LEVI-DÂN 27 - LEKHARABU INTHENG (BSI)

Rōngpu Hnenga Kutchoi Tōkdân

¹ Rōngpu’n Moses hneng

² Israel mipuihei sik dânhei hi aleipek. Mi inkhat intepna huitlungna sik a Rōngpu hneng pek sōt sik achang inchu hiva sêr a’ntepja hi pek a masōthei kae,

^3-7 sena dân dungjuia: –pase, akum 20–60 katluk jo kha: dangka 50 sik –nuhmei in dangka 30 –pase rether, akum 5–20 katluk jo kha: dangka 20 sik –nuhngâk in dangka 10 –pase naipang kum 5 thōi: dangka 5 sik –nuhmei naipang in dangka 3 –pase kum 60 kakhe jo: dangka 15 sik –nuhmei in dangka 10 sik kae.

⁸ Hiva intepna kanei mi hi saraber achanga achoitor mak inchu, ami kha thempu hneng anheiṭhōi sik, thempu khan achoitor hrep sik aman amathlâk pek sik a kae.

⁹ Ale’ntepna kha ran aleichanga Rōngpu hneng tōk a rahlângthei achang inchu, Rōngpu hneng tōkna rakip kha a’ntheng jo kae,

¹⁰ intepna kaneipa khan khavakha ran ralak vâng thleng sik rangei mak jo. Athleng inchu ran 2 hei kha Rōngpu ta kachang sik hei.

¹¹ Tâk-kha intepna kha beklanga a’nthengmak ran achanga Rōngpu hnenga inthoina rahlângthei achangmak inchu, mi khan ran kha thempu hneng aṭhōi sik kae.

¹² Thempu khan ran kha aṭhat aset dungjuia aman atep sik, thempu tatep kha aman kachang sik.

¹³ Akapupa khan akatlen hnōm inchu, amanja chunga khan sem 100 a sem 20 apeksa sik kae.

¹⁴ Mi inkhat in a-inn kha Rōngpu hneng atōksōt inchu, thempu khan a-inn kha aṭhat aset dungjuia aman atep sik, khavakha aman kachang sik.

¹⁵ Khava inn katōksōtpa khan akatlen male hnōm inchu, amanja leh sem 100 a sem 20 apeksa sik kae.

¹⁶ Mi inkhat in aram ṭhahrep Rōngpu hneng atōk inchu, ahleia hmuchi heija mo avor hisâp dungjuia amantep sik kae. Sachi kilograme 20 a dangka 10 aman manchang sik kae.

¹⁷ Pekmalena Kum sōlima atōk inchu aman kha katluk a pek sik kae.

¹⁸ Hnunga atōk inchu, thempu khan abâna Pekmalena Kum ahong tlung sik kha kum heija mo alavât hisâp asuktōa aman kha atep sik kae, akatla sik man kha atep sik.

¹⁹ Akatōkpa khan akatlen hnōm inchu, amanja kha leh sem 100 a sem 20 apeksa sik kae.

²⁰ Hlei kha Rōngpu hnenga inphut ankatlen mak hma mihlop hnenga anjōrsōt inchu, rachôk malena ratha kha inhmang jo.

²¹ Abânna Pekmalena Kum a chu ahlei kha Rōngpu tâ kachang thang sik jo; thempu chen sik jo kae.

²² Mi inkhat in hlei inkhat arachôk kha Rōngpu hneng atōk inchu,

²³ Thempu khan abânna Pekmalena kum tlungna sik kum kha teia aman atep sik kae; khava kani ning tak khan aman kha apek sik kae; sêr kha Rōngpu ta kae.

²⁴ Pekmalena kum ahong tlung pha akapu marō leh asōnhei hneng pek male sik kae.

²⁵ Aman rakip sengai dungjuia tep sik kae.

²⁶ Ran inte hma-inkei rakip Rōngpu tasa hei kae, khava jâra tûte’num arachama inthoina hmangthei mak ning. Sete, kemōngte leh kete Rōngpu tâhei kae,

²⁷ tâk a’nthengmak ran a’nte masa hei khachu sengai manhrep leh sem 100 a sem 20 pesa a rachôk thei kae. Arachôk mak inchu mihlop hneng aman hrep a jōrthei kae.

²⁸ Mi inkhat in ajâr omloa Rōngpu hneng anei heikhat atōksōt kha injōrthei mak jo ning, katlen male theimak ning, mihring, ran, ram achanga. Rōngpu tâ kachang thang jo.

²⁹ Mihring inkhat in ajâr kasea tōksōt jo kha rachôk male thei changmak jo; khavakha that nger sik kae.

³⁰ Ram shunga kasōk rakip hmuchi leh thing kara, sem sôma sem khat Rōngpu tâ kae.

³¹ Mi inkhat in arachôk male hnōm inchu, aman leh sem 100 a 20 apeksa sik kae.

³² Ranhei kha sôma inkhat et Rōngpu tâ kae. Ranhei kha aja antei pha, 10 a inkhat kha Rōngpu chen kae.

³³ Ran kapu khan ranhei kha akaṭhamak tōkna sik a kadei theimak ning, khan chu ran kaṭhamak vâng thlengthei mak ning, inkhat kha inkhat vâng athleng inchu, ran 2 hei kha Rōngpu tâ kachang sik jo hei, katlen male theimak jo ning.

³⁴ Hihei hi Israelhei sik a Sinai Tlâng chunga Rōngpu’n Moses hneng ṭong aleipek kha kae.