LUKE 7 - LEKHARABU INTHENG (BSI)

Jesu’n Rome Ṭōnkarôn Inkhat Sōkpa Amandam

¹ Jesu’n mihei hneng hiseng ṭong ahrisō pha, Capernaum ting kase jo.

² Sōk marittak kanei Rome ṭōnkarôn inkhat leika-om; asōkpa kha kana hêra thi rong ati jo.

³ Ṭōnkarônpa khan Jesu chungchâng ṭong athei pha, asōkpa kha amandamna sik Jesu kabek Jehudi upa ṭhahrep aleitir hei.

⁴ Anmani Jesu hneng kahong heia malung kahluttak a anva-ngek: “Hiva mipa hi na’nthōpui sik rahōi kasōk.

⁵ Ama’n nimi alungset hei, khan chu ama khet in kan-intûpna sik innpui inkhat asak pek unga kae.”

⁶ Khava jâra Jesu anmani leh inṭhōia kase jo, Jesu’n inna inphut kahlatak a ase mak hma, ṭōnkarônpa khan aloihei ahei tir heia hinga ahong manhri hei: “Apu, nabinga bōina inpek mak jo roh, nang ka-inna nahong sik hi kei rahōi changmak.

⁷ Khan chu nahnenga kei kahong sik hi’m karahōi changmak. Kasōkpa damna sik ṭongpek rōk kha eipe roh, kadam sik.

⁸ Ke’m ratha kanei inkhat thōia ka-om eng, khana kathōia sepei ka-om hei. Ke’n hiva mi inkhat hi ‘Se roh!’ tia ṭong kapek pha ama kase; khan chu ke’n inkhatpa so, ‘Hong roh!’ tia ṭong kapek pha kahong, khana kasōk hneng ‘Hi tlo roh!’ kati pha atloa kae,” avamanti hei.

⁹ Jesu’n hiva ṭong hi athei pha adet-hla joa, akahnung kajui mipuihei a-en manve bit heia anhnenga: “Ke’n kahri pek chei kae, hiva mipa taksen kapō hi Israelhei kâra kapha’m lahmu hêrmak eng,” ati.

¹⁰ Tirlehei kha ṭōnkarônpa inna inle jo hei, khana sōkpa kha leikadam jo.

Jesu’n Renghmeinu Sa Amanhring

¹¹ Khava sō bât a Jesu’n Nain inti khōpui inkhat a leikase; asonlehei leh mipui katamtak in ama anleijui.

¹² Ama’n khōpui sōngkot aphâk pha, kathi kahre sik a mi he’njôksōt heia kae. Hmeithai inkhat in sapa inkhat rōk anei kha leikathia kae, khōpuia mi katamtak anu leh he’nṭhōi heia kae.

¹³ Rōngpu’n amanu kha ahmu pha amalung shunga lungsetna kasip a, amanu hneng, “Ṭap mak roh,” ati.

¹⁴ Khava sōa ama kasea akalōng kha avasit a, khana a’ndom hei kha kangir heia, Jesu kaṭongsōt a, “Rether, thōi roh kati che kae,” ati.

¹⁵ Akathipa kha in-onga kaṭong inphut jo, khana Jesu’n anu hneng ama kha apek male jo.

¹⁶ Mi rakip ankhenga ṭitna kasip sō jo hei, khana anmani’n Pathen anmanpâk a, “Sânkathem kalentak inkhat nihnenga jōng inlâr jo, amihei kahuk sik a Pathen akajōng jo kae,” anti.

¹⁷ Hiva Jesu chungchâng ṭong hi ram pumpuia leh ram kimvea inthangsō jo.

Tui Inhlutpa John Tlângvahei

¹⁸ John sonle he’n ama chungchânga heirakip ahnenga anhri jo. John in ankâra mi 2 hei abek heia,

¹⁹ Rōngpu hneng, “John in mi inkhat akajōng sik ati kha nang che mo a-emak leh mihlop inkhat kantalahngâk sik mo?” tia ṭong kader sik a atir jo hei.

²⁰ Anmani Jesu hneng anhong pha, “John in mi inkhat akajōng sik ati kha nang che mo, a-emak leh mihlop kantalahngâk hi sik mo, vader ruh tia ama’n ahei tir ung kae,” anti.

²¹ Khava laitak khan Jesu’n mi katamtak annatna, anhri rôn, rathla kaṭhamak karôn leh hmitkacho hingja amandam heia kae.

²² Ama’n ṭongkarônhei amasôn hei, “Nangni’n nantahmu leh nantathei hei hi inle una John hneng vahri pek ruh: hmitkacho’n khō ahmu, ke katlek in ke achoi, kaphârhei intheng hei, kōr kaset in anthei, akathi kahringa keimathōia ka-om hei, khana sarahei hneng ṭong kaṭha kha inhria kae.

²³ Kei chungchânga inkei-chiona kaneimak kha mahâm kaṭha kae,” aleitipek hei.

²⁴ John tirlehei khan andahlonsō pha, Jesu’n mipuihei hneng khan ama chungchâng ṭong ahri inphut a: “Nêrdiram thōia John hneng nangni nanse pha khan heimo nanvahmu sik tia a’nhōr chei! Thli tasêm manhling phi innok mo?

