LEVI-DÂN 5 - LEKHARABU INTHENG (BSI)

Inthoina Arangei Setnahei

¹ Set-inthoina arangei seng kha hihei hi kae. Mi inkhat in heikhat ahmu, athei kha sâkhi kapek sik a ṭongtan hmun a dân tak a anbek pha, athei ahmu kha ahri mak inchu, khava rahno kha arôn sik kae.

² Mi inkhat in manhret loa bekdân dungjuia a’nthengmak heikhat, ran kathi atôn inchu, ama’n amanhretsōt phatak a ama kha intheng mak jo, aṭhe jo.

³ Mi inkhat in manhret loa mihringa inphut a’nthengmak ahei kasōk heikhat achang inum atôn inchu, ama’n amanhretsōt phatak a khan akaṭhe kachang jo.

⁴ Mi inkhat in kaṭha mandon loa, hei-inkhat sik a, intepna anei inchu, amanhretsōt phatak a khan ama akaṭhe kachang jo.

⁵ Mi inkhat in aṭhe pha, asetna ahrisōt nger sik kae,

⁶ khana aset leichôina kha kemōng rala a-emak leh ke rala Rōngpu hneng inthoina sik akei sik kae. Thempu’n mipa setna jâra inthoina kha atōk sik kae.

⁷ Mi inkhat in ke a-emak leh kemōng anei tor mak inchu, set leichôi pekna Rōngpu hnenga vaṭhu 2 a-emak leh pherva 2 ahei choi sik, inkhat kha set-inthoina sik inkhat in romanvâm inthoina sik a kae.

⁸ Thempu hnenga ahei choi sik hei, ama’n ahma inkeia set-inthoina va kha atōk sik. Va kahring kha arîng amaher thlek sik, aluchu mahertan mak ning

⁹ khana va thisen ajing kha maichâm sir heia akathing thlōn sik. A’nhleiseng kha maichâm matungna kunga amaser sik kae. Hivahi set losōtna inthoina inkhat kae.

¹⁰ Khava sōa 2 tlukna va kha sedân dungjuia ro-inthoina atōksōt sik kae. Hing’hin thempu khan mipa setna sik a inthoina atōk sik, khana mipa kha rangei mandam akachang sik kae.

¹¹ Mi inkhat in vaṭhu 2 a-emak leh pherva 2 anei tor mak inchu, set-inthoina sik jâmdi kilograme inkhat ahei choi sik kae. Olive thai a-emak leh bero achunga adamak sik kae, ajârchu hivahi set-inthoina kae, hmuchi inthoina changmak.

¹² Ama’n jâmdi thempu hneng ahei choi sik kae, thempu khan kut maja khat alo sik khavakha Rōngpu hneng akhenga a’ntōk jo ângphunga manhretna kae, ama’n maichâm chunga thlai inthoina inkhat a aro sik kae. Hivahi set losōtna inthoina inkhat kae.

¹³ Hing’hin thempu’n mipa set-inthoina kha atōk sik, khana ama kha rangei mandam kachang sik. Jâmdi a’nhleiseng kha, hmuchi inthoina kapōa thempu ta sik kae.

Katlen Male Inthoina

¹⁴ Rōngpu’n Moses hneng dânhei hi aleipek.

¹⁵ Mi inkhat in Rōngpu hneng a’ntheng rahōi kasōk apek mak inchu, khava katlen malena inthoina sik a nōrna kase kemōngche a-emak leh keche inkhat Rōngpu hneng aheikei sik kae. Aman kha sedân dungjuia intep pek sik.

¹⁶ Ama’n aleipek tor mak kha apek nger sik, khava kakhea aja sem 100 a sem 20 thempu hneng apeksa sik, khana thempu khan ran kha mipa set-inthoina atōk sik, khan ama rangei mandam kachang sik.

¹⁷ Mi inkhat in manhret phâkloa Rōngpu ṭongpek asukkhōi inchu, ama aṭhe jo, lei achoi nger sik.

¹⁸ Ama’n kemōng mo, ke ache mo nōrna kase inkhat thempu hneng katlen male sik set-inthoina akei sik kae. Khava man chu sedân dungjuia intep sik. Thempu khan manhret phâkloa mipa set leitlona inthoina kha atōk sik, khan ama rangei mandam kachang sik.

¹⁹ Hivahi Rōngpu hnenga asetna leitlo jâra katlen male inthoina kae.