LUKE 11 - LEKHARABU INTHENG (BSI)

Jesu’n Derje Aman theina

¹ Pha khat a Jesu’n hmun inkhat a aleider. Ama’n achai jo pha, asonle inkhat in ahnenga, “Rōngpu, John in asonle amanthei hei kapōa keini derna amanthei roh,” ati.

² Jesu’n anhnenga, “Nander pha hing’hin ti ruh: ‘Apa: Narahming intheng kaja om rasoh. Narengram jōng tlung rasoh,

³ Ani katai kantasâk khopna ape roh.

⁴ Kanchunga dikmak katlo rakip hei kanrangei mandam hei jâra, kansetna hei arangei mandam roh. Khana enmansinna inhnak shunga khan aṭhōimak roh.’”

⁵ Khana Jesu’n asonlehei hneng, “Nangni kâra inkhat in aṭhōn inkhat inna jân ṭhangṭima avasea ahnenga, ‘Kaṭhōn, buhlom pheng 3 lim leipûk rong.

⁶ Ajârchu khōhme kalôn kaṭhōn inkhat ka-inna hong katlunga asâk sik leh apōn pek sik heite neimak jo eng,’ ava ti.

⁷ Nanṭhōnpa khan innshunga inphut ahei masôn sik tia mandon ruh, ‘Akachok mak roh! Kot inkirsō jo, kasahei leh kaje jo ung, ṭhōisōt tor mak jo ning, heite petor mak jo che ning.’

⁸ Kaṭha jo, abân kha heikhonga? Ke’n kahri pek chei kae, aṭhōn nachang jâra khana ama athōisōt a buhlom kha avapek mak che’num, derna kha na’nzakmak jâra, ama kathōisōt sik a kha namadu rakip kha avapek sik jo che.

⁹ “Khava jâra ke’n nanhnenga kahri kae; der ruh, nanrahlâng sik; jong ruh, nanhmu sik; kot raki ruh mahlang pek kachang sik chei.

¹⁰ Ajârchu akader rakip khan anrahlâng sik, akajong hei khan anhmu sik, kot inki mi rakip sik a mahlang pek sik kae.

¹¹ Nankâra pahei kâra inkhat in, nasapa’n nga ader che pha mari napek sik mo?

¹² Achangmak leh ârtui ader che pha aipui napek sik mo?

¹³ Nangni nanṭhatmak inum nansahei hneng neinâk kaṭha pekje nanmanhret. Marvâna ka-om nanpa rarap khan chu akader hei hneng Rathla Intheng kha heituk kakhea ajōng pek sik hei mo!”

Jesu leh Beelzebul

¹⁴ Jesu’n akaṭong theimak ṭai inkhat aleihnongsōt; ṭai kha asesōt pha, mipa kha kaṭong inphut jo. Mipui he’n andet-hla hêr jo.

¹⁵ Tâk-kha ankâra ṭhahrep he’n, “Ama’n ṭaihei hi, anhlam kakei Beelzebul in ratha apek a ahnong sōt hei kae,” anti.

¹⁶ Alak he’n ama man-ôk theina sik, Pathen in ahnōm pek ti malârna ṭōn-inlak atlo sik a anleider.

¹⁷ Tâk-kha Jesu’n anmani mandonna kha amanhret a anhnenga, rengram abinga indōitōa a’nsemṭhen rakip ngirsôt mak ning; innshung inkhat abinga indōitōa a’nsemṭhen kha ahar-hara katlu sik.

¹⁸ Khava jâra Seitan rengram kha rup khat leh rup khat an-indōitō a-enchu, heikhong mo akasôt akangirtor sik? Beelzebul in ratha apek eng jâra ṭaihei kahnong sōt hei kae nanti.

¹⁹ Ke’n khanga kahnong sōt he’nchu, nangni kajui he’n heikhong hmen antahnong sōt hei? Nankahnung kajui kalen he’n nanṭhe jo tia anmalâr jo.

