LUKE 1 - LEKHARABU INTHENG (BSI)

Ṭonghlamsât

¹ Lungset Theophilus: Nikâra akasōk omchen rakip ṭong mazet sik a mi katamtak in antor chen a antlo jo.

² A’nphutbia inphut omchen rakip akahmu leh aṭong kahri inthangle he’n keini antamanthei ung kha anmani’n antamazet kae.

³ Khava jâra Eh Theophilus! nang sik a, anphutbia inphut omchen kasōk rakip abân bâna kaṭhatak a ke’n kajongsuia kaheimazet sik che hi kaṭha sik tia kamandon.

⁴ Nang kalei manthei che omchen pui katluk dikna rakip hei kha namanhret theina sik a hi katlo kae.

Tui Inhlutpa John Intet sik A’nhrisōt

⁵ Judea ram a Herod reng changlai hiva omchen kasōk rakip hi ale’nphut kae. Abijah thempu sōa abân bâna thempu kachang arahming Zechariah inti inkhat leika-om. Alômnu rahming, Elizabeth inti; amanu hi’m thempu innshunga mi inkhat kae.

⁶ Anmani 2 Pathen hmit-hmua mikaṭhahei kae, khana Rōngpu ṭongpek leh dân rakip pui katluk a kajuihei kae.

⁷ Elizabeth akaching achang jâra anmani’n nai neimak hei. Khana ansanghrama kater hêr jo hei.

⁸ Zechariah thempu inkhat achang dungjuia, ni khat ama pha chen ning kani leikasōk joa Pathen hmaikunga aṭōn aleitloa kae.

⁹ Ti chu thempuhei ngai dungjuia maichâm chunga marim katui akaro inkhut sik kadeina vâng an-en pha, ama chunga katla a anleikadei jo. Khava jâra Rōngpu Bek-inn shunga ama kahlut a,

¹⁰ marim kahōi maichâma avarolai, mipuihei kha vânga derna anneia leika-om hei.

¹¹ Marim katui ro mankhutna maichâm changting panga khan Rōngpu ngeva inkhat ahnenga jōng inlâra kangira ka-om.

¹² Zechariah’n ama kha ahmu pha amalung inrima kaṭi jo.

¹³ Tâk-kha ngeva khan ahnenga ati, “Zechariah, ṭimak roh! Naderna kha Pathen in athei pek jo che; nalômnu Elizabeth in sapa inkhat amatet pek sik che. Nang in arahming, John nati sik kae.

¹⁴ Ama a’ntet pha nang leh milak katamtak ama jâra heituk nanning akaṭha a a’npâk sik jo chei mo!

¹⁵ Ama kha Rōngpu hmit-hmua akalen inkhat akachang sik kae. Ama’n vomhrui ju leh kahu inhnak inmak ning. Ama anu shunga ajōng intet sōlima inphut Rathla Intheng akasip sik kae.

¹⁶ Ama’n Israel mi katamtak Rōngpu an-Pathen hneng aheiṭhōi male sik hei.

¹⁷ Sânkathem Elijah kapōa ratha kaneitak leh kangar tak a Rōngpu hma akase sik kae. Ama’n pahei leh sahei aṭhōi manchun nôk sik hei; ṭong inngeimak mihei khan, dikna hlam anmandonna sik aṭhōi male sik hei; khana Rōngpu mihei kha Rōngpu sik a ama’n amantluk sik hei kae.”

¹⁸ Zechariah khan ngeva hnenga, “Kei leh kater jo enga, khana kanuhmei um kater joa, achang inchu ke’n heikhong mo kamanhret sik?” ati.

¹⁹ Ngeva khan amasôn, “Kei Pathen hmaikunga akangir Gabriel eng kae, hiva ṭong kaṭha hi akahri pek sik a ajōngtir eng kae.

²⁰ Tâk hiva kaṭongrôn aphahrep a ajōng katlung sik hi taksen mak che. Nang in khavakha nataksenmak jâra akaṭong theimak sik jo che kae; ka ṭongtep hi kadik a ajōng tlung mak kârseng akaṭongsōt theimak sik jo che kae.”

²¹ Khava pha mipuihei khan Zechariah kha Bek-inn shunga kasôttak a-om jo jâra anmalung kadonga vânga khan anhngâk a leika-om hei.

²² Khana ama ahei sōk pha ṭongsōt theimak jo, khana ama’n Bek-inn shunga hmangtalâr inkhat ahmu kachang sik ti hi anmani’n anmanhret jo. Ama aṭongsōt theimak jo jâra akut vâng a’nbekpui jo hei.

