JOSHUA 14 - LEKHARABU INTHENG (BSI)

Jordan Tlaitlâk tinga Ram sem

¹ Abân kajui khachu Jordan tlaitlâk tinga Canaan ram kha heikhonga mo Israelhei kâra antasem ti chungchâng kha kae. Thempu Eleazar, Nun sapa Joshua, khana Israel phung innshung hlamkakei he’n mihei seng hnenga anleisem pek hei.

² Rōngpu’n Moses hnenga ṭong apek kapōa, Jordan tlaitlâk tinga phung kō leh aṭimkhat hei ramṭhen kha vâng-enna neia anleisem jo.

^3-4 Moses’n Jordan nisō apang kha phung 2 leh aherkhat hei hneng amanchen dek jo hei kae. (Joseph sōn leh pârhei kha phung hnia inṭhen hei: Manasseh leh Ephraim.) Achang ravâng, Moses’n Levihei hneng ramṭhen inkhatbek leipek mak hei. Khava kanek a, anmani’n omna sik a khōpui leh anran leh ankemōnghei sik a hleipuk le’npek hei.

⁵ Israel mipui he’n Rōngpu’n Moses hnenga ṭong apek dungjuia ram kha le’nsem jo hei.

Caleb hneng Hebron Pekna

⁶ Ni khat Judah phunga mi ṭhahrep Gilgal a Joshua hneng kahong hei. Ankâra inkhat, Kenizz mi Jephunneh sapa Caleb inti kahonga ahnenga ati, “Rōngpu’n Kadesh Barnea a nang leh kei chungchânga Pathen mi, Moses hneng aleihri kha nang in namanhret.

⁷ Hiva ram ka-en inthlip sik a Kadesh Barnea inphut Rōngpu sōk Moses’n aheitîr eng pha khan kei kum 40 katluk jo eng. Ke’n akadiktak ṭong thangkōina ahnenga kaleinei.

⁸ Kha’num kale’nṭhōipui mi he’nchu nimipuihei ṭitna anlei mannei hei. Tâk-kha kei chu taksentak a Rōngpu ka-Pathen kaleijui.

⁹ Khanga katlosōt jâra, Moses’n kasahei leh ke’n kaleichōnna ram kha karōi chen sik a kanrahlâng nger sik tia le’ntep a kae.

¹⁰ Tâk-kha tûnchu, enroh. Rōngpu’n Moses hnenga aleitina inphut kum 45 kathleng jo. Khavakha Israel in nêrdiram aleilônlai kae, khana inphut Rōngpu’n aṭong tepna dungjuia kahringa aheida eng. Kei hi a-en roh! Kum 85 katluk jo eng

¹¹ Moses’n aleitirsōt lai eng kapōa khan tuning um lakahrat eng. Re tlona leh heikhat tlona sik a ratha kalaneiṭhak.

¹² Khava jâra tûn, kei leh kami he’n ṭong thangkōina kanleinei laia Rōngpu leitep pek eng tlângram kha apek jo roh. Khava lai takpum kalen jât Anakim inti hei kha khana khan khōpui bang kalen ankhôna ka-om hei tia kanlei manthei. Rōngpu’n a-ompui eng inchu, Rōngpu’n ahri kapōa, kahnong sōt sik hei.”

¹³ Joshua’n Jephunneh sapa Caleb kha mahâmṭhat apek jo khana Hebron khōpui karōi chen sik a apek jo.

¹⁴ Tûn katlung Hebron hi Kenizz mi Jephunneh sapa Caleb sōn leh pârhei tachen lakae, ajârchu ama’n Israel Pathen, Rōngpu kha taksentak a ajuia kae.

¹⁵ hiva mak hma, Hebron hi Arba khōpui tia le’nhret. (Arba hi Anakimhei khōpui kalenpen leikae.) Tûnchu ram shung kha mōngna kaleng jo.