LUKE 10 - LEKHARABU INTHENG (BSI)

Jesu’n Mi 72 Atirsōt

¹ Khava sōa Jesu’n mihlop 72 akadei heia ama sena sik khōpui rakip leh hmun rakip a mi inhni-hnia ahmating anleise sik a atir hei.

² Ama’n anhnenga ati, “Sâng ât sik katamtak ka-om, tâk akakhôm sik mi katlôm hei. Sâng kapupa’n akakhôm sik mi ajōng tirna sik hei ahnenga der ruh.

³ Se ruh! Kahnehei kâra kemōng kapōa ke’n nangni katir chei kae.

⁴ Sêrkōk, mârsha, kekōk rônmak ruh; hlam a mi chibei tlona sik ngirmak ruh.

⁵ Khova hmun achang inum, nanhlutna inna, hma inkeitak a ‘Hiva inna lung mōngna om rasoh,’ ti ruh.

⁶ Khana khan lung mōngna indu mi a-om inchu, nanlungmōng chibei kha ahnenga omṭhak rasoh; kha a-emak inchu nanlung mōngna chibei kha losōt male ruh.

⁷ Nanhlutna inna khan sâk leh in sik antapek chei kha sâk una, in-una om ruh; ajârchu ṭōnkatlo mi kha ahlō a’npek sik kae. Inn inkhat a inphut inn inkhat a inthon lele mak ruh.

⁸ Khōpuia nanhlutna rakip a anleirahlâng che’nchu, nanhma antadônpek chei kha saruh.

⁹ Khava khōpui shunga akanahei kha mandam hei ruh, khava mihei hnenga, ‘Pathen rengram kha nanhnenga jōng kahnai jo,’ tipek hei ruh.

¹⁰ Tâk-kha khōpuia nahlutna rakip a anleirahlâng mak chei inchu, hlampuia sesōt una hinga hri ruh,

¹¹ ‘Nanhlampuia vaiphin kankea kakop hi nankadōi sik a kankathing mathlâk pek chei. Tâk-kha Pathen Rengram nanhnenga jōng kahnai jo, mandon ruh!’ ti ruh.

¹² Ke’n kahri manchên kae, Ṭongtan Ning Sodom kanek a khava khōpui tade kha a’ntak jôk sik kae.”

Akataksenmak Khōpuihei

¹³ “Eh Chorazin, nang sik heituk ṭitpek ka-om che mo! Eh Bethsaida, nang sik um heituk ṭitpek ka-om che! Nangni hneng ṭōn-inlak ale’ntlo hei kha Tyre leh Sidona ale’n tlo’nchu, hmalai khan anmi he’n ansetna inphut anhong inhe malârna sik in-ong heia, pōnse ansia, vaiphin inthek khum sik jo hei!

¹⁴ Ṭongtan Ning Pathen maritna kha nangni kanek a Tyre leh Sidon chunga amalâr jôk sik kae.

¹⁵ Eh Capernaum, nang sik a’m! Marvân katlunga indom inshâng hnōm che mo? Nang hmeikhura hlon mathlâk sik che kae!” ati.

¹⁶ Jesu’n asonlehei hneng ahri, “Tu enum nanṭong inngei kha kei ṭong inngei kae; nankahlon kha kei kahlon kae; khana kei kahlon kha anijōng katirpa kahlon kha kae.”

72 hei He’nle

¹⁷ Mi 72 hei inpâktak a he’nle jo hei. Anmani’n “Rōngpu, keini’n narahminga ṭaihei ṭong kanpek hei pha kanṭong anjuia kae!” anti.

¹⁸ Jesu’n amasôn hei, “Ke’n mar-vâna inphut khō inphe kapōa Seitan ajōngkatla kahmu.

¹⁹ Rangei ruh, ke’n nangni mari leh aipui hei chunga ke choitorna sik, Indōipuipa ratha neina rakip chunga torna sik khana heite’n asukset makna sik chei ratha neina kapek jo chei.

²⁰ Tâk-kha rathla kaṭhamak he’n nanṭong anjui jâra inpâk mak ruh, khava kanek a marvân chunga nanrahming a’nzet inhlut jâra inpâk jôk ruh.”

Jesu Ningṭhat

²¹ Khava phalaitak khan Jesu Rathla Intheng in inpâkna amansip joa ahri: “Eh Apa, marvân leh ralei Rōngpu! Kamanpâk che ajârchu akasing leh akathemhei hnenga naleithup kha heite inhret mak hei hneng namanhmu jo heia kae. Kadik Apa, hivahi akasōk sik a naleimadu kha kae.

