LEVI-DÂN 6 - LEKHARABU INTHENG (BSI)

¹ Rōngpu’n Moses hneng hiva chôndânhei hi aleipek.

² Tu achang inum mi inkhat in Rōngpu kadōia asukṭhe inchu inthoina inkhat asyem sik kae, khahei khachu asap Israel inkhat in neinâk aleida kha akapek male mak, mi neinâk le’nrûk, mikahōn,

³ neinâk heikhat inhmanga maleiseia hmumak eng kati.

^4-5 Mi inkhat in hinga aṭhe pha, malung intheng loa achen neinâk kha apek male sik kae. Aṭhe jo tia ansur ning khan, akapu kha katluk a apek male sik kae, akakhea sem 100 a sem 20 ahapsa sik kae.

⁶ Khana ama’n Rōngpu hneng katlen male inthoina kemōng mo, keche mo nōrna kase thempu hneng aheikei sik kae. Aman chu sedân dungjuia intep pek sik.

⁷ Thempu khan mipa setna jâra athôi sik khana ama rangei mandam kachang sik.

Pumro Inthoina

⁸ Rōngpu’n Moses hneng ṭong apek,

⁹ Aaron leh asapahei romanvâm inthoina dân inthei sik a. Romanvâm inthoina kha maichâm chunga jânsôt da sik, hmei kha jânsôt thing tia mansûk sik kae.

¹⁰ Khana thempu khan hruipōn zakkō inse leh tōka katôi a’nhak a, maichâm chunga athaivâm hei kha alosōt heia maichâm sira ada sik kae.

¹¹ Khava sōa avon kha inthleng sik a kha hmeivâm kha rephōr vângting beklanga a’ntheng hmun a achoisōt sik.

¹² Maichâma hmei kha thing ati mansûk ṭhak sik, manthi hêrmak sik kae. Jîngkâr katai thempu khan thing ati sik, khava chunga romanvâm inthoina amantluk sik, khana inlôikhôm inthoina athai kha aro sik.

¹³ Maichâma hmei kha mansûk ṭhak sik, manthi hêrmak sik kae.

Hmuchi Inthoina

¹⁴ Hmuchi inthoina dân kha hihei hi kae. Aaron innshung thempu he’n Rōngpu hneng hmuchi inthoina kha maichâm hma antatōk sik kae.

¹⁵ Khana ama’n jâmdi leh thaitui kha kut maja khat aloa, khava chunga bero ada a maichâm chunga aro sik, khavakha heirakip Rōngpu hneng intōk jo tina kae. Hiva romanvâm inthoi marim hi Rōngpu tlaina kae.

^16-17 Thempu khan a’nhleiseng kha asâk sik kae. Khavakha che philo buhlom asyema Rōngpu omna Pōn-inn sumpuk hmun inthenga asâk sik kae. Thempu chen sik a Rōngpu’n thlai inthoina inphut apek hei kae. Hivahi set-inthoina leh katlen male inthoina kapōa a’ntheng hêr kae.

¹⁸ Hivahi Aaron sōn pase he’n Rōngpu hnenga thlai inthoina tōkna inphut anchen injônjet kha ahei tik a ansâk ṭhak thei sik. Tu achang inum hiva thlai inthoina katôn rakip hiva inthengna ratha khan asukset sik kae.

¹⁹ Rōngpu’n Moses hneng dânhei hi apek,

²⁰ Aaron innshunga thempu matungna sik a. Ama ṭōnhmun a matungsōt ning, Rōngpu hneng jâmdi kilograme inkhat (hmuchi inthoina ani tina a’ntōk kapōa), aṭimkhat jîngkâra, aṭimkhat khōhleia atōk sik kae.

²¹ Khavakha thai leh manheia khângbe vâng kathei sik khana ahar-ahak a suk mandi sik khana hmuchi inthoina tōk sik, Rōngpu tlaina marim kha kae.

²² Apha rakip a Aaron sōn Thempu Kalen kachang he’n hiva inthoina hi antatlo ṭhak sik kae. Khavakha Rōngpu hnenga inthoina ro manvâm pet sik kae.

²³ Thempu inkhat in hmuchi inthoina asyem kha sâk theimak ning; akhenga ro manvâm sik kae.

Set-inthoina

²⁴ Rōngpu’n Moses hneng ṭong apek,

²⁵ Aaron leh asahei hneng set-inthoina dânhei hi mantheina sik a. Set-inthoina ran kha ro-inthoina ran thatna maichâm sak ting panga that sik kae. Hivahi a’nthengtak inthoina kae.

²⁶ Ran katōk thempu khan, Rōngpu omna Pōn-inn sumpuk, hmun inthenga hme kha asâk sik.

²⁷ Mi achanga neinâk heikhat in ran hme kha atôn inchu, khava inthengna rathahrat khan asukset sik kae. Khana pōn leh der a ranthi kha a’nno inchu, hmun inthenga khan sôp mantheng sik kae.

²⁸ Hme sōngna ralei be rakip vōkkhōi sik, sumbe thirbe achanga kanôt mantheng seng sik kae.

²⁹ Lei choina hme kha thempu innshunga pase rakip in ansâk thei sik; hivahi a’nthengtak kae.

³⁰ Tâk thisen kha Pōn-inn shunga set-inthoina sik a anchoi manhlut inchu, sâk sik changmak, ro manvâm sik kae.