JOSHUA 24 - LEKHARABU INTHENG (BSI)

Shechema Mipui hneng Joshua’n Ṭong Ahri

¹ Joshua’n Israel phung rakip Shechema abek mantûp jo hei. Upahei, hlamkakeihei, ṭongkatanhei, Israel ṭōnpui karônhei, Pathen omna shunga kahong heia.

² Joshua’n mipuihei hneng ati, “Hivahi Rōngpu Israel Pathen tati kha kae: ‘Tenlai nanpusōn he’n Euphrates Tuidung lang khat ting leika-om hei khana pathen ralak anleikamuk hei. Khava pusōnhei kâra inkhat kha Abraham leh Nahor hei pa, Terah kae.

³ Khana inphut ke’n nanpusōn Abraham kha Euphrates rekhat a inphut kaṭhōisōt a Canaan ram katlung bit a kaheiṭhōia kae. Khana sōn leh pâr katamtak kaleipek. Ahnenga Isaac kaleipek,

⁴ khana Isaac hneng Jacob leh Esau kapek hei. Esau kha Edom tlângram akarōi sik a kapek, tâk nanpusōn Jacob leh asahei khachu Egypt a leikase suk heia kae.

⁵ Hnunga Moses leh Aaron katir heia Egypt chunga inrengna kamathlung. Tâk ke’n kaṭhōisōt chei;

⁶ Nanpu sōnhei kha Egypt a inphut kaheiṭhōisōt hei, khana Egypt he’n shakor gâri leh ke remi vânga anhei hnong hei. Tâk-kha nanpusōn he’n Tuipui Kasen anheitlung pha

⁷ inthōpuina sik a kahnenga ka-ông hei, khana anmani leh Egypt hei kâra khō inthim kadapek hei. Tuipui kha Egypt hei chunga kamaher malet pek heia kamanchûmsi jo hei. Egypt hei chunga kaleitlo kha nangni’n nanmanhret. “‘Pha kasôttak nêrdiram a leika-om chei.

⁸ Khava sōa Jordan nisōtinga aka-om Amorhei ram a kaheiṭhōi chei. Anmani’n re an-intukpui chei, tâk anchunga retorna kamannei chei. Anram nanhlō jo, khana nangni hmating nanhong nam pha ke’n kasuk manhmangsō ri hei.

⁹ Khava sōa Moab reng Zippor sapa Balak in nanchunga re aleituk. Beor sapa Balaam hneng ṭong apek a nanchunga hâksêrna sik a aleingek.

¹⁰ Tâk ke’n Balaam ṭong leilo mak eng, khava jâra ama’n nangni mahâmṭhat aleipek chei, hing’hin Balak a inphut kalei huksōt chei.

¹¹ Jordan nanleirakan khana Jerichoa kahong chei. Jericho mihe’n nanchunga re anleituk, khanga Amorhei, Periz hei, Canaanhei, Hit-hei, Girgash hei, Hivhei, khana Jebush he’n anleituk chei. Tâk ke’n ankhenga chunga torna kaleipek chei.

¹² Nangni’n hmating nanhei nam pha, Amor reng 2 hei hnongsōtna sik a anmani ṭit-inpirna kalei mannei hei. Nangni chemjâm leh saihei kha heite hmang sik a rangei mak.

¹³ Nangni’n nanta thlō hêrmak ram khana nantasak hêrmak khōpuihei kha ke’n nangni kapek chei. Tûnchu nangni khana khan ka-om cheia, khana nangni’n nantaling hêrmak vomhrui leh olive kara kha nansâk jo.’

¹⁴ “Joshua’n ahrisa a, “Tûnchu, Rōngpu kha kaja ruh khana malung inthengtak a leh taksentak a ama razen ruh. Mesopotamia leh Egypt a nanpusōn he’n antakamuk pathenhei kha hlonsōt ruh, khana Rōngpu rōk kha razen ruh.

