JOSHUA 7 - LEKHARABU INTHENG (BSI)

Achan Setna

¹ Suk manhmang sik a ka-om neinâk inkhatbek Jerichoa inphut lomakna sik a Rōngpu’n Israel hnenga ṭong apek kha, Achan inti mi inkhat in ṭongpek kha juimak jo, khava jâra Rōngpu’n Israel chunga ahnuk kana hêr jo. Achan kha Carmi sapa khana Zabdi tupa kae, Zerah innshunga mi kae, Judah phungṭhen inkhat kae.

² Joshua’n mi ṭhahrep Jerichoa inphut Bethaven hnenga, Bethel nisōtinga ka-om khōpui inkhat Ai a, anvase leh ram anvatetōkna sik ṭongpek leh inṭhōia, aleitir hei. Khanga antlo pha,

³ Joshua hnenga ṭong anhei mathlung: “Mi rakip in Ai chunga vabuhlu sik rangei mak. Pase 2,000 a-emak leh 3,000 kapō rōk tir hei roh. Sonna re katlo sik a remi ankhenga tir mak hei roh; khōpui kalen changmak.”

⁴ Khava jâra Israel mi 3,000 kapō he’n re anleituk, tâk anmani rumhrat a anhei hnong male jo hei.

⁵ Ai mihe’n khōpui sōngkot a inphut suktlâk ṭhahrep katlunga anhei hnongsōt hei khana tlâng thōiting anhong tlânna kâra mi 36 anleithat jo hei. Khanachu Israelhei kha an-in ngamna kha inhmang jo khana kaṭi jo hei.

⁶ Joshua leh Israel hlamkakeihei kha anmalung nat a anpōn ankeihler jo, Rōngpu Intepna Bôm hmaikunga inbok jo hei, anmalung inrengna malârna anlu chunga ravut ankanoa khōhlei katlung khan leika-om hei.

⁷ Khana Joshua’n ati, “Chunghnung Rōngpu! Heisa mo Jordan re namankea nahei thōi ung? Keini Amorhei hneng pek sōtna sik a mo? Keini suk manhmangna sik a mo? Jordan rekhat ting khanga heisa mo aka-om mak ung?

⁸ O Rōngpu, tûn ke’n heimo kahri sik, Israelhei leh kha kan-inrepui heia inphut hong inle jo hei?

⁹ Canaanhei leh ram shunga aka-om rakip in hiva chungchânga anthei sik jo. Anmani’n ankekhum sik jo ung khana anthatsō sik jo ung! Khan chu nang kajana heikhong inmo aka-om sik jo?”

¹⁰ Rōngpu’n Joshua hneng ati, “Ṭhōi roh! Heisa mo nang raleia hinga a’nbok che?

¹¹ Israel in setna atlo jo! Ke’n anmani tajui sik a kapek hei intepna kha anvōkkhōi jo. Suk manhmang sik neinâk ṭhahrep anlo jo. Anmani’n anmarûk a maleisei anhria anneinâk hei kâra andasap jo hei.

¹² Hiva jâra hin Israel he’n an-inrepuihei kadōia ngir tor mak hei. Anmani anhnenga inphut hong inle hei ajârchu anmani kalalen hi suk manhmang sik a themmô manchen jo hei kae! Nangni’n inlomak ruh tia ṭong a’npek chei neinâk kha nansuk manhmang mak inchu nangni ke’nchu ompui mak chei ning!

¹³ Thōi roh! Mipui suk manthengsōt hei roh khana kahnenga anhongna sik a mantluk hei roh. Ajîng kania an-intluk dekna sik manthei hei roh, ajârchu Rōngpu kei, Israelhei Pathen in hivahi hri sik a kanei: ‘Israel, ke’n manhmang ruh tia ṭong kapek chei neinâk ṭhahrep nanhnenga ka-om jo! Khava neinâk-hei kha nanhnenga inphut nanlosōt mak inchu nan-inrepuihei kadōia ngir tor mak tin chei!’

¹⁴ Khava jâra jîngkâra anmani anphung anphung et a hmating nahei thōisōt sik hei kae. Ke’n kakhing phung kha, phungkhai phungkhaia hmating akahong sik hei kae. Ke’n kakhing phungkhai kha innkō inkōa hmating akahong sik hei kae. Ke’n kakhing innkō kha mi inkhat inkhat a hmating akahong sik hei kae.

¹⁵ Khava sōa ke’n kakhing khana maset neinâk-hei leh a’nsur jo mi inkhat kha, an-innshung leh aneinâk seng ro mankâng sik kae, ajârchu Israel chunga inzak ka-om tak ahei rôn sōt khana kei intepna kha asuk khōia kae.”

¹⁶ Abân jîngkâr hmatak a Joshua’n Israel kha hmating aheiṭhōisōt jo hei, anphung anphunga, khana Judah phung kha akhing jo.

¹⁷ Ama’n Judah phung kha hmating aheiṭhōisōt jo, phungkhai phungkhaia, khana Zerah phungkhai kha akhing jo. Khava sōa Zerah phungkhai kha hmating aheiṭhōisōt jo, innshung innshunga, khana Zabdi innshung kha akhing jo.

¹⁸ Khava sōa ama’n Zabdi innshung kha hmating aheiṭhōisōt jo, mi inkha-khat a, khana Carmi sapa, Zabdi tupa Achan kha akhing jo.

¹⁹ Joshua’n ahnenga ati, “Kasapa, Israel Pathen, Rōngpu hmaikunga inthenga hrisōt roh, khana naṭhena kha phôngsōt roh. Heimo natlo amanthei roh. Kahnenga thup mak roh.”

²⁰ Achan in amasôn, “Kadik, Israel Pathen, Rōngpu kadōia setna katlo jo, kei tatlo kha hivahi kae.

²¹ Nichomsōt jo neinâk-hei kâra, Babylonhei pōn kaṭhatak inkhat, dangka kilograme 2, sanatlōn kilograme aherkhat kahrik kaleihmu hei. Kamadu rei heia kaleilo jo hei. Kapōn-innshunga kaphûm, dangka kha athōipena nanvahmu sik hei.”

²² Khava jâra Joshua’n mi ṭhahrep atir hei, pōn-innting katlân heia khava maset neinâk-hei kha kadiktak a, dangka khan athōipena anvahmu jo.

²³ Pōn-inna inphut anheilosōt heia, Joshua leh Israel pumpui hei hmaikunga anheichoi, khana Rōngpu ângshunga anda jo hei.

²⁴ Joshua leh Israel pumpui in Achan leh dangka, pōn, sanatlon, khana Achan sapa leh sanuhei, se, shakōrtung leh kemōnghei, apōn-inn, anei ahao rakip ansur jo; khahei kha Inrengna Phaichama anchoi jo hei.

²⁵ Khana Joshua’n ati, “Heisa mo hiva inrengna hi kanchunga nahei rôn sōt? Tûn Rōngpu’n nachunga inrengna amathlung jo!” Khava sōa mipui in Achan kha hlung vâng andengthat jo; a’nshung mihe’m andenghlon heia anei ahao rakip leh anro mankâng jo hei.

²⁶ Achunga hlung katamtak anbuk a tuning katlung khanga laka-om. Khava jâra khava hmun kha Inrengna Phaicham antia kae. Khava sōa chu Rōngpu kha ahnuk namak jo.