LUKE 17 - LEKHARABU INTHENG (BSI)

Setna

¹ Jesu’n asonlehei hneng ati, “Mihringhei set-tlâkna sik omchen akasōk sik a ka-om, tâk khava omchen insō mi sik a khan heituk a ṭitpek aka-om jo mo!

² Ama’n hiva naipang kasinhei setna amathlâk sik hei kanek a chakri hlung kalentak inkhat arînga makheia tui-ôngpuia hlon manhlut kha ama sik kaṭha jôk.

³ Khava jâra nantatlo kha en kaṭha ruh! “Nansōpui in setna atlo jo’nchu, manse ruh, khana ama’n amalung athleng inchu rangei mandam ruh.

⁴ Ama’n ni khat shunga nanchunga setna vōi 7 atloa, atlo akaia amalung athlenga nanhnenga, ‘Insir eng’ ahong ti’nchu, nanta rangei mandam nger sik kae.”

Taksen

⁵ Sonle he’n Rōngpu hneng anleihri, “Kantaksenna amankhang pek roh.”

⁶ Rōngpu’n amasôn hei, “Nangni’n anṭamhmu rehrep taksenna nannei inchu, hiva thingkung hi, arajunga inlirsōt inna tui-ôngpui shunga va’nling roh, nanti’num nanṭong ajui sik kae.

Sōk Inkhat Ṭōn

⁷ “Nangni kâra mi inkhat in hlei kakhōi a-emak leh kemōng kakhem sōk inkhat aneia kae. Sōkpa kha hleia inphut inna ahong tlung pha, inrangtak a bu asâkna sik nanta manthei sik mo?

⁸ Timak tin chei, khava kanek a nangni’n ahnenga, ‘Kabu sâk sik mantluk roh, nakhōn khit ina, kasâk ka-in hi ahngâk hi roh; khava sō leh nang in nasâk na-inthei sik,’ timak tin chei mo?

⁹ Sōk khan ṭongpek kha ajui jâra manpâk sik sōk mak, akasōk mo?

¹⁰ Kha leh nangni in-anghrep chei; tlo sik a manthei seng kha nantlosō leh, ‘Eini hi angaia sōk-hrep loi me kha kae; tlo sik hrep kha nitlosōt kae,’ ti ruh.”

Jesu’n Kaphâr Karôn 10 Amandam

¹¹ Jesu’n Jerusalem kajōna asena Galilee leh Samaria ramri ting aleihroa kae.

¹² Khana khō inkhat a ahlut-lai kaphâr karôn mi 10 leh intō hei. Anmani kahlajap a kangir heia

¹³ rasa inhnaktak a ka-ông hei, “Oja, Jesu! keini alungset roh,” anti.

¹⁴ Jesu’n ahmu hei pha anhnenga aleiti, “Se una thempuhei hneng nangni nanbinga va’nlâr ruh,” ati. Anmani hlam a anselai le’ntheng jo hei.

¹⁵ Ankâra mi inkhat in, ama a’ntheng jo kha ahmu pha, akahnung inlehrek nôk a, rasa inhnaktak a Pathen achoi ka-ân jo.

¹⁶ Khana ama Jesu ke hma inkuna amanpâk a kae. Ama kha Samaria mi inkhat leikachang.

¹⁷ Jesu’n ati, “Mi 10 a’ntheng hei changmak mo? Mi 9 hei kha khon mo aka-om jo hei?

¹⁸ Heisa mo hiva khōhmepa rōk hin ahong inlea Pathen manpâkna ahongnei?”

¹⁹ Khana ama hneng ati, “Thōi inna na-inna se jo roh, nataksen in amandam jo che” ati.

Rengram Ajōng Katlung sik

²⁰ Pharisee ṭhahrep in Jesu hneng Pathen Rengram kha heitik mo ajōng katlung sik anleider. Ama masônna kha, “Pathen Rengram kha hmit a hmutheia ajōng katlung sik changmak.

²¹ Heijâra mo niti’nchu Pathen Rengram kha tûte’n ‘Enruh, hin ka-om, son ka-om,’ ati mak sik kae; ajârchu, Pathen Rengram hi nankâra aka-om kae.”

²² Khava sōa ama’n asonlehei hneng ati, “Nangni’n Mihring Sapa kanikhō inkhat kha nanhmu hnōmna pha hong ka-om sik, tâk hmutor mak tin chei.

²³ Khana mihe’n nanhnenga, ‘Enruh, son ka-om, a-emak leh, enruh, hin ka-om,’ anti sik. Tâk-kha semak ruh, va-en mak ruh.

²⁴ Ajârchu khō a’nphe pha marvân rakir inkhat tinga inphut inkhat katlunga avâr in ara-âng mathlung kapōa, Mihring Sapa kani ning khan khanga kati sik a kae.

²⁵ Achang ravâng ahma inkeia inrengna katamtak alade nger sik, khana tûnlaia mihe’n antahnōm mak sik kae.

²⁶ Noah kanikhō laia kapōa, Mihring Sapa kani kha’m kati sik.

²⁷ Noah rakōnga ahlutmak kârseng mihe’n ansâk, an-ina, nuhmei-pase lu anhonga kae, khana tuishâng ahonglen pha, ankhenga athat jo hei.

²⁸ Khava kapōhrep a Lot kanikhō lai kha’num, anmani’n ansâk an-ina anrachôk a, anjōra, anlinga, innhei ansak a leika-om hei.

²⁹ Tâk-kha Lot in Sodom khōa inphut asesōt ning khan hmei leh kât marvâna inphut jōng insun inthla a ankhenga athatsō jo hei.

³⁰ Khava kapōa Mihring Sapa ajo’nlâr ning khanga akachang sik kae.

³¹ “Khava ning khan a-inn chunga ka-om mi khan innshunga aneinâk kalo sik a ṭummak rasoh; khava kapōa hleia ka-om mi kha inna he’nle mak rasoh.

³² Lot nuhmei kha mandonsōt ruh!

³³ Tu enum ahringkhō kahuk sik karei mi khan amanhmang sik, tâk tu enum ahringkhō inhmang mi khan ahuk manhring sik.

³⁴ Ke’n kahri pek chei kae, khava ning jân khan, jekhum inkhat chunga mi 2 kaje sik hei, inkhat inlo sik, inkhat indahlon sik.

³⁵ Nuhmei 2 sâng ansuksap sik, inkhat inlo sik, inkhat indahlon sik.”

³⁶ Nuhmei 2 hleia ṭōn anleitlo sik: inkhat inlo sik, inkhat indahlon sik.

³⁷ Sonle he’n ander, “Rōngpu khonting mo?” Jesu’n amasôn hei, “Kathi kalōng omna hmun a hmuthong intûp sik hei.”