JOSHUA 11 - LEKHARABU INTHENG (BSI)

Joshua’n Jabin leh A’nloipui hei Atorna

¹ Israelhei retorna ṭong kha Hazora Reng Jabin in athei pha, ama’n Madon Reng Jobab, Shimron leh Achshaph renghei hneng,

² khana sak tinga tlângrama renghei hneng, Galilee Dîr thlânga Jordan Phaicham shunga, tlângkhama ka-om hei hneng, khana Dor hnenga tuipui panga ka-om hei hneng ṭong aleitir.

³ Ama’n Jordan pang lang hnia ka-om Canaan, Amor, Hit, Periz, khana tlângrama Jebush-hei hneng, inṭhōia Mizpah ram Hermon Tlângkhama ka-om Hivhei hneng um ṭong aleitir jo.

⁴ Anmani anremi rakip leh kahong hei, remihei kha tuipui panga nêrdi ja kapōa mi katam hei. Shakor leh shakor gâri he’m annei heia kae.

⁵ Hiva renghei hin anremi anmanchun heia kahongsap hei khana Israelhei re katuk sik a Merom Kōk a rephōr anlei matunga kae.

⁶ Rōngpu’n Joshua hneng ati, “Anmani ṭitmak hei roh. Ajîng kania hiva phatak a hin anmani ankhenga Israelhei sik a kathatpet sik hei kae. Nangni’n anshakorhei ke nantuk mathlek pek sik hei khana anshakor gârihei hmeia nanro sik hei.”

⁷ Khava jâra Joshua leh ami seng in manhret manloa Merom Kōk a anbuhlu jo hei.

⁸ Anmani chunga Rōngpu’n Israelhei kha torna apek jo hei; Israel he’n anbuhlu heia sak tinga Misrephoth Maim leh Sidon katlung, khana nisōtinga Mizpah phaicham katlung anhnong hei. An-inrepuihei kha inkhatbek kahringa an-om mak katlunga re kha le’ntuk hei.

⁹ Rōngpu’n ṭong apek kapōa Joshua’n anhnenga aleitlo jo: ama’n anshakorhei anke antuk mathlek pek hei khana anshakor gârihei kha hmei aro pek hei.

¹⁰ Joshua khan hon’hea Hazor ram ahlōa areng kha’m athat jo. (Khava lai pha Hazor kha rengram rakip hei kanek a ratha kaneipen leikae.)

¹¹ Khana khan mi rakip anthat hei; tûte inkhat kahringa damak hei, khōpui kha hmei anro jo.

¹² Joshua’n hiva khōpui rakip leh anrenghei Rōngpu sōk Moses ṭongpek dungjuia asursō hei, khana athatsō hei.

¹³ Achang ravâng, bung chunga ale’nsak khōpuihei inkhatbek Israel he’n hmei romak hei, Joshua’n aleiro Hazor tei loa.

¹⁴ Israel mipui he’n khōpui heia inphut mankatam neinâk leh ranhringhei kha anmani chen sik a an-inda hei. Tâk mi rakip chu anleithat manram hei; kahringa tûte damak hei.

¹⁵ Rōngpu’n aṭongpek kha asōkpa Moses hneng aleipek, Moses’n khahei kha Joshua hneng aleipek, khana Joshua’n aleijui heia kae. Rōngpu’n Moses hneng ṭong apek rakip kha ama’n aleitloa kae.

Joshua Talo Ramṭhenhei

¹⁶ Joshua’n ram pumpui ahlō jo, tlângram leh tlânghmor hei, sak leh thlâng, Goshen ramhōm rakip khana khava thlânga ram kachâr seng, inṭhōia Jordan Phaicham leh.

^17-18 Edom hnenga thlang tinga Halak Tlânga inphut ramṭhen kha kasea, sak ting in Hermon Tlâng thlanga ka-om Lebanon phaichama, Baalgad katlung kae. Joshua kha hiva ramṭhen a renghei leh pha kasôttak re le’ntuk hei, tâk ama’n aleisurpet heia aleithatsō pet hei.

¹⁹ Israel mipuihei leh inchamna aleikatlo khōpui khachu Hiv ṭhahrep hei omna Gibeon kae. Alakseng chu rea tor rōk hei kae.

²⁰ Rōngpu’n anmani kha Israel kadōi sik a intlukna malung amannei hei, khavakha anmani pui katluk a suk manhmangna sik leh lungsetna kasea that manram theina sik a kae. Rōngpu’n Moses ṭong aleipek kha hivahi kae.

²¹ Hiva pha hin Joshua kasea tlângrama ka-om Anakim inti takpum kalen jât-hei asuk manhmang hei — Hebron, Debir, Anab khana Judah leh Israel tlângram rakip a. Joshua’n anmani leh ankhōpuihei pui katluk a asuk manhmang hei.

²² Israel ram Anakim inkhatbek dahlon mak hei; kha’num ṭhahrep chu Gaza, Gath, khana Ashdod a andahlon hei.

²³ Rōngpu’n Moses ṭong apek kapōa, Joshua’n ram pumpui kha ahlō jo. Joshua’n khavakha Israelhei hneng anchen sik a aṭhen pek hei, phung inkhat a ṭhen khat et asempek hei. Khana mipuihei kha retlo le’nhnga jo hei.