LEVI-DÂN 18 - LEKHARABU INTHENG (BSI)

Hmun Inchun Ayamak seng

¹ Rōngpu’n Moses hneng,

² Israel mihei hnenga ahri sik ṭong kha amanthei, “Kei nan-Pathen Rōngpu eng kha kae.

³ Nangni nanlei omna Egypt mihei leh tûn ke’n kaṭhōina chei Canaan mihei omchen kha juimak ruh.

⁴ Kaṭong pek chei tlo una kadânhei jui ruh. Kei nan-Pathen Rōngpu eng kha kae.

⁵ Ke’n kapek chei ṭōn tlo sik leh dânhei kha jui ruh; khanga nantlo’nchu inhuk inhring sik chei. Kei Rōngpu eng kha kae.”

⁶ Rōngpu’n chôndânhei hi aleipek. Nan-innkō kasōk rakip leh hmun inchun mak ruh.

⁷ Nannu nan-inchunpuia nanpa inzakna sik tlomak ruh. Nannu nanta manzak mak sik kae.

⁸ Anuhmei kop alak-hei nan inchunpui heia nanpahei manzak mak ruh.

⁹ Nannainu mo, nannulâk sanu mo, innshung khat a nangni leh aka-omsap a-emak leh aka-omsap mak achang inum inchunpui mak hei ruh.

¹⁰ Nantunu hmun inchunpui mak ruh; khavakha nangni sik a inzakna kae.

¹¹ Nannusin sanu kha hmun inchunpui mak ruh; amanu kha’m nannainu kae.

^12-13 Nanni mo nannusin mo hmun inchunpui mak ruh, nanpa nainu achanga nannu nainu achanga.

¹⁴ Nanpa kasin nuhmei inchunpui mak ruh, anmani kha nannu kasinhei kae.

¹⁵ Nanhmōinu hmun inchunpui mak ruh

¹⁶ Nansōpui nuhmei hmun inchunpui mak ruh.

¹⁷ Nangni’n nanta jepuinu sanu mo, atunu mo hmun inchunpui mak ruh; nanta’n hnaipui kachang thei hei, akaser omchen kae sik.

¹⁸ Nan nuhmeihei nainu hei kha nan nuhmei anhring lai seng, nannuhmei inkhat sik a lomak ruh.

¹⁹ Nuhmei inkhat thla pōn hmulai jepui mak ruh; ajârchu beklanga intheng mak a kae.

²⁰ Mi nuhmei inkhat jepui mak ruh; beklanga mantheng mak chei ning.

²¹ Molech Pathen kamukna sik a nansa inkhatbek phemak ruh.; khava khan Rōngpu Pathen rahming chunga inzakna ahei rôn sōt sik.

²² Pase tu inkhat in pase alak inkhat leh hmun a’nchun mak sik hei kae; khavakha Pathen in ahōt a kae.

²³ Pase a-emak leh nuhmei tu inkhat in ran leh a’nchun mak sik hei kae; khava tlongai kaemak khan beklanga mantheng mak a kae.

²⁴ Hinghiva omchen tloa nangni nanbinga insu innim mak ruh, ajârchu nanhma ram shunga aleika-om limsyem inmuk hei khana nangni nahlut theina sik a Rōngpu’n ahnong sōt jo hei khan khanga antloa insu innim heia kae.

²⁵ An-omchen khan ram kha mantheng mak, khava jâra Rōngpu’n aram kha akarâk a ashunga mihei kha ahlon sōt heia kae.

^26-27 Anmani’n hiva mater ka-om rakip hi antloa ram hi anman nim, tâk nangni chu khanga tlomak ruh. Nankhenga Israel a-emak leh nankâra ka-om khōhme anchanga, Rōngpu dân leh aṭongpek nantanit sik kae,

²⁸ Khan chu nanhma aleika-om jât-hlop hei hlonsōt hei kapōa nangni ahlon sōt mak chei ning.

²⁹ Hinghiva mater ka-om omchen katlo mi kha Pathen mi inkhat a inteimak ti hi nangni’n nanmanhret jo.

³⁰ Khana Rōngpu’n ati, “Kaṭong pek chei hi jui ruh, khana nanhma aleika-om hei omchen kha juimak ruh, khahei kha tloa nanbinga insuk innim mak ruh. Kei nan-Pathen Rōngpu eng kha kae.”