JOSHUA 17 - LEKHARABU INTHENG (BSI)

Tlaitlâk Manasseh

¹ Jordan tlaitlâk tinga ramṭhen inkhat Joseph sapa upa Manasseh sōnhei innshung ṭhahrep hneng manchen hei kae. Gilead pa Machir kha Manasseh sapa upapen kae khana remi kahrâng inkhat kae, khava jâra Jordan nisōa Gilead leh Bashan kha amanchen jo.

² Jordan tlaitlâk tinga ram kha Manasseh innshung alakseng hnenga manchen hei kae: Abiezer, Helek, Asriel, Shechem, Hepher, khana Shemida. Hihei hi Joseph sapa Manasseh sōn leh pâr pasehei kae, khana anmani hi innshung upahei kae.

³ Manasseh sapa Machir, Machir sapa Gilead, Gilead sapa Hepher, Hepher sapa Zelophehad khan sapase inkhatbek neimak, sanuhngâk rōk anei. Anmani rahming kha Mahla, Noah, Hogla, Milcah, khana Tirza hei kae.

⁴ Anmani thempu Eleazar leh Nun sapa Joshua leh hlamkakeihei hneng kase hei, khana anti, “Rōngpu’n Moses hneng keini leh kansōpui pasehei hnenga ramṭhen ṭhahrep pekna sik a ṭong aleipek ung tia anvahri.” Achang jâra, Rōngpu ṭongpek dungjuia, anmani ansōpui pasehei ram chen kha le’npek jo hei.

⁵ Khava jâra Manasseh in Jordan nisōtinga Gilead leh Bashan achenna chunga ram chen 10 achensa,

⁶ ajârchu nuhmei sōn leh pase sōn he’n ram chen anchen et a kae. Gilead ram hi Manasseh sōn leh pâr ralak-hei anmanchen jo hei.

⁷ Manasseh ramṭhen hi Asherah inphut Shechem nisōa, Michmethath katlung kae. Ramri kha thlang ting kasea Entappua mihei avahōm hei.

⁸ Tappuah kimvea ram kha Manasseh ta kae, tâk ramritak a Tappuah khōpui khachu Ephraim sōn leh pârhei ta kae.

⁹ Ramri kha Kana kavakōk a katlâk a kae. Kavakōk thlanga khōpuihei, Manasseh ramṭhen shunga an-omjen ravâng Ephraim tahei kae. Manasseh ramri hi kavakōk sak tinga asirdung ajuia Mediterranean Tuipuia akabâng kae.

¹⁰ Ephraim kha thlânga, Manasseh khan sak a ramri Mediterranean Tuipui kha anmani tlaitlâk tinga anramri kae. Asher in sak leh tlaitlâk, Issachar in sak leh nisōa ka-om.

¹¹ Issachar leh Asher ramṭhen shunga, Manasseh in Beth Shan leh Ibleam, khana ankimvea hmunpui hei, inṭhōia Dor (tuipanga khō inkhat), Endor, Taanak, Megiddo, khana ankimvea khōpuihei aleichensa hei.

¹² Achang ravâng, Manasseh mipui he’n khōpui heia aka-om mihei kha leihnongsōt tor mak hei, achang jâra Canaanhei kha khana khan ka-om injôn heia kae.

¹³ Israel he’n anhong hrat chet jo enum, Canaanhei kha ankhenga leihnongsōt mak hei, tâk ansik a rumhrat tak a ṭōn anleimantlo heia kae.

Ephraim leh Tlaitlâk Manasseh he’n Ram Antadersa

¹⁴ Joseph sōn leh pâr he’n Joshua hneng anti, “Kankarōi sik a heisa mo ramṭhen inkhat rōk napek ung? Keini mi katam ung ajârchu Pathen in mahâmṭhat apek ung.”

¹⁵ Joshua’n amasôn, “Nangni mi nantam inchu Ephraim tlângram khachu kasin rei sik, khan chu Periz leh Rephaim ram ratu shunga hlut ina ralei manhleng jo ruh.”

¹⁶ Anmani’n anmasôn, “Tlângram so keini sik a lenrei mak, tâk phaichama aka-om Canaanhei so thir shakor gâri annei hei, Beth Shan leh akimve khōpui heia ka-om hei khana Jezreel Phaichama ka-om heia kae.”

¹⁷ Joshua’n Ephraim leh Tlaitlâk Manasseh phunghei hneng ati, “Nangni mi katamtakbak chei, khana ratha kahrat chei. Nangni chen khat kakhea chenhlam kasōk chei.

¹⁸ Tlângram hi nangni chen ruh. Ratu shung achang inum nanmanhleng sik khana ramhmor inkhat a inphut ahmor inkhat katlung karōia nan inlo sik jo. Canaanhei chu, thir shakor gâri anneia anhratjen ravâng nanhnongsōt tor sik hei.”