²² “Ka-Pa’n heirakip apek jo eng: Pa teilo tûte’n Sapa kha manhret mak, khana Sapa leh Sapa’n ama inlârsōt sik a akadeisōt jo mihei tei loa tûte’n Pa kha manhret mak hei.”

²³ Khava sōa Jesu asonlehei hneng inheia anbing rōk hnenga ahri: “Hiva nantahmu hei hi nanhmuthei jâra heituk a mahâm kaṭha jo chei mo!

²⁴ Ke’n kahri pek chei kae reng leh sânkathem katamtak he’n nangni tahmu kha anhmuhnōm, tâk leihmu tor mak hei, nangni tathei kha antheihnōm, tâk leithei tor mak hei.”

Samaria Mikaṭhapa Ṭong Tekâk

²⁵ Jesu ka-ensin sik a dân oja inkhat hong kangirsōt a ader, “Oja, kumsôt hringna kaneina sik ke’n heimo katlo sik?”

²⁶ Jesu’n amasôn, “Ṭong intheng in heimo ahri? Heikhong mo nang in namalesōt?”

²⁷ Mipa khan amasôn, “‘Na-Rōngpu na-Pathen kha, namalung, narathla, nahratna leh namandonna akhenga lungset roh’; khana ‘Nabinga na’nlungset kapōa, nakhō naven lungset roh.’”

²⁸ Jesu’n amasôn, “Naṭong masôn kadik, khanga tlo roh, kahring sik che.”

²⁹ Tâk-kha dân oja khan abinga akadik achanghnōm jâra, Jesu hneng ader, “Tu mo kakhō kaven?”

³⁰ Jesu’n amasôn, “Mi inkhat Jerusalema inphut Jerichoa kasesuk a mikachom he’n anbuhlua, apōn leh ader anlosōt pek a, anvōk nenga, akathi kapōa andahlon jo.

³¹ Khanga leikasōk jo, thempu inkhat khava hlam a khan kajōng; ama’n mipa kha ahmu pha hlampeting kase jo.

³² Khava kapō Levi inkhat um kajōnga mipa kha ava-en, hlampang khat ting apea khanga adahlon jo.

³³ Tâk-kha Samaria pase inkhat khava hlam kha aheihroa mipa kha avaratō jo, ama’n mipa kha ahmu pha alungset hêr jo.

³⁴ Ahnenga kasea, a’ntônna sungbi hei kha thai leh ju asunthlōnpek a akatōmpek jo; khava sōa ashakor chunga amanchōnga hme tlungna inna aṭhōia kaṭha nenga arazen jo.

³⁵ Jîngkâra ama’n dangka 2 alosōt a hmetlung inn katintapa kha apek a, ‘Ama hi kaṭha leirajen roh. Kei kaho’nle pha leh, achunga namanhlut seng kha ke’n kamale sik che,’ ati.

³⁶ Khana Jesu’n achaina ader, “Hiva 3 hei kâra tu kha mo mikachom hei tavōkpa sik a akhō-aven akachang sik a namanhōi?”

³⁷ Dân oja khan amasôn, “Ama inlungsetpa kha kae.” Khava pha Jesu’n amasôn, “Khan chu nang se ina khang’khan vatlo roh.” ati.

Jesu’n Martha leh Mary Avaphak hei

³⁸ Jesu leh asonlehei hlam a khanga anleisena, ama’n khō inkhat a kahlut a Martha inti nuhmei inkhat in a-inna aleimathlung a kae.

³⁹ Martha nainu arahming Mary inti leika-om, ama’n Rōngpu kehmatak a in-onga aman theina kha aleirangei.

⁴⁰ Martha chu aṭōn tlo sik rakip jâra kachâm jo; khava jâra ahnenga kahonga, “Rōngpu, kanainu’n heirakip kabing rōk a ṭōn amantlo eng hi adonmak tin che mo? Kei inthōpui ahongna sik ahei hripek roh,” ati.

⁴¹ Rōngpu’n amasôn, “Martha, Martha! Nang neinâk katamtak chunga inrim che khana kabōi jo che,

⁴² tâk madu rangeipen inkhat ka-om. Mary in akadik kha akadeisōt jo, ama a inphut inlosōt mak jo ning.”