²³ Bek-inn shunga asepa razen kha a’nchai jo pha, Zechariah a-innting inle jo.

²⁴ Anuhmei Elizabeth kha pha bongkhat sōa achung hong kahrik jo, khana amanu’n thla 5 vâng sōkloa inna leika-om.

²⁵ Elizabeth in ahri, “Tûn hnungreng tōa Rōngpu’n kei a’nthōpui enga, hing’hin sa neiloa mipui kâra kalei inzakna kha alosōt pek jo eng.”

Jesu Intet sik Hrisōtna

²⁶ Elizabeth chunghrikna thla 6 sōa Galilee ram a Nazareth inti khōpui inkhat a Pathen in ngeva Gabriel kha ajōng tira kae.

²⁷ Reng David sōna pase inkhat arahming Joseph intipa nuhmei sik a ṭong intep nuhngâk intheng hneng ngeva khan ṭong inkhat ajōng rôn pek. Amanu rahming kha Mary inti.

²⁸ Ngeva khan Mary hneng kajōnga ahri, “Namalung mōng rasoh! Rōngpu’n nang a-ompui che khana mahâmṭhat kalentak a apek che!”

²⁹ Ngeva ṭongrôn khan Mary kha amalung inrim hêr jo, khana heitina jo mo tia adet-hla jo.

³⁰ Ngeva khan ahnenga ati, “Mary, ṭimak roh! Ajârchu Pathen in amarit che.

³¹ Nang nachung hong kahrik sik chea kha sapa inkhat namatet sik, khana arahming Jesu nati sik kae.

³² Ama hong kalen sik khana A’nshângpen Pathen Sapa a’nti sik kae. Rōngpu Pathen in ama apusōn David kapōa reng inkhat amanchang sik,

³³ khana ahei tik a Jacob sōnhei reng akachang sik kae, arengram kha inhmangtik omak ning.”

³⁴ Mary in ngeva hneng, “Kei nuhngâk intheng inkhat eng kae. Heikhong mo kha akachang thei sik?” ati.

³⁵ Ngeva khan amasôn, “Rathla Intheng nachunga kajōng sik khana Pathen ratha hratna nachunga jōng inhnga sik a kae.

³⁶ Nasōpuinu Elizabeth mandon roh. Amanu sa kaneimak ale’nti kae; tâk tûn ater joa achang inum, nai avona thla 6 katluk jo.

³⁷ Ajârchu Pathen tatlohla heite om mak.”

³⁸ Khana Mary in, “Kei Rōngpu sōknu eng kae, nahri kapōa kachunga chang jo rasoh,” ati. Khana ngeva khan adahlon jo.

Mary in Elizabeth Avaphâk

³⁹ Khava sō bât a Mary kha Judea ram a tlâng khōpui inkhat a sik a intluk a inhnottak a kase jo.

⁴⁰ Ama Zechariah inna kasea Elizabeth chibei avatloa kae.

⁴¹ Chibei atlo kha Elizabeth in athei pha ashunga nai kha inhlinga kae. Elizabeth kha Rathla a akasip achang jâra,

⁴² rasa inhnaktak a ahrisōt, “Nuhmei kâra mahâm kaṭhanu! Nanei sik nai kha amahâm kaṭha!

⁴³ Ka-Rōngpu nu’n kei ajōng phâk eng, heisik a mo hiva akalentak omchen hi kei hneng akasōk sik?

⁴⁴ Ajârchu nachibei rasa kathei lim leh, kashunga naite hi inpâk a inthok a kae.

⁴⁵ Nachunga Rōngpu ṭong kha hui katlung sik tia akataksen nang, heituk-hrep a mahâm kaṭha jo che mo!”

Mary Choi ka-ânna Hla

⁴⁶ Mary in ahri; “Rōngpu kha kamalung in achoi ka-ân,

⁴⁷ kakahuk inhring Pathen jâra karathla inpâk,

⁴⁸ ajârchu ama’n asōk thōi katla pennu amandonsōt enga kae! Khan chu tuna inphut mi rakip in mahâm kaṭhanu anti sik jo eng,

⁴⁹ Akahratpen Pathen in ṭōn kalentak atlopek eng jâra. Ama rahming chu intheng;

⁵⁰ khang inkhat a inphut khang inkhat katlunga, ama kajana kanei rakip hneng alungsetna amalâra kae.

⁵¹ Ama’n mi inlensak-hei leh anṭōn mantluk heirakip vor kachekna sik a, abân ratha kahrat kha ahmanga kae.

