LEVI-DÂN 20 - LEKHARABU INTHENG (BSI)

Ṭong Juimak Jâra Karâkna

¹ Rōngpu’n Moses hneng

² Israel mipuihei hripek sik a amanthei, “Nangni tu inkhat a-emak leh nankâra ka-om khōhme inkhat in asahei Molech pathen kamukna akapek sōt kha nangni nankhenga hlung vânga denghlon a that sik kae.

³ Tu inkhat in asa inkhat Molech hneng apek a, ka-omna Pōn-inn amannima, kei rahming intheng inzak apek inchu, Ke’n ama kadōi sik khana kami inkhat a teimak ning.

⁴ Mipui in aṭōntlo kha heitea andon mak jo’nchu khana aṭhatmak jo’nchu,

⁵ ama leh a-innshung mi rakip, khana kaṭong juimakna ama kajōm rakip, khana Molech inmuk hei seng chunga Kei khet in kadōi sik hei kae. Kami tia mandon mak jo hei ning.

⁶ “Tu inkhat in kathi rathla inphut ṭong kalo hei hnenga mansena kangeituia avakase mi kha, ama kha kadōi sik, kami inkhat a teimak jo ning.

⁷ Nangni inthenga om ruh, ajârchu kei nan-Pathen Rōngpu eng kha kae.

⁸ Kadânhei jui ruh, kei Rōngpu eng kha kae, khana Ke’n kaman theng chei kae.”

⁹ Rōngpu’n dânhei hi apek hei. Tu inkhat in apa anu kahâksêr inchu that sik kae; athina kha abinga atlosōt kae.

¹⁰ Mi inkhat in a Israel changpui inkhat nuhmei ajôngpui inchu, ama leh nuhmeinu kha that sik hei kae.

¹¹ Apa nuhmei inkhat leh hmun inchun mi khan apa inzak apek kae, ama leh nuhmeinu kha that sik hei kae. Anthina kha anmani tahei rôn sōt kae.

¹² Mi inkhat ahmōinu leh anset inchu, an-inhnibât a that sik hei kae. Anmani’n omhlam sōklo jeṭhe antlo jo, anthina kha anbinga anta’ntlosōt kae.

¹³ Pase inkhat in, pase inkhat ajepui inchu, mater ka-om tak antlo jo, an-inhnia that sik hei kae. Anthina kha anbinga antatlosōt kae.

¹⁴ Mi inkhat in asanu leh anu akop a a-ompui he’nchu, inzak ka-om tak antlosōt jâra ankhenga hmeia rohlon sik hei kae; Khang khava omchen kha nankâra hnōm mak sik kae.

¹⁵ Mi inkhat in ran a’nchunpui inchu, ama leh ran kha that sik hei kae.

¹⁶ Nuhmei inkhat in ran leh jepui sik aleirei inchu, amanu leh ran kha that sik hei kae. Anmani thina kha anbinga antatlosōt kae.

¹⁷ Mi inkhat in anainu mo, anulâk sanu mo a-ompui inchu, anmani kha mipui kâra inzakna pek sik hei kae, mipuia inphut hnongsōt sik hei kae. Asernu ajepui jâra khava kara kha athōk sik kae.

¹⁸ Mi inkhat in nuhmei inkhat thla apōn hmulai ajepui inchu, an-inhnibât a mipuia inphut hnongsōt sik hei kae; ajârchu beklanga intheng makna dân kha ansuk ṭhe joa kae.

¹⁹ Mi inkhat in ani asetpui inchu, an-inhnia omhlam sōklo jeṭhe antlo jâra khava kara kha antathōk sik kae.

²⁰ Mi inkhat in apakasin nuhmei asetpui inchu, apakasin inzak apek kae; ama leh nuhmeinu khan lei antachoi sik kae; an-inhnia sa neimak hei ning.

²¹ Mi inkhat in asōpui nuhmei a-ompui inchu, sa neiloa akathi sik hei kae. Asōpui inzak apek khana beklanga a’nthengmak atlo jo kae.

²² Rōngpu’n ati, “Ke’n kaṭhōi manhlutna sik chei Canaan ram khan alei hōtmakna sik chei, kadân rakip leh kaṭong pek chei hi jui ruh.

²³ Khava hmun a aka-om hei chôndân kha juimak ruh; ram khan nangni nanhlut theina sik a jât-hlop hei kha kahnong sōt hei kae. Anṭhatmakna omchen rakip khan kamater hei kae.

²⁴ Tâk-kha hiva haona leh thai ṭhatna ram hi nanta kachang sik a a’ntep eng kae, kapek sik chei kae. Kei nan-Pathen Rōngpu eng kha kae, ke’n nangni jât-hlop heia inphut kaṭhensōt chei kae.

²⁵ Khava jâra beklanga a’ntheng leh a’nthengmak ranhring leh vahei nantaṭhen kaṭha sik hei kae. A’nthengmak ranhring leh vahei sâk mak ruh. Intheng mak tia kahri kha nansâk inchu amantheng mak chei ning.

²⁶ A’ntheng sik chei khana keita rōk akachang sik chei kae, ajârchu kei Rōngpu eng, a’ntheng eng kae. Nangni keita rōk nanchangna sik jât-hlop heia inphut kaṭhensōt chei kae.

²⁷ “Tu pase nuhmei achang inum akathi rathlahei hneng ṭong kajong mi kha hlung vâng denghlon sik kae; hiva katlo mi kha athina rahno arôn sik kae.”