LEVI-DÂN 23 - LEKHARABU INTHENG (BSI)

Beklanga Reveihei

¹ Rōngpu’n Moses hneng

² beklanga reveia Israel mipui he’n kamukna sik anho’ntûp pha chôndân sik apek hei.

³ Nangni’n nanṭōn tlona sik ni 6 nannei, tâk ni 7 tluk ning, serning kha châm inhngatna kani kae. Khava ning chu ṭōn tlomak ruh, tâk kamukna sik a intûp ruh. Châmhngat kani hi Rōngpu ta kae; khava hmun a nan-om achang inum jui ruh.

⁴ Hiva rehōihei hi apha intepna shunga hrimanthang ruh.

Rakan Kût leh Che philo Buhlom Revei

⁵ Rakan Kût hi Rōngpu kajana nit sik kae, thla hma inkeia ni 14 tluk ning a’nphut kae.

⁶ Ni 15 tluk ning che philo buhlom revei kha inphut, ni 7 shunga che philo buhlom nantasâk mak sik kae.

⁷ Hiva kanihei hma-inkei ning ama inmuk sik a intûp sik chei, nitina nanṭōn heikhat bek tlomak ruh.

⁸ Ni 7 shunga nanthlai inthoina kha Rōngpu hneng tōk ruh. Ni 7 ning khan kamukna sik intûp nôk ruh, nitina nanṭōn heikhat nanta tlomak sik kae.

^9-10 Rōngpu’n apek sik chei ram kha nanhlō pha, sâng nan-ât hei pha, ahma inkei sabor saphe kha thempu hneng heichoi ruh.

¹¹ Ama’n ahlopdet a Rōngpu hneng avatōk sik, nangni arahlângna sik chei. Thempu’n serningsōa jîng kania avatōk sik kae.

¹² Hmuchi inthoina nantōk ning, ro-inthoina kha kemōngte kum khat katluk nōrna kase inkhat tōksa ruh.

¹³ Kha leh inthoia jâmdi kilograme 2 olive thai leh manheia thlai inthoina tōkna nei ruh. Khava marim kha Rōngpu tlaina kae. Khana ju litre inkhat um nanta tōksa sik kae.

¹⁴ Hmuchi kara ather heikhat, hminloa, katheia, buhloma syema achang inum Pathen hneng tōkmak hma seng sâk mak ruh. Hiva chôndânhei hi nansōn rakip in akahong sik pha rakip a antajui sik kae.

Sakhôm Kût

¹⁵ Nangni’n Rōngpu hneng nansaphe nanta hongtōk serning kanisōa inphut Kanive 7 tei ruh.

¹⁶ Châmhngat kanive 7 tlukna kahnunga ni 50 tluk ning, hmuchi inthoina ather inkhat Rōngpu hneng tōk ruh.

¹⁷ Innshung et in Rōngpu hneng buhlom pheng hni ahlopdet kutchoia anta heipek sik kae. Buhlom pheng khat kha jâmdi kilograme 2 chêphia syem sik kae khana sakhôm sik a inphut kara hma-inkei inthoina kha Rōngpu hneng tōk sik kae.

¹⁸ Buhlom leh inṭhōia mipui in kum khat katluk kemōngte 7, sehratche inkhat, kemōngche 2 ankhenga nōrna kase antatōk sik hei kae. Khahei kha Rōngpu hneng romanvâm inthoina tōk sik hei kae, inṭhōia hmuchi leh vomhrui ju inthoina tōksa sik kae. Hiva inthoina marim kha Rōngpu tlaina kae.

¹⁹ Set-inthoina keche inkhat, kum khat katluk kemōng chere 2 inlôikhôm inthoina tōksa ruh.

²⁰ Thempu khan buhlom kha leh kemōngte 2 kha thempuhei sik ahlopdet kutchoi inkhat a Rōngpu hneng apek sik. Inthoinahei hi a’ntheng kae.