⁵² Ama’n reng kalenhei kha anlen in-ongna inphut akei mathlâk hei, khana a’nhnemhei kha akadom manshâng heia kae.

⁵³ Ama’n von kaṭâm hei kha akaṭha neinâk vâng anvon amankhop pek hei, khana akahaohei kha kut karōk a atirsōt hei.

⁵⁴ Ama’n nipu nipi sōnhei leh aṭong intepna kha ajui, khana asōk Israelhei inthōpui sik a kajōng.

⁵⁵ Maritna kha Abraham hnenga leh asōn rakip hnenga ahei tik a malâr sik kha amandonsōt a kae!”

⁵⁶ Mary kha thla 3 kapō Elizabeth leh ka-omsap a khava sō leh a-innting inle jo.

Tui Inhlutpa John Intet

⁵⁷ Elizabeth nainei sik pha hong katlung jo, amanu’n sapase inkhat amatet jo.

⁵⁸ Akhō-aven leh a-innkō he’n Rōngpu kha heituk-hrep a amanu sik a akaṭha jo mo ti kha antheia, ankhenga amanu leh inpâksap jo hei.

⁵⁹ Naite kha kani vekhat atluk pha avun tan sik a kahong hei, khana anmani’n arahming kha apa rahming anloa Zechariah phō sik a anmandon.

⁶⁰ Tâk-kha anu’n, “Changmak, arahming kha John a’nti sik kae,” ati.

⁶¹ Anmani’n ahnenga, “Tâk-kha khava rahming kha nanphung mi tûte’n leirôn mak chei,” anti.

⁶² Khava pha apa hneng naite kha heirahming mo arôn sik a namadu tia anvader.

⁶³ Zechariah khan mazet theina hlungpek inkhat ader hei khana “Ama rahming John kae” tia amazetsōt a kae. Anmani’n heituk a inlak antasak jo mo!

⁶⁴ Khava phatak a khan Zechariah kaṭongsōt thei jo, khana ama’n Pathen amanpâk manphut jo.

⁶⁵ Khō leh ven hei seng kaṭisō jo hei, Judea tlângram senga hiva ṭong hi inthangsō jo.

⁶⁶ Aṭong kathei rakip in, “Hiva naite hi heitâk mo ahong kachang sik?” antia anmandon et a indertō hei. Ajârchu Rōngpu rathla hrâtna khan a’nthōpui kha inchêna anleihmua kae.

Zechariah in Asânsōt

⁶⁷ John pa Zechariah kha Rathla Intheng kasip phet a Pathen ṭong aleihri:

⁶⁸ “Eini’n Israel Pathen Rōngpu kha choi ka-ân rih! Ama amihei inthōpui sik a kajōnga khana amasō jo hei.

⁶⁹ Ama’n eini torna kanei huksōtpa inkhat apek jo me, asōk David sōn kae.

⁷⁰ Ama’n hmalaia a’ntheng sânkathemhei hnenga ale’ntep

⁷¹ khachu eini inrepui heia inphut, eini kahōt hei ratha hratna inphut ahuk sik me.

⁷² Ama’n nipu-nipa sōnhei hneng maritna amanhmu sik, khana aṭongtep intheng kha amandonsōt sik aleiti.

^73-74 Nipa-nipuhei sōn Abraham hneng ṭong hing’hin aleitep, ani-inrepui heia inphut ahuksōt sik me kha le’ntep khana ṭitna kasea ama nirazen sik kha ahnōm pek me

⁷⁵ hivahi nihring lai seng ahmai kunga a’ntheng leh akadik nichangna sik a kae.

⁷⁶ “Kasa, nang, A’nshângpen Pathen sânkathem a’nti sik che kae. Ahlam hro inhlengsōt sik a Rōngpu hma akase sik che kae,

⁷⁷ amihei kha ansetna inphut rangei mandam heia huk sik hei kae ti hi navahri pek sik hei kae.

⁷⁸ Ni-Pathen hi lungset kasip leh malung innem kae. Ama’n eini chunga hukmanhringna khō ajōng manvâr sik

⁷⁹ khana thina daihlim thōia ka-om rakip hei chunga marvâna inphut ajōngsat manvâr sik, lung mōngna hlam a nikethon ensuina atlo sik.”

⁸⁰ Naite kha taksa leh rathla hong kakhanga hong kangar jo, ama Israel mipuihei hneng a’nlârmak kârseng nêrdiram thōia leika-oma kae.