JOSHUA 13 - LEKHARABU INTHENG (BSI)

Losa sik a Alaka-om Ram

¹ Joshua tûnchu kater hêr jo. Rōngpu’n ahnenga ati, “Nang kater hêr jo che, tâk tûnhin um lo sik a ram laka-om:

² Philisti leh Geshur ramṭhen rakip,

³ inṭhōia thlâng tinga Avvim ramṭhen seng. (Egypt hei ramria, Shihor kavakōk a inphut ramri katlung, sak tinga Ekron ramri katlunga Canaan tia a’nhret seng; Gaza, Ashdod, Ashkelon, Gath leh Ekrona ka-om Philisti renghei.)

⁴ Tûn katlung Canaan rengram leh Meara (Sidonhei ram), Amor ramria ka-om Aphek katlunga ram rakip laka-om;

⁵ Gebal-hei ram; nisōtinga Lebanon ram rakip, Hermon Tlâng thlânga aka-om Baalgad a inphut Hamath Rakanna katlung laka-om.

⁶ Hivahin Lebanon Tlâng leh Misrephoth Maim kâra tlângrama aka-om hei, Sidonhei ramṭhen rakip inveisa. Israel mipui he’n anhei injôk pha hiva mihei hi ke’n kahnong sōt pet sik hei.

⁷ Ke’n kahri pek che kapōa tûnchu ram hi phung kō hei leh Manasseh phungṭhen khat hei hneng, anmani karōi akachang thang sik a, sempek hei roh.”

Jordan Nisōa Ram Semna

⁸ Reuben leh Gad leh Manasseh phung ṭim hei chu Rōngpu sōk Moses’n aleipek ram kha anchen jo; khavakha Jordan Tuidung nisōtinga kae.

⁹ Anramṭhen kha Aroer (Arnon Phaicham khama) leh khava phaicham alaiṭima khōpui khana Medeba a inphut Dibon katlunga tlâng phaicham akhenga inveisa.

¹⁰ Khanga kasea Ammon ramri katlung khana Heshbona vai leikarôn, Amor reng Sihon vaihōmna khōpui rakip inveisa.

¹¹ Geshur leh Maacah ramtlâk Gilead, Hermon Tlâng rakip, Bashan rakip Salecah katlung inveisa hei.

¹² Ashtaroth leh Edreia vai leikarôn, Rephaim hei reng hnung kakhôrpen, Og rengram inveisa. Moses’n hiva mihei hi aleitor heia aleihnongsōt hei kae.

¹³ Achang ravâng, Israel mipui he’n Geshur leh Maacah a mihei chu leihnongsōt mak hei; Israel ram a ka-om ṭhak hei.

¹⁴ Moses’n Levi phunghei hneng chu ram leipek mak hei. Rōngpu’n Moses hneng amanthei kapōa, Rōngpu Israel Pathen maichâm chunga romanvâm inthoina ṭhen hei kha anmani chen a antarahlâng sik kae.

Reuben Ram Manchen

¹⁵ Moses’n ramṭhen inkhat Reuben phunga innshunghei hneng karōi chen sik apek hei.

¹⁶ Anramṭhen kha Aroer (Arnon Phaicham khama) leh khava phaicham alaiṭima khōpui khana Medeba kimvea tlângphai inveisa hei.

¹⁷ Heshbon leh tlâng phaichama khōpui rakip inveisa: Dibon, Bamoth Baal, Beth Baalmeon,

¹⁸ Jahaz, Kedemoth, Mephaath,

¹⁹ Kiriathaim, Sibma, tlâng chunga phaicham shunga Zerethshahar,

²⁰ Bethpeor, Pisga Tlângpang, khana Beth Jeshimoth hei.

²¹ Tlâng phaichama khōpui rakip leh Heshbona ka-om, Amor reng Sihon rengram seng. Moses’n ama leh Midian vaikarônhei leh aleitorsa hei: Evi, Rekem, Zur, Hur leh Reba hei seng. Ankhengpet a Reng Sihon sik a vai anleirôn.

²² Israelhei tathat hei kâra khan Beor sapa Tlâ-kasânpa Balaam hi’m kae.

²³ Jordan hi Reuben phunghei sik a tlaitlâk tinga ramri kae. Hivahei hi Reuben phung innshunghei hnenga karōi chen sik a a’npek khōpui leh khō kalenhei kae.

Gad Ram Manchen

²⁴ Moses’n Gad phung innshunghei hneng um ramṭhen apek hei.

²⁵ Anmani ramṭhen kha Jazer leh Gilead khōpui rakip, Rabbah nisōtinga, Ammon ram laiṭim Aroer katlung;

²⁶ anmani ram kha Heshbona inphut Ramath Mizpe leh Betomim, Mahanaima inphut Lodebar ramri katlung kae.

²⁷ Jordan Phaicham shunga Beth Haram, Bethnimra, Sukkoth, khana Zaphon, Heshbona Reng Sihon rengram seng kae. Anmani tlaitlâk tinga ramri kha Jordan Tuidung, sak tinga Galilee Dîr katlung kae.

²⁸ Hihei hi Gad phung innshunghei karōi chen sik a khōpui leh khō kalen a’npek hei kha kae.

Nisō Manasseh Ram Manchen

²⁹ Moses’n Manasseh phung ṭimkhat innshunghei hneng karōi chen sik a ramṭhen aleipek hei.

³⁰ Anramṭhen kha Mahanaim leh Bashan rakip inveisa hei, Bashan reng, Og rengram rakip, Bashana Jair khō 60 seng.

³¹ Gilead alaiṭim inveisa, Ashtaroth leh Edrei, Bashana Og rengram apui karôn khōpuihei inveisa hei. Hihei rakip hi Manasseh sapa Machira inphut ajōng kakōn innshung ṭimkhat hei hneng aleipek hei.

³² Hing’hin Moses’n Moab phaichama aleiomlai Jericho nisōtinga ram leh Jordan kha aleisem jo.

³³ Tâk-kha Moses’n Levi phung hnenga chu ram chen inkhatbek leipek mak hei. Anmani neichen sik khachu Rōngpu Israel Pathen hnenga inthoina ṭhensōt inkhat kha kachang sik tia amanthei hei.