LEVI-DÂN 7 - LEKHARABU INTHENG (BSI)

Katlen male Inthoina

¹ Hihei hi a’nthengtak katlen male inthoina dânhei kha kae.

² Hiva inthoina ran kha, romanvâm inthoina ran thatna hmun maichâm sak intonga that sik, khana athisen kha maichâm asir manlia kathek sik kae.

³ Athai seng kha losōt a maichâm chunga tōk sik: arahmeibe thai, ashung alaia thai,

⁴ amake leh akakop athai hei, khana amathin kaṭhapen.

⁵ Thempu khan athai seng kha Rōngpu hneng thlai inthoina maichâm chunga aro sik kae.

⁶ Thempu innshunga sapase rakip in ansâk thei sik, tâk hmun inthenga antasâk sik, ajârchu khavakha a’nthengtak kae.

⁷ Hinahin set-inthoina leh katlen male inthoina heia dân juisap sik inkhat ka-om: inthoina hme kha akatlosōt thempu chen kae.

⁸ Romanvâm inthoina ran vun kha akatlosōt thempu chen kae.

⁹ Hmuchi inthoina rakip ratap a, khângbea, khângpek insâ a akathei hei kha Pathen hneng akatōksōt thempu chen kae.

¹⁰ Tâk-kha sōngloa hmuchi inthoina rakip, Aaron innshunga thempuhei chen kae, in-ang et a a’nsem sik hei kae.

Inloikhôm Inthoina

¹¹ Rōngpu hnenga a’ntōk inlôikhôm inthoina dân kha hihei hi kae.

¹² Mi inkhat in Pathen hnenga inthoina hi atōk inchu, inthoina ran leh che philo buhlom leh atōksap sik kae: buhlom insâthim a-emak leh akasinhei, olive thai kano hei a-emak leh olive thai leh antamanhei jâmdia ansyem buhlom sik kae.

¹³ Khava chunga, chephi buhlom pheng hei atōksa sik kae.

¹⁴ Buhlomhei kha jât rakip a aharkhat et, ahlopdet a Rōngpu hnenga tōk sik kae; khavakha ran thisen akaloa maichâm sira inthekthlon thempu chen kae.

¹⁵ Ran hme kha inthoining khan sâk sō sik kae; ajînga jîngkâr katlunga heite indathei mak ning.

¹⁶ Mi inkhat in a’ntepna inkhat pui mathlukna a-emak leh arachamtak a inlôikhômna inthoina atlosōt inchu, khava inthoining khan akhenga sâk sō sik changmak, ajîng kania asâk theia kae.

¹⁷ Khana ni 3 ning katlunga a’nhlei hme khachu ro sik jo kae.

¹⁸ Ni 3 ning katlunga hme kha ansâk jo’nchu, inthoina kha Pathen in rahlâng pek mak ning. Inthoina kha ama ṭhatna ting inteimak ning, a’nthengmak a intei sik, khana tu achang inum khava kasâk kha ṭhena kara athōk sik kae.

¹⁹ Khana beklanga a’nthengmak heikhat in hme kha atôn inchu, khavakha sâk mak sik kae, ro manvâm nger sik kae. Beklanga a’ntheng mi khan hme kha asâk thei sik,

²⁰ a’nthengmak inkhat in asâk inchu, ama kha Pathen mi inkhat a intei theimak jo ning.

²¹ Khan nôk chu, mi inkhat in a’nthengmak mihring mo, ran mo, atônsō leh asâk inchu, ama kha Pathen mi inkhat a inlothei mak jo ning.

²² Rōngpu’n Moses hneng athōia dânhei hi aleipek hei,

²³ Israel mipuihei sik a. Se, kemōng leh kehei thai sâk mak sik kae.

²⁴ Ran angaia akathi, a-emak leh ramsha tathat hme kha sâk mak sik kae, tâk-kha ahlop-heikhat sik a hmangthei kae.

²⁵ Tu inkhat in Rōngpu hneng inthoina sik thai kha asâk inchu Pathen mi inkhat a intei theimak jo ning.

²⁶ Israel mihei khova hmun a an-om inum, va kathi, sha kathi thlaisâk a antahmang mak sik kae.

²⁷ Tu achang inum hiva dân kasuk khōi kha Pathen mi inkhat a intei theimak jo ning.

²⁸ Rōngpu’n Moses hneng dânhei hi aleipek hei,

²⁹ Israel mipuihei sik a. Tu achang inum inlôikhômna inthoina atlo’nchu, khava aṭimkhat ahlopdet a Rōngpu hneng kutchoi apek sik kae,

³⁰ akut khet a thlai inthoina avatōk sik kae. Ama’n athai hei leh a-ôp kha Rōngpu hneng ahlopdet a atōk sik kae.

³¹ Thempu khan athai kha maichâm chunga aro sik, tâk-kha a-ôp khachu thempu chen sik kae.

³² Sharakō changting kha ahlopdet a pekna inkhat a

³³ thisen leh athai katōksōt thempu hnenga pek sik kae.

³⁴ Sha ôm kha ahlopdet kutchoi kae, khana sharakō changting kha ahlopdet a Israel mipuihei tōklôm Rōngpu’n aloa thempuhei apek hei kha kae. Hivahi Israel mipui he’n ahei tik a thempuhei hneng antapek nger sik kae.

³⁵ Hivahi Aaron leh asapahei thempu ṭōna matung ninga inphut Rōngpu hnenga tōkna thai inthoina ṭhen a’npek hei kha kae.

³⁶ Khava ning khan hiva inthoina ṭhen hi anpekna sik Israel mipuihei hneng Rōngpu’n ṭong apek hei. Hivahi Israel mipui he’n aheitik chen a antajui nger sik dân kha kae.

³⁷ Hihei hi sedânhei kha kae: romanvâm inthoina, hmuchi inthoina, set-inthoina, katlen male inthoina, ṭōnhmun matungna inthoina, khana inlôikhôm inthoinahei hi kae.

³⁸ Nêrdiram a Sinai Tlâng chunga, Israel mipui he’n inthoina antōkna sik ahri pek ning hei khan, Rōngpu’n hiva ṭongpek hi Moses hneng apek a kae.