LEVI-DÂN 26 - LEKHARABU INTHENG (BSI)

Ṭongjui jâra Mahâmṭhatna

¹ Rōngpu’n ati, “Lim syem mak ruh, milim, hlung kacho, kamuk sik a hlunga lim mazet mak hei ruh. Kei nan-Pathen Rōngpu eng kha kae.

² Beklanga rehōihei nit ruh, kei kamukna hmun kha kaja ruh. Kei Rōngpu eng kae.

³ “Kei dân dungjuia nanhringa kaṭong pek nanjui inchu,

⁴ aphahrep a khō kamansûr sik, ram hin hmuchi leh theikara kamanra sik.

⁵ Nanhmuchi khangtuk hrep katam sik nanvomhrui ṭhōt pha ahongtluk katlunga sâng nanla khôm sik, khana sachi vorpha ahongtluk katlunga vomhrui kara nanlaṭhōt sik. Nantasâk hnōm chenna nannei sik, nanrama kahōia ka-om sik chei.

⁶ “Nanrama mōngna kapek sik chei, khana heite ṭitna neiloa kaje tor sik chei. Akakhôk ranhei kha ram shunga man om mak jo hei ning, khana re sōk nôk mak jo ning.

⁷ Nan-inrepuihei kha nantor sik hei;

⁸ nangni mihring 5 rōk in mihring 100 nantor sik hei, 100 inchu mihring 1,000 nantor sik hei.

⁹ Vâng kapek sik chei, sa leh nai katamtak kapek sik chei; ke’n nanhnenga kaṭong leitepna kha kanit sik.

¹⁰ Nansâng kha khangtuk hrep katam sik, kum khat katlung ka-om sik, khava pha sâng marō kha nanhlonsōt a ather dana sik nantlo sik.

¹¹ Kei a’ntheng pōn-inna khan nankâra ka-om sik eng, nanhnenga inphut kei inhe mak ning.

¹² Ke’n nangni ka-ompui sik chei; nan-Pathen kachang sik eng, nangni kei mi kachang sik chei.

¹³ Nan-Pathen Rōngpu ke’n nangni sōk nanchang injôn makna sik Egypt a inphut kaheiṭhōisōt chei kae. Nangni nankasuk inhnem hei ratha kha kavōk-khōi pek jo chei khana nanlu nanman tanga kamanse jo chei.”

Ṭong Kajuimak sik a Karâkna

¹⁴ Rōngpu’n ati, “Kaṭong pek nanjuimak inchu, karâkna kapek sik chei kae.

¹⁵ Kei dânhei leh kaṭong pek nanjui hnōm mak inchu khana ke’n nanhnenga intepna kaleisyem kha nanvōk khōi inchu,

¹⁶ karâkna kapek sik chei. Nanchunga inreng khōdeng theina kamathlung sik, damthei lo hrise leh hritlun khan nanhmit amancho sik khana nahringkhō aradûk reng sik jo chei. Hmuchi nanvor sik tâk akaṭha heite sōk mak ning, ajârchu nan-inrepuihei khan antor sik chei khana nanta manhmông hei kha anmani’n ansâk sik.

¹⁷ Nangni kadōia kahnget sik chei, nangni torna sik a, nanka-en kada he’n nanchunga vai anrôn sik; khang hrep a kaṭi sik chei khachu tûte’n anhnongmak chei inum inpera katlân sik chei.

¹⁸ “Hiva kapha hi’num nani juimak inchu, nankarâkna kha aja 7 kakhea kapeksa sik chei.

¹⁹ Nan êngkase inlensakna kha kavōk mathlek sik; khō sûrmak ning, nanram kachâr sik, thir kapōa kasak sik.

²⁰ Nanṭōn tlo hrat khan heite akaṭha heirônsôt mak ning ajârchu nanrama khan kara sōk mak ning, thingkung he’m inramak hei ning.

²¹ “Nangni’n nanidōi ṭhak enga nanijui hnōm mak inchu, nankarâkna kha aja 7 kamankhesa sik kae.

²² Ke’n thitheina shahei nankâra kajōng tîr sik, nansahei anthat sik hei, nanranhei ansuk manhmang sik hei, nangni akatlômtek ka-om sik cheia kha nanhlampui hei kha andahlonsō sik jo.