²¹ Khava ning nitina nanṭōn kha intlo mak ruh, tâk kamukna sik a intûp ruh. Nansōn he’n khova ram a an-om inum hiva chôndânhei hi akahong sik pha rakip a antajui sik kae.

²² Nanhlei nan-ât pha hleike rakirret katlung âtsa mak ruh, dahlon jo kha aka-ât sik a jōn nôk mak ruh; sarahei leh khōhmehei sik dahlon pek hei ruh. Rōngpu kha nan-Pathen kae.

Kumther Revei

^23-24 Thla 7 tlukna kani hma-inkei ning ahlopdet a châmhngatna nei ruh, pengkun antum inhring pha kamukna sik a intûp ruh.

²⁵ Rōngpu hneng thlai inthoina tōk ruh khana nitina nanṭōn kha tlomak ruh.

Set Inthengna Kani

^26-27 Thla 7 tlukna ni 10 ning hichu kumchaina rōi, mihei setna losōtna sik a hmang sik kae. Khava ning khan heite sâk loa kamukna sik hong intûp ruh, Rōngpu hneng thlai inthoina kha vatōk ruh.

²⁸ Khava ning ṭōn tlomak ruh, ajârchu khava ning kha set losōtna bekrōi tlona kae.

²⁹ Khava ning heikhat kasâk mi kha Pathen mi inkhat a inteisa mak jo ning.

³⁰ Mi inkhat in khava ning ṭōn atlo’nchu, Rōngpu khet in athat sik kae.

³¹ Hiva chôndân hi nansōn rakip, khova ram a an-om inum, antajui sik kae.

³² Ni 9 tluk ning kani atlâk a inphut ni 10 ning kani ahlut katlung ahlop mônga châmhngatna nit ruh, hiva shunga hin heite sâk theimak tin.

Rabuk Kût

^33-34 Thla 7 tlukna Murva ni 15 ning Rabuk Kût phut a ni 7 katlung manjōm ruh.

³⁵ Hiva kani hma-inkei ning kamukna sik intûp ruh, nitina nanṭōn kha tlomak ruh.

³⁶ Ni 7 shunga ani tina thlai inthoina nantatōk sik kae. Ni 8 tluk ning kamukna sik hong intûp nôk ruh, thlai inthoina tōk ruh. Hivahi kamukna kani kae, ṭōn heite nanta tlomak sik kae.

³⁷ (Hihei hi nangni’n kamukna sik ahon’tûp cheia, thlai inthoina, romanvâm inthoina, hmuchi inthoina, ran inthoina, ju inthoina, ani tina inthoi sik kasōk seng nantatōk a Rōngpu kajana nantanei sik beklanga reveihei kha kae.

³⁸ Hiva reveihei hi nangni angaia serning chunga hapsa kae, khana inthoinahei hi angaia kutchoi, intepna pui tlukna inthoina, nanrachama inthoina Rōngpu hneng nantatōk hei chunga hapsa kae.)

³⁹ Nansâng nankhôm pha, hiva revei hi ni 7 hmang ruh, thla 7 tlukna ni 15 ning phut ruh. Ahma inkei ning kha ahlop mônga châm inhngatna sik kae.

⁴⁰ Khava ning khan kara kaṭhapen nanthei kunga inphut ṭhōt ruh, kahno bâk leh thing bâk inbur choi ruh, khana Rōngpu nan-Pathen kajana bekna revei kha phut ruh.

⁴¹ Ni 7 hmang ruh. Hiva dân hi nansōn he’n akahong sik pha rakip a antahmang sik kae.

⁴² Israel mi rakip rabuk-inna ni 7 inkhuma ka-om sik hei,

⁴³ Rōngpu’n Israel mipuihei kha Egypt ram a inphut aheiṭhōisōt pha khan rabuk-inna aleiman-om hei ti kha nansōn he’n anmanhretna sik a kae. Ama nan-Pathen Rōngpu kha kae.

⁴⁴ Khang’khan Moses khan Israel mipuihei kha Rōngpu kajana beklanga rehōi nitna dân kha aleipek hei.