²⁰ Changmak, ke’n Pathen ratha hratna vâng jôk a ṭai kha kahnong sōt hei kae, hivahin Pathen rengram kha nanhnenga kajōng jo ti hi amanchên jo kae.

²¹ “Mikahrat inkhat ahmangchâk rakip vâng a’ntluk pha a-inn kha ahrunga, anei rakip ahrung kaṭha heia kae.

²² Tâk-kha ama kanek a ratha kahrat chet inkhat in abuhlua ator jo pha, a’nngamna hmangchâk seng achomsōtpek jo khana aleimanbuk seng kha asemṭhenpek jo.

²³ “Tu enum kami aka-emak kha anikadōi khet kae; akakhôm intûp a ani kabôm mak kha akachai inchek kae.

Rathla Kaṭhamak Ahe’nle Nôk

²⁴ “Rathla kaṭhamak kha mi inkhat a inphut asesōt pha, inhngatna sik hmun inkhatbek avahmu mak jo pha, abinga inbek a, ‘Ka-inna khan inle nôk sik eng,’ ati.

²⁵ Khanga inlea inn kha inthengseng leh inne jena avahmu.

²⁶ Khan chu ama kasesōt a ama kanek a akaṭhamak chet ṭai 7 avaṭhōi hei, khana kahong heia ka-om jo hei. Khava sōa khan chu khava mipa omje kha hma kanek a akaṭhamak chet kachang joa kae.”

Hōina Kadiktak

²⁷ Jesu’n kha ahrisō pha, mipui kâra inphut nupui inkhat heikaṭongsōt a Jesu hneng, “Nang intetnu, nang kaveinu kha heituk a akahōi sik jo mo!” ati.

²⁸ Tâk-kha Jesu’n aleimasôn, “Khava nek a, Pathen ṭong katheia akajuihei kha heituk a akahōi sik hei mo!” ati.

Ṭōn-inlak Antamadu

²⁹ Mipui katamtak in Jesu ankakebit pha, ama’n ahrisa, “Tûnlaia mihei hi heituk a akaṭhamak hei mo! Anmani’n ṭōn-inlak anjong, tâk Jonah ṭōn-inlak tei loa alak inpek mak jo hei ning.

³⁰ Nineveh mihei sik a Jonah sânkathem kha mêrchîkna inkhat achang kapōa, tûnlaia mihei sik a Mihring Sapa hi mêrchîkna inkhat akachang sik kae.

³¹ Ṭongtan Ning tûnlai pha mihei maset kapek sik a Sheba Rengnu ahong kangirsōt sik kae, ajârchu amanu’n aram a inphut hlam ajōng hroa Solomon singna inngei sik a kahong; khana kahri pek chei kae Solomon kanek a akalen chet kha hin ka-om.

³² Ṭongtan Ning Nineveh mihei ahong kangirsōt heia antamaset sik chei kae, ajârchu Jonah ṭong kha anthei pha anmalung anleithleng; khana kaman chênpek chei kae, Jonah kanek a akalen chet kha hin ka-om.

Taksa Vâr

³³ “Tu mo inkhat in thaihmei adet pha leh thup phungmak a-emak leh hrai makhusi mak; khava kanek a, mi ahong kahlut he’n avâr kha anhmuna sik amatungna chunga amatunga kae.

³⁴ Nantaksa sik a nanhmit hi thaihmei kapō kae; nanhmit vâr a’ntheng lai seng nantaksa pumpui akavâr kae; tâk nanhmit aset jo pha nantaksa pumpui akajing sik kae.

³⁵ Khava jâra nanshunga vâr ka-om kha ajing makna sik insing thei ruh.

³⁶ Nantaksa pumpui kha vâr asipphet inchu, nantaksa rakir inkhatbek jingmak, thaihmei vâr inkhat in ara-âng manvâr kapōa heirakip akavâr sik kae.”