²³ “Hiva karâkna rakip sōa nanrangei mak a akaletting nannilo ṭhak inchu,

²⁴ nangni kahnget sik chei khana ahma kakei kanek a aja 7 a’nhnakdet vânga karâkna kapek sik chei.

²⁵ Ni-intepna kha nanvōk khōi jâra nanchunga re kamasō sik, nan-inhrungna sik a nankhōpui heia nan inkhôm inchu, akadam theimak hrise nankâra kahei tir sik, nan-inrepuihei hneng rumhrat tak a amanhlut sik chei.

²⁶ Nansâk leh nan-in ahlam kha kakhâr sik, nuhmei 10 he’n anbuhlom nei seng syemna sik a ratap inkhat rōk anhmang sik. Khavakha ansempek sik chei, nansâksō pha, nanvonchu lakaṭâm ṭhak sik.

²⁷ “Hivasō katlunga hin nannidōi ṭhak a nanijui hnōm mak inchu,

²⁸ ka nuknat a kahei hnget sik chei, nankarâkna kha ahma kakei kanek a aja 7 kamankhôk chet nôk sik.

²⁹ Nanvon khang hrep kaṭâm sik, nanbinga nansahei nanhong sâk sik hei.

³⁰ Tlâng chunga nankamukna kasuk manhmang sik hei, bero maichâmhei kakeihler sik, nankathi kalōnghei kha nanlimsyem akatluhei chunga kahlon mathlâk sik. Madu ka-om maktak a

³¹ nankhōpui kha kamanhmang sik, nan-inthoina hei kha rahlâng mak ning.

³² Nanram kha pui katluk a kasuk manhmang sik, khava hmun kahlō nan-inrepui he’m suksetna chunga anmalung atôn sik.

³³ Nanchunga re kamasō sik, mihei ram a kaman chek-chai sik chei. Nanram kha nandahlon sik, nankhōpuihei inhmanga ka-om sik hei.

^34-35 Nangni’n inhngana pha nantapek phungmak nanram kha châm inhnga sik jo; hivahi dahlona ka-om sik, nan-inrepuihei ram a nan-om shunga châm inhngatna achen sik.

³⁶ “Miram a ka-om nangni ṭit kasip a kada sik chei, thli tasêm thingbō rasa bek khan katlân sik chei. Re shunga re tahnong kapōa katlân sik chei, nan-inrepui he’n nanhnenga an-om mak pha’m katlu inpai sik chei.

³⁷ Tûte’n ahnong mak chei pha nangni khat leh khat inpai inthlûk sik chei, nankadōi tu inkhat intukpui tor mak tinnei.

³⁸ Nantlânna ram a kathi sik chei, nankadōihei ram khan amadehlon sik chei.

³⁹ Nankadōihei ram a alakahring ajingte chei kha nansetna leh nanpu sōnhei setna jâra inhmangsō sik chei.

⁴⁰ “Tâk-kha nansōnhei chu, ansetna leh khana kei anikating leh rahe kase anpu sōnhei setna,

⁴¹ khana inphut anchunga kahnuk leikana a ankadōihei ram a kalei tirna hei, khana inphut hong insir sik hei. Atorna, nansōn he’n an insinsak pha ansetna leh anrahe setna kara kha anchen pha

⁴² Jacob, Isaac, Abraham leh ka’ntepna kha kamandonsōt sik, khana kamihei ram pekna sik a kei intepna kha kamanther nôk sik.

⁴³ Ahma kakeia ram kha amihei mandahlon sik kae, pui katluk a châm a’nhngatna sik a, khana kadân leh kaṭong pek hei anhlonsōt jâra karâkna kha antachen sik kae.

⁴⁴ Kha’num, ankadōihei ram a an-omlai khan pui katluk a dahlonna leh suk manhmangna chu tlomak ning. Khanga enchu anmani leh kalei intepna khana kei anmani Pathen Rōngpu ka-ena kha amanbâng sik joa kae.

⁴⁵ Rōngpu kei hi anmani Pathen changna sik a Egypt a inphut kamihei kaheiṭhōisōt lai, jât rakip hneng karatha neina kalei malârsōt laia, anpu sōnhei leh kalei intepna kha kamanther nôk sik kae.”

⁴⁶ Hihei rakip hi Israelhei sik a Sinai Tlâng chunga Rōngpu’n Moses aleipek dân leh ṭongpek-hei kha kae.