LEVI-DÂN 22 - LEKHARABU INTHENG (BSI)

Inthoina Inthengna

¹ Aaron leh asapahei hneng hri sik kha Rōngpu’n Moses hneng ṭong apek,

² “Kei rahming nantamanset mak sik kae, khava jâra Israel mipuihei a’ntheng inthoina kahnenga anta heitōk kha kajatak a hmang ruh. Kei Rōngpu eng kae.

³ Nansōn inkhat in a’nthengmak lai, kei hnenga Israel mipuihei tatōk inthoina intheng hnenga ahong inchu, maichâma avea razenna tlothei mak ning. Hivahi ahei tik a sik kae. Kei Rōngpu eng kae.

⁴ “Aaron sōn inkhat vunnat kanei leh thi leh hnai kalōng inkhat in a’ntheng inthoina kha beklanga a’nthengsōt hma seng sâk theimak ning. Thempu tu inkhat in kathi kalōng leh a’ntôn jo, a’nthengmak heikhat avasit inchu khana asetui asōk inchu

⁵ khana a’nthengmak ran leh mi avatôn inchu intheng mak jo.

⁶ A’nthengmak thempu tu inkhat kha khōhlei katlunga intheng mak ning, tui a’nsi mak hma seng a’ntheng inthoina kha sâk theimak ning.

⁷ Kani atlâk sō leh ama intheng jo, ama thlai a’ntheng inthoina kha asâk thei sik jo.

⁸ Binga kathi leh ramsha tathat ran hme sâk mak ning, ama mantheng mak ning. Kei Rōngpu eng kae.

⁹ “Ke’n kapek chei chôndânhei hi thempu rakip in antanit sik kae. Achangmak inchu, a’ntheng chôndân anjuimak jâra themmô anchen sik khana kathi sik hei. Kei Rōngpu eng kae, ke’n kaman theng hei kae.

¹⁰ “Thempu innshung mi rōk in a’ntheng inthoina kha ansâk thei sik; tu inkhat, thempu leh aka-om khana ratha-nek mi inkhat in sâk theimak ning.

¹¹ Tâk-kha thempu sōk, asêr vânga arachôk khana a-inna a’nte khan chu thempu chen thlaihei kha asâk thei sik.

¹² Thempu sanu, thempu kaemak hnenga inn kanei khan a’ntheng inthoina heikhat sâk theimak ning.

¹³ Tâk-kha renghmei achangmak leh anta he’nṭhenpui asanu sa neilo, apa inna ahong inle joa in-ungna kanei jo khan chu apa thempu chen kha asâk thei sik. Thempu innshunghei rōk in heikhat kha ansâk thei sik a kae.

¹⁴ “Thempu innshung kachangmak inkhat in a’ntheng inthoina kha manhret loa avasâk inchu, khava man katluk hrep leh ṭhen 100 a ṭhen 20 thempu hneng apek male sik kae.

¹⁵ Thempu he’n a’ntheng inthoina kha

¹⁶ ahlam sōkloa mi anmansâk hei leh antamantheng mak sik hei kae; khava mi chunga khan themmô chenna leh karâkna katlung sik. Kei Rōngpu eng kae khana inthoina kha kaman theng kae.”

¹⁷ Rōngpu’n Moses ṭong aleipek,

¹⁸ chôndânhei hi Aaron leh asapahei khana Israel mi rakip hnenga apek sik a. Israel a-emak leh Israelhei kâra aka-om khōhme inkhat in ro-inthoina atōk inchu, intepna pui tlukna a-emak leh bing rachama inthoina atōk pha, ran kha nōrna aneimak sik kae.

¹⁹ Rahlâng theina sik a nōrna kase ache akachang sik kae.

²⁰ Nōrna kanei ran heikhat nantōk inchu, Rōngpu’n rahlâng mak ning.

²¹ Tu inkhat in Rōngpu hneng inlôikhômna inthoina atōk pha, intepna huitlungna a-emak leh bing rachama tōkna achanga, ran kha rahlângna sik nōrna kase akachang sik kae.

²² Rōngpu hneng ran hmitkacho, ke kangōi, ke intan, khōihli hnai kalōng, vun inkhok, akaphâr inkhat tōkmak ruh. Khang khava ran kha maichâm chunga thlai inthoina tōkmak ruh.

²³ Bing rachama inthoina chu ran alakasin, pui alakatluk mak vânga nantōk thei sik, tâk intepna huitlungna sik a chu rahlângthei changmak.

²⁴ Rōngpu hnenga ran kati epkhōi, âttan, vōk manchip, vōk hler heikhat tōkmak ruh. Nanrama khavakha hnōmpek changmak.

²⁵ Jât-hlop heia ran heikhat thlai inthoina tōkmak ruh. Khahei kha nōrna kaneihei tia inlo khana rahlâng changmak hei.

^26-27 Sete, kemōngte, kete a’ntet pha, apuia inphut ni 7 mak hma valo sik changmak, khava sō leh thlai inthoina tōkthei kae.

²⁸ Sehrat pui leh ate, kemōngpui leh ate, kepui leh ate ni khat a inthoina tōksap mak hei ruh.

²⁹ Rōngpu manpâkna inthoina nantōk pha, chôndânhei kha jui ruh, rahlâng pekna sik chei;

³⁰ khava ning bât sâk sō ruh jîngkâr katlung heite inda mak ruh.

³¹ Rōngpu’n ati, “Kaṭong pek jui ruh; kei Rōngpu eng kae.

³² Kei rahming inthenga hmeset manchen mak ruh; Israel mi rakip in kei hi intheng tia akahnōm sik hei kae. Kei Rōngpu eng kha kae, ke’n kaman thengsōt chei kae;

³³ Kei nangni Pathen changna sik a Egypt a inphut kaheiṭhōisōt chei kae. Kei Rōngpu eng kha kae.”