LUKE 5 - LEKHARABU INTHENG (BSI)

Jesu’n Sonle Hma-Inkeihei Abekna

¹ Ni khat Jesu’n Gennesaret dîr panga kangira leika-om khava pha mihe’n Pathen ṭong inngei sik ahnengting kahong hei.

² Dîr panga rakōng 2 ankei mankea a-om kha ama’n aleihmu. Nga kasur mihei khan andahlon heia anlenhei kha anleisôp hei.

³ Simon rakōng shunga ama kahlut a tuipanga inphut ajing jōngnam mathlâk sik a ṭong aleipek. Khana Jesu kha rakōng chunga in-onga mipuihei kha aleimanthei heia kae.

⁴ Ama’n ṭong ahrisō pha, Simon hneng, “Rakōng kha tui inthûknating tôr manhlutdet una, nang leh naloi he’n nanlen kha vor ruh,” ati.

⁵ Simon in amasôn, “Oja, keini’n jânsôt inhnaktak a len kanvor ravâng heite surmak ung, kha’num nang in nati jâra, vor rong.”

⁶ Anmani’n anlen anvora anlen inhlervet leoa nga hingja ansur jo.

⁷ Khava pha anmani’n anloihei, rakōng hlop a hei kha an-inthōpui sik a anbek jo hei. Khana anmani kahong heia anrakōng 2 kha nga kasip joa tui in akachûm vetvet jo.

⁸ Simon Peter in omchen kasōk kha ahmu pha, Jesu ke hma inkuna, “Rōngpu, kei mikase eng kachang jâra keia inphut asesōt pek jo roh,” atia kae.

⁹ Anmani’n nga katamtak ansur jâra ama leh a’nṭhōipui he’n inlak hêra anmandona kae.

¹⁰ Simon Peter sap changpui Zebedi sahei Jacob leh John in inlak hêra anmandon. Jesu’n Simon hneng, “Ṭimak roh, tuna inphut nangni’n mi nantasur sik hei kae,” ati.

¹¹ Anmani’n rakōnghei kha tuipang tlânga ankei mankea heirakip andahlona Jesu kahnung anjui jo.

Jesu’n Kaphâr Karôn Inkhat Amandam

¹² Pha khat a khōpui inkhat a Jesu leika-om, khava hmun a khan kaphâr karôn mi inkhat leika-om. Ama’n Jesu ahmu pha, ahmai kunga va-inkuna angêk a, “Apu nang in nahnōm inchu, namantheng tor eng,” ati.

¹³ Jesu’n akut akalânga asit a, “Ke’n kahnōm, intheng roh,” ati. Khava laitak khan mipa kaphâr kha intheng jo.

¹⁴ Jesu’n ama ṭong apek, “Hivahi tûte hneng hrimak roh, tâk thempu hnenga vasehrek roh, ama’n enmanchên che rasoh. Khana tûnchu intheng jo che ti hi mihei manhretna sik Moses ṭongpek inthoina kha vatōk roh.”

¹⁵ Achang ravâng Jesu ṭong kha inhnakchet a inthang joa, aṭong inngei sik leh akanahei amandam sik a mipui ahnenga kahong jo hei.

¹⁶ Tâk-kha ama chu ram daihngerna hmun a akader sik leikasesōt jo.

Jesu’n Lang kangōi Mi Inkhat Amandam

¹⁷ Ni khat ama’n mi amanthei lai hei, Jerusalema inphut leh Judea ram a inphut khana Galilee ram a inphut Phariseehei leh dân oja ṭhahrep khava hmun a khan le’n ong heia kae. Khana mi kanahei kha amandamna sik Rōngpu ratha hratna khan Jesu aleiompuia kae.

¹⁸ Mi ṭhahrep in lang kangōi mi inkhat a jena leh anhei kazon a Jesu hnengtak a manjena sik anmandona, innshunga hlut sik a inrei hei.

