LEVI-DÂN 14 - LEKHARABU INTHENG (BSI)

Vunnatsōa Manthengna

¹ Rōngpu’n Moses hneng,

² mi inkhat vunnat kakhôk a inphut adamsōa beklanga mantheng sōtna dânhei hi aleipek. Ama intheng jo tia anphông ning, thempu hneng anheiṭhōi sik

³ thempu khan ama kha rephōr vângting aṭhōia a-ente sik. Nat kha a’ntheng jo’nchu,

⁴ thempu khan hihei hi ahei choina sik a ṭong apek sik, beklanga a’ntheng va 2, cedar thinghar, pat-hrui kasen, hyssop bâk inkhat.

⁵ Thempu khan va inkhat kha akapût tui intheng, ralei thlengkama aka-om chunga thatna sik a ṭong apek sik.

⁶ Ama’n va inkhat kha cedar thinghar, pat-hrui kasen, hyssop bâk kha leh a’nthat va thisen shunga khan aphum sik hei.

⁷ Vunnat a inphut mantheng sik mi chunga thisen kha vōi 7 akathing thlōn sik, khan ama kha intheng jo tia aphông sik. Akahring va khachu ram thōia amanjōngsōt sik.

⁸ Mi khan apōn ader asôp sik, asam avopet sik, khan tui insi sik; khan chu ama kha beklanga intheng sik jo. Rephōr shunga kahlut thei sik jo, tâk ni 7 chu rephōr vângting aka-om sik kae.

⁹ Ni 7 ning avea alusam, ahnerhme, ahmit rakui hme, khana atak a hme rakip avo nôk sik kae; apōn leh ader asôp a tui a’nsi sik kae, khan beklanga a’ntheng sik kae.

¹⁰ Ni ret ning nōrna kase kemōng achere 2, kum khat katluk kemōng arala inkhat aheikei sik kae; olive thai leh manhei jo jâmdi kilograme 3, khana olive thai litre inkhat ṭhen thuma inkhat ahei choi sik hei kae.

¹¹ Thempu’n ami kha leh inthoinahei hi Rōngpu omna Pōn-inn hlutna aṭhōi sik hei.

¹² Thempu’n kemōng achere inkhat leh thai litre inkhat ṭhen thuma inkhat kha katlen male inthoina sik atōk sik. Thempu sik a ahlopdet inthoina inkhat a hihei hi Rōngpu hneng atōk sik.

¹³ Kemōng kha set-inthoina leh ro-inthoina ran thatna hmun a khan athat sik. Ama’n hinga atlo sik, ajârchu katlen malena inthoina hi, set-inthoina kapōa, thempu chentum kae khana a’ntheng hêr kae.

¹⁴ Thempu khan kemōng thisen kha ajing aloa beklanga mantheng sik mi kha achang tinga akōra, changtinga akutpuia, changtinga akepuia akano pek sik hei.

¹⁵ Thempu khan olive thai kha ajing aloa aveitinga akutpha ajing asun a

¹⁶ achang tinga akutpâr inkhat aphum sik, Rōngpu omna khan vōi 7 akathing thlōn sik.

¹⁷ Akutpha chunga thai ajing leh kemōng thisen ajing aloa beklanga manthengsōt sik mi kha achang tinga akōra, achang tinga akutpuia, achang tinga akepuia akano pek sik hei.

¹⁸ Akutpha chunga thai inhlei kha khava mi luchunga abun sik jo. Hing’hin mantheng sōtna rōi kha atlo sik kae.

¹⁹ Khava sōa thempu khan set-inthoina kha atōk sik khana mantheng sōtna rōi kha atlo sik kae. Khava sōa, ro-inthoina ran kha athat sik

²⁰ khana hmuchi inthoina leh inṭhōia maichâma atōk sik hei. Hing’hin thempu khan mantheng sōtna rōi kha atlo sik, khana mi kha beklanga a’ntheng sik kae.

²¹ Sara achanga arôn tor mak inchu, ama intheng sōtna sik akemōng chere inkhat rōk katlen malena inthoina sik a aheikei sik kae, thempu sik a ahlopdet a Rōngpu hneng tōkna kae. Hmuchi inthoina sik jâmdi thai manhei jo kilograme inkhat rōk leh thai litre inkhat ṭhen thuma ṭhen khat ahei choi sik kae.

²² Vaṭhu 2 a-emak leh pherva 2, inkhat set-inthoina sik, inkhat romanvâm inthoina sik ahei choisa sik kae.

²³ Ama mantheng sōtna ni ret chang ning Pōn-inn hlutna kot a khahei kha thempu hneng ahei choi sik hei kae.

²⁴ Thempu khan kemōngte leh thai kha aloa thempu sik a ahlopdet kutchoi inkhat a Rōngpu hneng atōk sik kae.