Jesu’n Phariseehei leh Dân Ojahei Amaset

³⁷ Jesu’n ṭong ahrisō pha, bu sâkpui sik a Pharisee inkhat in ahongbek a kae; khava jâra ama kasea akasâk sik va’n-ong jo.

³⁸ Jesu’n busâk hma akut asôpmak kha Pharisee khan amanhretsōt pha adet-hla joa kae.

³⁹ Khava jâra Rōngpu’n ahnenga, “Tûn nangni Pharisee chei’n kōklei leh thlenghei avângting chu nankanôt mantheng, tâk nanshungting chu innâk-inse tlona sik leh ṭhatmak kasip phet chei.

⁴⁰ Eh mikamohei! Avâng kasyem Pathen khan ashung kha’m asyem changmak mo?

⁴¹ Tâk-kha kōklei leh thleng shunga ka-om neinâk-hei kha sara hneng pek hei ruh, khan chu heirakip beklanga intheng sik jo.

⁴² “Nangni Pharisee sik a heituk ṭitpek aka-om chei mo! Nangni’n reihing, lenghum, patikhôm, apha-pha a anse-hleina sem sôm chu nanpek, tâk Pathen sik a ṭongtan kadik leh lungsetna chu donmak chei. Alak he’m heisakmak tlo loa, hihei hi nantatlo sik kha kae.

⁴³ “Nangni Pharisee sik a heituk ṭitpek aka-om chei mo! Intûpna inna in-ongna mantlukpek sik chei leh jōrtlânga mi takamuk sik chei nanmadu.

⁴⁴ Heituk ṭitpek aka-om chei mo! Nangni hi a’nhmusōt mak thlânkhur, mihe’n manhret loa achunga lôn lelena antanei kapō chei kha kae.”

⁴⁵ Dân oja inkhat in ahnenga, “Oja, nang in hi nahri hichu keini’m inzak napek ung kae,” ati.

⁴⁶ Jesu’n amasôn, Nangni Dân ojahei sik a’m heituk a ṭitpek aka-om chei mo! “Nangni’nchu mihei ṭhōm chunga phur kahrik nanmanrôn hei tâk nangni’nchu phur kha kadom puina sik nankutpâr bek um keisō mak chei.

⁴⁷ Nangni sik heituk ṭitpek aka-om chei mo! Nanpu nanpa sōnhei taleithat khet sânkathemhei sik thlân kaṭhatak a nansyem pek hei.

⁴⁸ Nanpu sōnhei taleitlo kha nangni’n nanmanchên jo ti hi kahnōm cheia kae; anmani’n sânkathemhei kha anleithat hei, khana nangni’n anthlân nansyem pek heia kae.

⁴⁹ Khava jâra Pathen Singna khan ati, ‘Ke’n sânkathemhei leh sonle kajōngtir pek sik hei; ṭhahrep anleithat sik hei khana ṭhahrep ansuk manrim sik hei,

⁵⁰ Ralei insyembia inphut a sânkathem thatsōt rakip hei jâra tûnlaia mihei hi karâk sik hei kae,

⁵¹ Hmun Intheng leh maichâm kâra antathat hei, Abel a inphut Zechariah katlunga anthat hei jâra. Kadik, kahri pek chei kae, anmani hei seng jâra tûnlai mihei hi karâk sik hei kae.

⁵² “Nangni Dân ojahei sik, heituk a ṭitpek aka-om chei mo! Nangni’n manhret theina kot mahlângna chabi kha nanchoi: khana nangni nanbinga’m hlutmak chei, khana hlut rung kati hei kha’m nankhâr heia kae.”

⁵³ Jesu’n khava hmun kha adahlonsō pha, Dân ojahei leh Pharisee he’n rahnaktak a hrimaset anphut jo, khana ṭong katamtak ander joa kae,

⁵⁴ heikhat ahri ṭhena a-omtâk leh châng man-ôkna sik leh surna sik hlō anphut joa kae.