²⁵ Hei ka-en sik a mo akase chei? Ret kaṭha a’nvon mi inkhat ka-en sik a mo? Kadiktak a ret kaṭha a’nvon heia inṭhatsaktak a ka-om hei khachu reng-innpuia aka-om hei kae?

²⁶ Heimo va-en sik tia avakase chei? Eimanthei ruh! Sânkathem inkhat mo? Kadik, sânkathem inkhat kanek a akakhe chet inkhat nanva hmua kae.

²⁷ Ajârchu ṭong intheng in ahri, ‘Kaṭong karôn, nahlamkot inhlang sik mi inkhat nahma ke’n katir sik’ tia Pathen in ahri kha John hi kae.”

²⁸ Jesu’n ahrisa, “Kahri pek chei kae, mihring rakip kâra John hi akalenpen kae. Tâk-kha Pathen Rengram a akasinpen khan John kanek a kalen jôk sik a kae.”

²⁹ Mi rakip in aṭong anthei: anmani hei leh akarôn pena ramsêr kaṭheihei khan Pathen tamadu dikna ṭong kha anleijuia John in tui aleimanhlut jo hei.

³⁰ Tâk-kha Phariseehei leh Dân oja he’n Pathen lungdo kha rahlâng mak heia John in tuimanhlut atlo sik kha leihnōm mak hei.

³¹ Jesu’n ahri manjōm a, “Tûnchu ke’n tûnlai mihei hi, hei leh mo katekâk sik hei? Anmani heimo antapō?

³² Anmani keithea naipang in-ong kapō hei kha kae. Rup khat he’n rup khat an-ôn heia, ‘Keini’n hmōiṭhōina bunglir mahring kantumpek chei, tâk lâmmak chei! Keini’n ṭajai suina hla kansak, tâk ṭap mak chei,’ anti.

³³ Tui Inhlutpa John kha bu leh ju ahngōia kajōng, khana nangni’n, ‘Ama ratha kaṭhamak anei,’ nanti.

³⁴ Mihring sapa khan bu asâk a tui a-in kha nangni’n, ‘Enruh, hiva mi hi mi kalôp leh ju ka-in kae khana ramsêr kaṭhei leh mikasehei ṭhōn kae!’ nanti.

³⁵ Kha achang ravâng Pathen singna kha tu achang inum akalo rakip sik a kadik a inlâra kae.”

Pharisee Simon Inna Jesu

³⁶ Pharisee inkhat in Jesu bu kasâk sik a abek a kae. Jesu kasea a-innshunga bu kasâk sik a in-ong jo.

³⁷ Khava khōpui shunga khan omchen kadikmak mikaset nuhmei inkhat leika-om. Amanu khan Pharisee inna Jesu’n bu asâk ti ṭong athei pha alabaster inti thai marim katui peng inkhat kasip phet ahei choi.

³⁸ Jesu kahnungting kahonga ake thōia kaṭap a ahmit rathli vâng ake kha amanchora, asam vâng ahni manhisō pha amajôp a, thai marim katui kha abun thlōna kae.

³⁹ Jesu kabek Pharisee khan ahmu pha, abinga amalunga ati, “Hiva mipa hi sânkathem takkhet achang inchu ataksa kasit omchen kadikmak nu hi, tu achang aleimanhret sik kae.”

⁴⁰ Jesu ama hneng kaṭonga, “Simon, heikhat kahri pek sik che ka-om,” ati. Ama’n, “Ôk, oja amanthei roh,” ati.

⁴¹ Jesu’n aphut a, “Mikahao inkhat a inphut sêr kapûk mi 2 leika-om hei. Inkhatpa’n dangka 500 abat, khana inkhat in 50 abat.

⁴² Inkhatbek inum male tor mak jo hei, khava jâra an-inhnibât kha abângpek jo hei. Kho jôk khan mo ama alungset chet sik?” ati.

⁴³ Simon in amasôn, “Kei tamandona akatamdet arangei mandampa khan.” Jesu’n ati, “Nang kadik che.”

⁴⁴ Khava sōa ama nuhmeinu langting inhea Simon hneng ati, “Hiva nuhmeinu hi nahmu mo? Kei na-inna kahong enga, kake sôpna sik tui apek mak che, tâk amanu’n ahmit rathli vâng kake arasia asam vâng ahni manchâra kae.

⁴⁵ Nang in majôp pum a aleiratōmak che, tâk amanu’n chu kaheihlut a inphut bânglo jena kake amajôp a kae.

⁴⁶ Nang in kalua ka’nthi sik shahrik heite leimantluk mak che, tâk amanu’n kake thai marim katui vâng amajuia kae.

⁴⁷ Khava jâra ke’n nang kamanthei che kae, amanu setna katamtak rangei mandam pek jo kha hiva alungsetna kalen vâng hin amalâr jo. Tu enum akatlômtek rangei mandam jo mi khan hei-achang inum akasintek a lungsetna amalâr kae.”

⁴⁸ Khava sōa nuhmeinu hneng khan Jesu’n, “Nasetnahei inngei indam jo che,” atia kae.

⁴⁹ Dokhânga a’n-ong buthleng ka-ô ralak-hei khan anbinga, “Setna kapha arangei mandam tor hi, tu jo mo?” anti.

⁵⁰ Tâk-kha Jesu’n nuhmeinu hneng, “Nataksen in ahuksōt jo che; kamōnga se jo roh,” ati.