JUDE 1 - LEKHARABU INTHENG (BSI)

¹ Jesu Christa sōk, James naipa Jude a inphut Jesu Christa takahuk hei leh– Pa Pathen lungsetna shunga aka-om, Pathen tabek hei hneng kaheimazet kae:

² Maritna, lung mōngna, khana lungsetna pui katluk set a nanta chang rasoh.

Mi’nthei Kadikmak

³ Kaṭhōn marit hei, eini nikhenga in-anghrep a nichen jo hukmanhringna chungchânga, vōi khat rōk a ahei tik a sik a Pathen in amihei apek jo hei khava taksenna sik a hin re nantuk manjônna sik mazet sik chei hi arangei ti kamandon pha, tûn nanmathokna katorchena kaheimazet chei kae.

⁴ Ajârchu nikâra Pathen inhret mak mi ṭhahrep marûk a hongkahlut jo hei, anmani’n ni-Rōngpu leh mi inthei oja inkhat rōk Jesu Christa kha hnōm mak hei, tâk anhurna omchenhei thuptheina sik a Pathen maritna me ṭong kha aluk-alet a anhmanga kae. Anmani’n antachen sik masetna kha Ṭong intheng in hmalaia inphut aleihrisa jo kae.

⁵ Hivahei rakip chunga hin nanmanhret joa achang inum, heikhonga mo Rōngpu khan Egypt ram a inphut Israel mihei alei huksōt heia, hnung leh chu aṭong kataksen mak hei asuk manhmang hei kha nantamandonsōt nôk sik kamadu.

⁶ Khan chu marvân ngevahei anratha neinahrep shunga aka-om mak hei, anhmun kadahlon hei kha: kani lûnpui ninga maset kachen sik heia, kumsôt a thirhrui vâng Pathen in akhit heia, ralei thōi inthim shunga akhum hei hi nangni’n mandonsōt ruh.

⁷ Khan nôk chu Sodom leh Gomorrah, khana ahneng vena khōpui mihe’n, khava ngevahei taleitlo kapōa omchen kadikmak antatlo leh anjôngna hei kha: mi rakip mansena sik inkhat a kumsôt hmei vâng karâkna antahmu kha mandonsōt ruh.

⁸ Kha leh in-anghrep a, hiva mihei hin antaksa kadōia set antlona sik hmangtalâr anneia kae; anmani’n Pathen ratha neina khôk sakmak hei, chungtinga lûrna hei anmanuisōa kae.

⁹ Ngeva kalenpen Michael kapha khan hmen hinga tlomak. Moses taksa kalōng chenna sik Diabol leh an-inchu pha khan hnōisena ṭong vâng raseiloa, “Rōngpu khan rasei che rasoh!” atihrep kae.

¹⁰ Tâk-kha hiva mihei hinchu antamanhret phâkmak heirakip kha anhrimaset; anmanuisō, khana ranhring kapōa aphônga manhretna antaneitak khan asukset heia kae.

¹¹ Anmani sik a heituk-hrep a ṭit aka-om jo mo! Anmani’n Cain kahnung kha antajui kae. Sêr maduna jâra Balaam taleihro setna hlam kha anjui jo. Korah redōi kapōa andōi jâra suk manhmang kachang jo hei.

¹² Nan-inloikhômna reveia anmani kha inzak loa anrasa tam jâra akachok kapō kachang hei. Anbinga anmani rōk, khôk insak hei. Anmani kha thli tatlen sumtuk, khōtui kase kapō, kara kaneimak thingkung, ṭhelai kapha’m arajung pum a a’nlirsōt a akathicher kapō hei kae.

¹³ Tuipui in-nông inhnak kapōa anṭōntlo inzakpui ka-om kha tui chiphôn kapōa a’nlâr kae, ârsi kalônle kapō hei kae. Khava jâra Pathen in anmani sik khō inthimpak khur inthûkjap ahei tik a sik amantluk pek jo hei.

¹⁴ Adam a inphut khang 7 tlukna Enoch in hmalaia inphut hing’hin aleihri: “Rōngpu kha angeva intheng lishing katamtak leh inṭhōia akajōng sik kae

¹⁵ pathen inhret mak hei ṭōntlo rakip, pathen inhret mak set katlo he’n ama dōina ṭit ka-om tak ṭong anhrina chunga, ṭong atan sik a kae!”

¹⁶ Anmani aheitik a tlaithei loa kaṭong chōr-chōr heia mi anmaset; anbinga ṭhatmak maduna anjui; anbinga inlensak hei; inhri inṭha heia anhnemna sik a chu anbeisō anmanhōia kae.

Rakôkna leh Mansena

¹⁷ Tâk-kha kaṭhōnhei, ni-Rōngpu Jesu Christa sonle he’n hma anta leihripek chei kha mandonsōt ruh.

¹⁸ Anmani’n nanhnenga, “Kani hnung intongting chu, khava pathen inhret mak omchen kajuihei, nangni innuisō mi ahong kasōk sik hei kae” anleiti.

¹⁹ Khava mihei kha mi kasukṭhen hei, antaksa tamadu hurna hlam kajuihei, Rathla kaneimak hei kae.

²⁰ Tâk-kha kaṭhōnhei, nangni chu taksenna intheng chunga khan nanbinga insyemsōt ruh. Rathla intheng ratha hratna vâng derṭhak ruh.

²¹ Ni-Rōngpu Jesu Christa lungsetna vâng kumsôt hringna apek sik chei kha hngâkna leh inṭhōia, Pathen lungsetna shunga inhrung una omṭhak ruh.

²² Akataksen inchênmak malung inkei-chioa ka-om hei chunga lungsetna malâr ruh;

²³ hmei kâra inphut keisōt hei una hukmanhring hei ruh; khan chu alak he’m ṭitpum a inchunpui hei una anchunga nanlung setna malâr ruh, tâk anhur leh êm setna kabek anpōn leh der khachu mater ruh.

Choi ka-ânna Derna

²⁴ Nangni nan-inpai inthlûk makna akatlo tor leh ṭhena neimakna leh alûrna ângshunga inpâkna anikapek tor,

²⁵ ani kahuk inhring Pathen inkhat rōk hnenga, ni-Rōngpu Jesu Christa jâra, lûrna, kajana, ratha hratna, torna ratha kha a’nphutbia inphut tûn katlung, khana are-rea atâ changṭhak rasoh! Amen.