²⁵ Kemōngte kha athat a athisen ajing aloa mi kha achang tinga akōra, achang tinga akutpuia, achang tinga akepuia akano pek sik hei.

²⁶ Thempu khan thai ajing akutpha veiting asun a

²⁷ achang tinga kutpâr inkhat a Rōngpu omna khan vōi 7 akathing thlōn sik.

²⁸ Thisen akanona hmun heia khan thai kha ajijing akano sik hei kae: mipa changtinga akōra, changtinga akutpuia, changtinga akepuia.

²⁹ Akutpha thai inhlei kha mipa luchunga abun sik, khang’khan mantheng sōtna rōi kha atlo sik kae.

³⁰ Khava sōa vaṭhu a-emak leh pherva inkhat kha

³¹ set-inthoina khana inkhat khan ro-inthoina leh hmuchi inthoina atōk sik kae. Hing’hin thempu khan mantheng sōtna rōi kha atlo sik kae.

³² Hivahi vunnat kakhôk karôn tâk a’nthengna sik a inthoina rôn ngai kaneimak sik a dân kae.

Inna Nat Kakop

³³ Rōngpu’n Moses leh Aaron hneng

^34-35 nat kakhôk in atôn jo hei innshunghei chungchânga dânhei hi aleipek hei. (Hihei hi Rōngpu’n antâ sik a apek sik hei Canaan ram kha Israel he’n anhlutsōa antajui sik kha kae.) Tu inkhat in a-innshunga Rōngpu’n nat kakhôk ahei tir ti a’nhret inchu khavakha thempu hneng akasea amanthei sik kae.

³⁶ Thempu khan nat kha a-ente mak hma neinâk rakip innshunga inphut losōtna sik a ṭong apek sik; achangmak inchu innshunga neinâk rakip kha intheng mak tia phông sik kae. Khava sōa inna khan kase sik

³⁷ khana nat kha ava-ente sik. Khana khan a’n-êm leh akasensor abi bang chunga asâkna a’nlâr inchu,

³⁸ inn kha adahlona ni 7 akira ada sik kae.

³⁹ Ni 7 tluk ning ama hong inle sik a kha a-ente nôk sik. Nat kha alensa inchu

⁴⁰ nat kopna hlung kha losōt a a’nthengmak hmun khōpui vângting hlonsōtna sik a ṭong amasō sik kae.

⁴¹ Khava sōa ashung intong banghei kha khok heia vai intei hei kha khōpui vângtinga hmun intheng mak a vahlon sik hei kae.

⁴² Khava sōa hlung a’nlosōt hei kha hlung alak vâng thleng heia, athera bang kha vai tei sik kae.

⁴³ Inn kha hlunghei losōt sōa, abang a’nkhok sōa, avea vai teisōa, nat kakop kha asōk ṭhak inchu,

⁴⁴ thempu kha akasea ava-en sik kae. Khavakha aleilensa inchu, inn kha intheng mak jo.

⁴⁵ Khava inn kha ṭhet sik kae, ahlung, athing, vai intei rakip kha khōpui vânga hmun intheng makna hlonsōt sik hei kae.

⁴⁶ Inn kha kir a a-omlai khan tu inkhat ahlut inchu khōhlei katlunga a’nthengmak sik kae.

⁴⁷ Tu inkhat innshunga akajea akasâk kha apōn leh ader asôp sik kae.

⁴⁸ Inn kha vai a’nteisōa thempu khan ava-ente pha nat kakop kha aleilensa mak inchu, inn kha beklanga intheng jo tia aphông sik kae, ajârchu nat kakop kha inthengpet joa kae.

⁴⁹ Inn manthengna sik a va 2, cedar thing ajing, pat-hrui kasen leh Phibur hyssop inkhat achoi sik kae.

⁵⁰ Va inkhat kha ralei thlengkam akapût tui intheng aka-om chunga khan athat sik.

⁵¹ Khava sōa cedar thing, hyssop, pat-hrui kasen khana akahring vahei kha aloa va thisen leh tui intheng shunga khan aphum sik hei. Inn kha vōi 7 akathing thlōn sik.

⁵² Hing’hin va thisen, tui intheng, va kahring, cedar thing, hyssop, leh pat-hrui kasen vânga inn kha amantheng sik kae.

⁵³ Khan chu va kahring kha khōpui vângtinga ramhânga amanjōng sik jo. Hing’hin inn mantheng sōtna rōi kha atlosōt sik kae.

⁵⁴ Hihei hi nat kakhôk chungchânga dânhei kae;

^55-56 a’nthling, khōihli, akapât hei khana pōn leh innheia nat kakop hei chunga sik kae.

⁵⁷ Heikhat a’ntheng leh a’nthengmak kha hiva dânhei hin amanhretna kae.