JOSHUA 10 - LEKHARABU INTHENG (BSI)

Amor Antorna hei

¹ Jerusalem reng Adonizedek in Joshua’n Jericho leh arengpa chunga aleitlo kapōhrep a, Ai kha ahlōa asuk manhmang cherna leh arengpa athatna kha aleithei jo. Ama’n Gibeon he’n Israelhei leh inhnōmna ansyema ankâra ka-om jo hei ti hi’m athei jo.

² Jerusalema mipuihei hiva ṭong hin malung inrimna kalentak apek jo hei, ajârchu Gibeon hi reng kanei khōpui ralak-hei kapōa akalen inkhat kae; Ai kanek a kalen chet, khana amihei re tuk kathemheia kae.

³ Khava jâra Adonizedek in Hebrona Reng Hoham, Jarmuth a Reng Piram, Lachish a Reng Japhia, Eglon a Reng Debir hei hneng ṭong aleimanrôn hei:

⁴ “Hong ruh, Gibeon chunga re tuk sik avabôm ruh, ajârchu ami he’n Joshua leh Israelhei hneng inchamna ansyema kae.”

⁵ Hiva Amor reng 5 hei, Jerusalem, Hebron, Jarmuth, Lachish, Eglon reng he’n anremi anmanchun jo, Gibeon ankakekhuma anbuhlu jo.

⁶ Gibeon mihe’n Gilgal a ka-om Joshua hneng ṭong anleipek jo: “Apu, keini adahlon mak roh! Inranga hong inna ava’nthōpui roh! Ahuk roh! Tlângrama Amor reng rakip inthō heia keini anbuhlu jo ung!”

⁷ Khava jâra Joshua leh aremi seng Gilgal a inphut kasesōt jo hei.

⁸ Rōngpu’n Joshua hneng ati, “Anmani ṭitmak hei roh. Retorna kha kapeksa jo che kae. Nangni kadōia tûte inkhat ngir tor mak hei ning.”

⁹ Joshua leh aremihei kha jân kathang Gilgal a inphut Gibeona le’njôk hei, khana Amorhei chunga sōkphutrōi buhluna anleinei jo hei.

¹⁰ Rōngpu’n Amorhei kha Israel remi anhmu pha ṭit-inpirna aleimannei hei. Israel he’n anmani Gibeona anleithat hei, khana tlâng rakanna Beth Horon katlunga anleihnong hei, thlânga Azekah leh Makkedah katlung anleibuhlu heia kae.

¹¹ Amor he’n Israel remi heia inphut tlâng rakanna ting antlânlai, Azekah kajōna antlânlai, Rōngpu’n kare-hlung kalen tatak anchunga ajōng mathlâk a kae. Hlungkare khan Israelhei tathat kanek a athatdet heia kae.

¹² Rōngpu’n Israelhei kha Amorhei chunga retorna apek ning khan, Joshua’n Rōngpu hneng ṭong aleihri. Israel senghei hmaikunga ati, “Kani, Gibeon chunga ngir ṭhak roh; Thla, Aijalon Phaicham chunga inṭâng roh.”

¹³ Jât he’n an-inrepuihei anhlōsō mak kârseng kani kha kangira ka-om khana thla kha inhling mak. Hivahi Jashar Lekharabu shunga inzet. Kani kha bōirōk alaitak a kangira ka-om khana ni khat katlung bit a leitlâk mak jo.

¹⁴ Hiva amak hma hiva kapō kani leiom phungmak, mihring ṭong Pathen in aleijui omphung mak. Rōngpu’n hiva kapō Israel langting ale’nṭanga re aleitlona hi!

¹⁵ Hivasōa, Joshua leh aremihei kha Gilgal rephōra le’nle jo hei.

Joshua’n Amor Reng Ranga Asur hei

¹⁶ Kha achang jo’num Amor reng 5 hei kha katlânsōt heia Makkedah hlungkhura le’nthup hei.

¹⁷ Mi inkhat in avahmu heia Joshua hneng an-inthupna kha aleihri pek.

¹⁸ Ama’n ati, “Hlungkhur hlutna hma son hlung kalen ṭhahrep heimakhōn ruh. Akahrung sik mi ṭhahrep da hei ruh,

¹⁹ nangni chu khan om mak ruh. Inrepuihei kha en madip hei ruh khana kahnungtinga inphut buhlu hei ruh; ankhōpui mantlung mak hei ruh. Nan Rōngpu Pathen in anmani chunga retorna ratha apek jo chei.”

²⁰ Joshua leh ami he’n anleithat hei, mi ṭhahrep chu ankhōpui shunga bang heia inhuk theina anhmua leithat mak hei.