¹⁵ Ama nanrazen hnōm mak inchu, tu mo nanta razen sik kadei ruh, Tuning hin Mesopotamia nanpu sōnhei taleikamuk pathen mo a-emak leh tuna nan-omna Amorhei pathen mo? Kei innshung leh kei sik a chu, Rōngpu kha kanrazen sik.”

¹⁶ Mipui he’n anmasôn, “Pathen ralak kadeina sik a Rōngpu kha dahlon hêrmak ni’ung!

¹⁷ Rōngpu ni-Pathen khan nipahei leh eini Egypt a sōk changna inphut aheiṭhōisōt me, khana ama’n ṭōn-inlak aleitlo hei kha nihmusō jo. Eini’n jât rakip hei kâra nipetan tor hei, phatina inhuktak a ada me.

¹⁸ Hiva ram shunga hmating ni-injôk pha khana aleika-om Amorhei seng kha ahnong sōt hei. Khava jâra eini’num Rōngpu kha nikamuk sik kae; ama kha ni-Pathen kae.”

¹⁹ Joshua khan mipuihei hneng ati, “Tâk-kha nangni’n Rōngpu kha razentor mak tin chei. Ama chu a’ntheng Pathen kae khana nansetna arangei mandam mak ning. Akadōi inkhatbek desôttor mak ning,

²⁰ ram hlop pathen razenna sik a ama nandahlon jo’nchu, nanchunga ahnget sik cheia kha akarâk sik chei. Hmalai khan nanchunga aleiṭhat hêr inum, tunchu asuk manhmang sik jo chei.”

²¹ Mipui he’n Joshua hneng anti, “Changmak! Keini’n Rōngpu kanrazen sik.”

²² Joshua’n anhnenga ati, “Nangni’n Rōngpu razen sik a nankadeina chunga hin nangni nanbing sik a sâkhi jo chei kae.” Anmani’n anti, “Kadik, keini sâkhi ung kae.”

²³ Ama’n angek heia ati, “Khan chu, khava ram hlop pathenhei kha hlonsōt jo hei ruh khana Rōngpu, Israelhei Pathen ṭong juina sik a intep jo ruh.”

²⁴ Khava sōa mipui he’n Joshua hneng anti, “Keini’n Rōngpu kan-Pathen kanrazen sik. Keini’n aṭongpek-hei kanjui sik.”

²⁵ Khava jâra ama’n khava ning khan mipuihei sik intepna inkhat asyema khava Shechema khan antajui sik dân leh chôndânhei apek hei.

²⁶ Joshua’n hiva ṭongpek-hei hi Pathen Dânrabu shunga amazet hei. Khava sōa hlung kalentak aloa Rōngpu hmun intheng shunga sasōkung thōia aphun.

²⁷ Mipuihei hneng ama’n ati, “Hiva hlung hi eini sâkhi sik kae. Rōngpu’n nihnenga ahri ṭong rakip hivahin atheisō. Khava jâra nan-Pathen chunga dekna nannei makna sik hivahi nanchunga sâkhi kae sik.”

²⁸ Khava sōa Joshua’n mipuihei kha atirsōt jo hei, anmani anramṭhen et a inle jo hei.

Joshua leh Eleazar Thina

²⁹ Khava sōa, Nun sapa Pathen sōk Joshua kha akum 110 a kathi jo.

³⁰ Ama aram Gaash Tlâng sak a, Ephraim tlângram, Timnath Serah a ama anleihre jo.

³¹ Joshua kha ahring lai seng Israel mipui he’n Rōngpu kha anleirazen, khana ama athisō a’m Israel sik a Rōngpu ṭōn leitlo rakip aleikahmu hlamkakeihei anhring lai seng chu anrazen manjōm a kae.

³² Joseph kalōng Egypt a inphut Israel mipui he’n anta heichoi kha Jacob in Shechema, Hamor sahei hnenga inphut dangka 100 apek a arachôk ramhar shunga, Shechema anleihre jo. Hiva ram hi Joseph sōn he’n karōia anchen a kae.

³³ Aaron sapa Eleazar kha kathia asapa Phinehas hneng ale’npek, Ephraim tlângram khōpui, Gibeah a anleihrea kae.