¹⁹ Tâk-kha mipui antamrei jâra inn phuchungting ankadoma phuchung ankaphet manvea ankârtak a Jesu hmaikunga a jena leh anjōng makhei maṭhuma kae.

²⁰ Jesu’n anmani taksen kha ahmu pha, mipa hneng khan, “Kaṭhōn, nasetnahei rangei mandam jo che kae,” ati.

²¹ Khava pha Pharisee leh dân ojahei khan anbing kâra anhri manphut a, “Pathen teilo tûte’n setna rangei mandam tor mak! Hinga Pathen dōina ṭongkahri ama hi tu mo kae?” inti hei.

²² Jesu’n antamandon kha amanhret a, anhnenga ahri, “Heisa mo khanga nantamandon?

²³ ‘Nasetnahei inngei indam jo che,’ a-emak leh ‘Ngir inna lôn roh,’ ti hi kho jôk mo akabei?

²⁴ Mihring sapa’n raleichunga rangei mandam torna ratha anei ti nangni’n nanmanhret torna sik ke’n kaman chênpek sik chei kae,” ati. Khava jâra ama’n lang kangōipa hneng, “Ke’n kahri pek che kae, thōi inna najena inlo inna se jo roh!” ati.

²⁵ Khavatak khan ahmai kunga a jena kha a’nloa Pathen achoi ka-âna a-innting kase jo.

²⁶ Anmani seng in inlak ansak hêr jo. Anṭit pum a Pathen anchoi ka-âna, “Tuninga nihmu hei hi heituk a a’nlak jo mo!” anti.

Jesu’n Levi Abek

²⁷ Khava sōa Jesu kasesōt a, arahming Levi inti ramsêr ṭheina hmun a a’n-ong ahmua, Jesu’n ahnenga, “Ajui roh!” ati.

²⁸ Levi kangirsōt a heirakip adahlona akahnung ajui jo.

²⁹ Khava sōa Levi’n Jesu sik a revei kalentak inkhat a-inna atloa, ramsêr kaṭheihei leh mi katamtak le’nvei hei.

³⁰ Khana Phariseehei leh dân oja he’n sonlehei hneng ander hei “Heisa mo ramsêr kaṭhei leh mikase ralak-hei leh thlai nantasâk sap?”

³¹ Jesu’n amasôn hei, “Mi kadam hei sik a doctor rangei mak, tâk mi kanahei sik a arangei.

³² Kei mikadik-hei malung thlengna sik ankabea akajōng changmak eng, tâk mikasehei sik akajōng eng kae.”

Buhngōi Chungchânga Ṭongder

³³ Khana anmani’n Jesu hneng ander, “John sonlehei leh Pharisee sonle he’nchu thlai anhngōi ṭhak a derna annei ria kae; tâk nasonle he’nchu thlai hngōi loa ansâk a an-ina ka-om heia kae.”

³⁴ Jesu’n amasôn hei “Hmōiṭhōi reveina hmun inkhat a hmōipa’n aloi khōhmehei kha a-ompui lai seng anmani’n bu anhngōi sik tia nantamandon mo? Hngōimak hei ning!

³⁵ Tâk-kha hmōipa kha anmania inphut ṭhōisōtna pha lahong ka-om sik, khava pha kha leh anmani’n bu antahngōi sik kae.”

³⁶ Jesu’n hiva ṭong tekâk hi’m amanthei hei: “Tute’num pōn marōa rabek sik a pōnther har keihler phungmak. Ama’n kha atlo’nchu, pōnther kha akeihler sik jo, khana pōnther kha pōn marō leh inmat mak ning.

³⁷ Khan chu tûte’num shavunpeng hmangsa jo shunga juther daphung mak. Ama’n kha atlo’nchu juther khan apeng kha atumkhōi sik a kha ju kha kajung sik, khana shavunpeng kha’m inset sik jo.

³⁸ Khava jâra juther kha shavunpeng ther a da sik kae!

³⁹ Khana jumarō ka-in jo mi tûte’n juther madu mak hei. Ama’n ‘Jumarō katui jôk’ atia kae.”