlasama kae,” ati.

³⁹ Ama ave nôk a kasea ahri mama kha avader nôk a kae.

⁴⁰ Khava sōa asonlehei hneng hong inle nôk a anleikaje kha avahmu hei; anhmit leimahlângtor mak heia kae. Khana ahnenga heimo hri sik leimanhret mak hei.

⁴¹ Vōithum tlukna ahong inle pha ama’n anhnenga ati, “Nangni tûn katlung alakaje cheia châm ala’nhnga chei mo? Katluk jo! Pha kha kahong jo! Enruh, mihring Sapa kha mikaset-hei ratha neina shunga inpek sōt jo.

⁴² Thōi ruh, eini se jo rih. Enruh, anikapek sōt sikpa kha hin ka-om jo!”

Jesu Antasur

⁴³ Jesu’n khanga ṭong ahrilai, 12 hei kâra Judas kha hong katlung jo. Ama leh inṭhōia mipuihei kha chemjâm leh sung inthōa thempu kalenhei leh Dân ojahei khana upahe’n anhongtir jo hei.

⁴⁴ Akapek sōtpa khan mipuihei kha mêrchîkna inkhat apek hei: “Ke’n akabeng kamajôp sikpa kha nanta madupa kha kae. Sur ruh khana hrung kaṭha inna keisōt ruh.”

⁴⁵ Judas aheitlung lim leh Jesu hneng kasea, “Oja,” atia avamajôp jo.

⁴⁶ Khana anmani’n Jesu ansur jo khana ankhit tlit jo.

⁴⁷ Tâk ahnenga kangir mi inkhat in achemjâm aradok a, Thempu Kalen sōkpa kōr atuk mathlâk pek jo.

⁴⁸ Khana Jesu kaṭongsōt a anhnenga ati, “Nangni dân kajuimak kasur sik kapōa chemjâm leh sung inthōa kei kasur akahong chei mo?

⁴⁹ Ani tina nangni leh ka-omsap mea Bek-inna kamanthei chei, kei aleisur mak chei. Tâk Ṭong intheng kha akatlung nger sik kae.”

⁵⁰ Khava sōa sonlehei seng in andahlona katlânsōt jo hei.

⁵¹ Pōn innem rōk kasi rether inkhat in Jesu kha aleijui. Anmani’n ama kha sur sik a anleirei,

⁵² tâk ahruipōn kha adahlona arōksaia katlânsōt jo.

Jesu Sehmang-pachonghei Hma Antakei

⁵³ Khava sōa anmani’n Jesu kha Thempu Kalen inna ankei jo; khana khan thempu kalenhei seng leh upahei khana Dân ojahei le’ntûp hei.

⁵⁴ Peter in inkârjap a ahei jui, Thempu Kalen lâmte shunga leikahlut a kae. Khana khan ama akahrunghei leh le’n-ongsap heia hmei anlei ô-a kae.

⁵⁵ Thempu kalenhei leh a’ntûp upahei seng in Jesu that theina sik ajâr anjōnga kae, tâk inkhatbek hmumak hei.

⁵⁶ Jesu dōina maleisei sâkhi katamtak anhri, tâk ansâkhi thuhming inkhatbek le’ntōk mak a kae.

⁵⁷ Khava sōa mi ṭhahrep kangirsōt heia Jesu dōina hiva maleisei sâkhi hi anleipek:

⁵⁸ “Hiva mipa hin, ‘Hiva mihring tasak bek-inn hi ke’n kaṭhōt sik, khana ni 3 sōa mihring tasakmak inkhat ke’n kasak sik,’ ati kha keini’n kanthei.”

⁵⁹ Kha achang ravâng anmani kha’m anthuhming hri mantōktor mak heia kae.

⁶⁰ Thempu Kalen kha anhma kangirsōt a Jesu ṭong ader, “Anmani’n nang dōina sâkhi antapek hi masôn mak tin mo?”

⁶¹ Tâk Jesu’n sip aleitia ṭong inkhatbek leihri mak. Avea Thempu Kalen khan ader nôk, “Nang hi vângṭhat kachen Pathen sapa Messiah che mo?”

⁶² Jesu’n amasôn, “Kae eng, khana Mihring Sapa kha Akahratpen changting in-onga khana marvân sumtuk leh inṭhōia ajōng ṭum kha nankhenga nanhmu sik.”

⁶³ Thempu Kalen khan apōn akei hlera ahri, “Eini’n sâkhilak rangei mak jo me!

⁶⁴ Pathen ahmu masina nangni’n nanthei jo. Heimo nantamandon?” Ankhenga ama hnōm mak jo hei: anmanṭhe jo khana akathi sik kae anti jo.

⁶⁵ Ṭhahrep in Jesu machithlōn anphut jo, ahmai ankatōmpek a anvōk jo, “Sânsōt roh! Tu mo nakavō,” anti. Khana akahrung he’n anṭhōisōt a angambe ankabena kae.

Peter in Jesu Manhret mak eng Ati

⁶⁶ Sumpuk hnōia lâmtea Peter in-onga aleiomlai, Thempu Kalen sōk nuhmeihei kâra inkhat anhnenga kahonga kae;

⁶⁷ sōknu khan Peter hmei a-o kha ahmu pha, kasang kanga a-enna ati, “Nang um Nazareth Jesu leh le’nṭhōi chei.”

⁶⁸ Tâk ama le’nphe phira ati, “Manhret mak eng, heimo nahrina manhret theimak eng.” Khana Ama kekot vângting kasōk jo. Khava phatak a khan ârkhōng hong kakhōng jo.

⁶⁹ Sōknu khan ama ahmu nôk a ahnenga akangir hei hneng khan ahri nôk, “Hiva mipa hi anmani kâra inkhat kae.”

⁷⁰ Tâk ama kha inpha phir nôk a kae. Bongkhat sōa ahnenga akangir hei khan Peter themmô anpek nôk a, “Nang anmani kâra inkhat che kae ti hi nang inlepsōt tor mak tin che; ajârchu nang Galilee mi inkhat che kae,” anti.

⁷¹ Khan chu Peter in ati, “Kei akadik kahri kae, inhâksêr eng! Akadik kahrimak inchu Pathen in akarâk rasoh! Ke’n nanta hri mipa hi manhret mak eng!”

⁷² Khava laitak a khan vōi 2 tlukna ârkhōng kakhōng joa Peter in Jesu taleihri, “Ârkhōng vōi 2 akhōng mak hma nang in vōi 3 manhret mak eng nati sik kae,” aleiti kha amandonsōt jo. Khana ama malung kana tak a kaṭap joa kae.