JOSHUA 2 - LEKHARABU INTHENG (BSI)

Joshua’n Jericho Ka-en inthlip Atir hei

¹ Khava sōa Joshua’n Acacia rephōra inphut mi 2 Canaan ram rirûk a ka-en inthlip sik a atir hei, akakhôk pena Jericho khōpui sik a. Khōpuia khan antlung pha, Rahab intinu notinu inna jân karek sik a leikase hei.

² Jericho rengpa’n khava ning jân Israel ṭhahrep ram ka-en inthlip kahong hei ti hi aleithei jo,

³ khava jâra Rahab hneng ṭong aleitir: “Na-inn shunga mihei kha ram pumpui ka-en inthlip a akahong hei kae! Heikeisōt hei roh!”

^4-6 Amanu’n amasôn, “Mi ṭhahrep ka-inna kahong hei, tâk anmani khona inphut kahong hei mo manhret mak hei eng. Kani tlâksōa, khōpui kot a’nkam mak hma kasesōt jo hei. Khonting akase hei mo manhret mak eng, tâk inranga nanhnong he’nchu nansur tor sik hei.” (Tûnchu Rahab in khō ka-en inthlip 2 hei kha innphu chunga aṭhōi heia khana aleida sapôt hlom thōia athup jo hei.)

⁷ Rengpa mihei kha khōpui kha andahlon jo, khana kot kha ankam jo. Jordan re kena katlunga ram ka-en inthlip Israelhei ka-en sik a vakase hei.

⁸ Aka-en inthlip he’n jâna anje mak hma, Rahab kha phuchunga kakea,

⁹ anhnenga avahri, “Hiva ram hi Rōngpu’n nanhnenga apek jo chei ti hi kamanhret. Ram shunga mi rakip in nangni anṭit hêr jo chei.

¹⁰ Nangni’n Egypt nanhei dahlon pha Rōngpu’n Tuipui Kasen amanchâr kha kanthei jo. Jordan nisōtinga Amor reng 2, Sihon leh Og nantathat hei kha’m kanthei jo.

¹¹ Khahei kha kanthei lim leh kaṭisō jo ung; nangni jâra kanmalung hratna rakip inhmangsō jo. Rōngpu nan-Pathen kha marvân chung leh hiva raleichunga Pathen kae.

¹² Tûn ke’n nangni chunga katlo kapōa ka-innshung chunga lungset a kantlo sik tia ama rahminga inhâksêr ruh, khana kataksena sik chei mêrchîkna ṭhahrep apek ruh.

¹³ Kapa, kanu, khana kasōpuihei leh an-innshung rakip kanhuk sik hei tia kahnenga intep ruh! Keini amanthat mak hei ruh!”

¹⁴ Pasehei kha’n amanu hneng anti, “Kantahri kapōa kantlosōt mak inchu Pathen in kanhringkhō lo rasoh! Keini ṭōntlo hi tûte hneng nahrisōt mak inchu nahnenga keini intep ung khachu hiva ram hi Rōngpu’n apek ung pha, kaṭha kanhrung sik che.”

¹⁵ Rahab kha khōpui shunga bang leh a’nkop inna aka-om kae, khava jâra mihei kha hrui inkhat vâng amakhei maṭhum jo hei.

¹⁶ Amanu’n ati, “Hmebungting son se jo ruh, achangmak inchu rengpa mihe’n anhmusōt sik chei. Khana khan anmani anhong inlemak kârseng ni 3 inthup ruh. Khava sō leh nanhlam nanhro thei sik.”

¹⁷ Pasehei khan amanu hneng anti, “Intepna namantlo ung kha keini’n kannit sik.

¹⁸ Nang in natlo nger sik khachu hi kae. Keini’n narama re kanhei kōn pha, hiva patsen hrui hi namaṭhumna ung nathlikōt a leikhit roh. Khan chu napa nanu nasōpuihei seng hiva innshunga hin intûp ruh.

¹⁹ Tu inkhat in inn hinna inphut vâng asōk inchu, ama thina kha abing ṭhena kachang sik, keini’n themmô chenmak ning; tâk tu inkhat nang leh innshunga aka-omsap kha antôn inchu, khachu keini’n themmô kanchen sik.

²⁰ Achang ravâng, kanṭōntlo kha tu inkhat hneng nahrisōt inchu, nahnenga tlopek sik chea intepna namannei ung kha nitmak ning anti.”

²¹ Amanu kahnōma amanse jo hei. Anmani ansesōt pha, amanu’n pat-hrui kasen kha thlikot a akhit jo.

²² Aka-en inthlip hei kha hmebungting kase heia va’nthup jo hei. Rengpa mihei khan anmani kha ni 3 ram shunga akir akâk a anleijong hei, tâk leihmu mak hei, khava jâra Jerichoa he’nle hei.

²³ Khava sōa aka-en inthlip hei kha hmebunga inphut heikaṭum hei, tuidung anrakana, Joshua hneng inle jo hei. Omchen kasōk rakip kha ama hneng anleimanthei,

²⁴ khana anti, “Rōngpu’n ram pumpui so apek jo me tia inngamna kannei. Sonna ka-om mi rakip in eini anṭit hêr jo me.”