LEVI-DÂN 9 - LEKHARABU INTHENG (BSI)

Aaron in Inthoina Atōk

¹ Mantheng sōtna rōi kha anchai joa ajîng kania, Moses’n Aaron leh asapahei khana Israel hlamkakeihei kha aleibek hei.

² Ama’n Aaron hneng ati, “Sehrat chere inkhat leh kemōng chere inkhat nōrna kase heikei roh khana Rōngpu hneng tōk hei roh, sehrat chere khan set-inthoina sik, kemōng chere khan ro-inthoina sik kae.

³ Khava sōa Israel mipuihei kha set-inthoina sik a ke chere kum khat katluk inkhat leh ro-inthoina sik akemōng chere kum khat katluk inkhat nōrna kase anheikeina sik,

⁴ khana inlôikhômna inthoina sik sehratche inkhat leh kemōngche inkhat anheikeina sik, manthei hei roh. Khahei kha Rōngpu hneng thai leh manhei jo, hmuchi inthoina kha antatōk sik kae. Hivahi antatlo nger sik kae ajârchu Rōngpu kha anhnenga tuning a’nlâr sik kae.”

⁵ Moses ṭongpek dungjuia anmani’n heirakip Pōn-inn hma khan anheichoi jo, mipui ankhenga Rōngpu inmuk sik a khan intûp jo hei.

⁶ Moses’n ati, “Ama omna vâr kadi rik-rak kha nanhnenga a’nlâr theina sik a hihei rakip hi nantlosōtna sik Rōngpu’n ṭong hi apek chei kae.”

⁷ Khan chu ama’n Aaron hnenga ati, “Maichâma son se roh set-inthoina leh ro-inthoina kha nang setna leh mipuihei setna losōtna sik a vatōk hei roh. Rōngpu ṭongpek dungjuia mipuihei setna losōtna sik a hiva inthoina hi tōk roh.

⁸ Aaron kha maichâma kasea ama setna sik akemōng chere kha athat jo.

⁹ Asapa he’n thisen kha anheichoi pek, akutpârhei kha aphuma maichâm rakir manlia akasong heia khan ajijing akano hei, a’nhleiseng khachu amatungna kunga abun jo.

¹⁰ Khana maichâm chunga amakhei, amathin kaṭhapen ṭhen khat, Moses hneng Rōngpu ṭongpek kapōa aro jo.

¹¹ Tâk-kha aravōi leh avun khachu rephōr vânga ava roa kae.

¹² Ama binga romanvâm inthoina ran kha athat jo. Asapa he’n thisen kha ahnenga anheichoi pek, maichâm rakir manlia akathinga kae.

¹³ Anmani’n anhnenga alu anpek khana ahme antarachen kha leh maichâm chunga aro hei.

¹⁴ Khana ashung alaia hei leh kahnungtinga akehei asôp heia maichâm chunga ro-inthoina aralak-hei seng chunga aro hei.

¹⁵ Khava sōa, mipuihei inthoina kha atōk jo. Mipuihei inthoina sik keche kha akeia athat jo, ama sik set-inthoina aleitlo kapōhrep a atōk jo.

¹⁶ Ro-inthoina sik ran kha’m ahei keia sedân dungjuia atōk jo.

¹⁷ Hmuchi inthoina kha atōk a akut maja kasip inkhat jâmdi aloa maichâm chunga aro jo. (Hivahi ani kataia romanvâm inthoina chunga tōksa kae.)

¹⁸ Mipuihei sik a inlôikhôm inthoina sehratche leh kemōngche athat hei. Asapa he’n thisen kha anheichoi pek, ama’n maichâm rakir manlia akasong hei kha akathing thlōn hei.

¹⁹ Aaron in sehratche leh kemōngchehei thai kha

²⁰ sha-ôp hei chunga ada heia maichâm katlunga akadom hei. Moses ṭongpek dungjuia, maichâm chunga athai hei kha aro hei

²¹ khana thempuhei sik a a-ôp leh changtinga arakō hei kha ahlopdet kutchoia Rōngpu hneng aleipek hei.

²² Aaron in inthoina rakip kha atorsōa mipuihei chunga akut akalânga mahâmṭhat apek hei, khana jōng kaṭum jo.

²³ Moses leh Aaron kha Rōngpu omna Pōn-inn shunga kahlut hei, anhong sōksōt pha mipuihei kha mahâmṭhat anleipek hei, Rōngpu omna vâr kadi rik-rak kha mipui rakip hei hneng le’nlâra kae.

²⁴ Manhret manloa Rōngpu’n hmeihlom inkhat ahei tir, maichâm chunga ro-inthoina leh athai seng kha akâng manvâm jo hei. Mipuihei khan khavakha anhmu pha, ankhengpet a ka-ông heia anhmai raleia andima inkun jo hei.