²¹ Joshua mihei seng chu kadam senga Makkedah rephōra ahnenga he’nle hei. Ram shunga ka-om tûte inkhat in Israelhei kadōia ṭong hri tor mak jo hei.

²² Khava sōa Joshua’n ati, “Hlungkhur hlutna kha mahlâng jo ruh khana khava reng 5 hei kha kahnenga heiṭhōi hei ruh.”

²³ Khava jâra hlungkhur kha anmahlânga, Jerusalem, Hebron, Jarmuth, Lachish leh Eglon renghei kha anhei ṭhōisōt jo hei

²⁴ khana Joshua hneng anṭhōi hei. Joshua’n Israel mi rakip ahnenga abek hei khana amale ale’nṭhōi ṭōnpui karônhei kha anhongna sik khana anke vâng renghei hrak a anchōnna sik ṭong apek hei. Anmani’n khanga anleitlo.

²⁵ Khava sōa Joshua’n aṭōnpui karônhei hneng ati, “Ṭitmak ruh khana nanmalung mathla mak ruh. Intluk ruh khana inngam ruh ajârchu nan-inrepui rakip hei hnenga Rōngpu’n atlo sik kha hing’hina kae.”

²⁶ Khava sōa Joshua’n renghei kha athat heia thingkung 5 lera amakhei hei, khana khan ankalōng kha khōhlei katlung ka-om hei.

²⁷ Kani tlâk a Joshua’n ṭong apek heia, ankalōng kha anlo mathlâk heia anlei inthupna hlungkhur mama a khan anvahlon manhlut hei. Hlung kalen tatak hei hlungkhur hlutna khan anbuk hei, khahei kha tûn katlung khan laka-om hei.

Joshua’n Amorhei Ram Ahlōsa

²⁸ Joshua’n khava Makkedah reng abuhlua aleitha jo, arengram kha ahlō jo. Khōpui shunga aka-om rakip athat hei; akahringa tûte inkhat damak. Jericho reng hnenga aleitlo kapōa Makkedah reng hnenga atloa kae.

²⁹ Hivasōa, Joshua leh ami he’n Makkedah inphut Libnah a kase heia anbuhlu jo.

³⁰ Rōngpu’um Israelhei kha hiva khōpui leh areng chunga torna apek hei. Tûte inkhat ṭhenmak hei, khana aka-om mi rakip anthatsō hei. Jericho reng hnenga ale’ntlo kapōa rengpa chunga antloa kae.

³¹ Hivasōa, Joshua leh aremi kha Libnah inphut Lachish a kase heia, anva kekhuma anbuhlu jo.

³² Rōngpu’n Israelhei kha retukna ni 2 tluk ning Lachish chunga torna apek hei. Libnah chunga ale’ntlo kapōa, tûte inkhat ṭhenmak hei, khōpuia aka-om mi rakip anthatsō hei.

³³ Gezar a Reng Horam in Lachish inthōpui sik a kahong, tâk Joshua’n ama leh aremihei ator heia inkhatbek kahringa damak hei.

³⁴ Abânna, Joshua leh aremi he’n Lachish a inphut Eglon a kase heia, anva kakekhum heia anvabuhlu jo.

³⁵ Khava ning bât anhlō joa, Lachish a anta leitlo kapōa khana aka-om rakip anthat jo hei.

³⁶ Hivasōa, Joshua leh aremi he’n Eglon a inphut Hebron hmebung chungting kake heia anbuhlua

³⁷ khan anhlō jo. Rengpa leh khōpuia aka-om rakip khana anhnenga ka-om khōpui heia aka-om hei seng anthat jo hei. Eglon a aleitlo kapōa Joshua’n khōpui kha pui katluk a suk manhmangna kha aleinei jo. Inkhatbek kahringa damak a kae.

³⁸ Khava sōa Joshua leh aremi he’n Debirting hong inle heia khan anbuhlu jo.

³⁹ Ama’n ahlō jo, areng leh khava hnenga khōpuihei seng leh inṭhōia. Khana aka-om mi rakip anthat hei. Joshua’n Hebron leh Libnah khana anrenghei hneng aleitlo kapōa Debir chunga atlo jo.

⁴⁰ Joshua’n ram pumpui ahlō jo. Tlaitlâk tlângkhama, thlang tinga ram chârna hei seng leh inṭhōia, tlângram renghei hmaimôk apek jo hei, nisō tlâng panga, tûte inkhat ṭhensōt mak; mi rakip aleithat hei. Rōngpu, Israelhei Pathen ṭongpek kha hivahi kae.

⁴¹ Joshua ramtlâk hi thlâng ting Kadesh Barnea inphut tuipui pang hnenga Gaza, Goshen ramkei seng leh, sak tinga akahlapena Gibeon katlung kae.

⁴² Joshua’n hiva renghei rakip leh anramṭhen hi vōi khat tlâk a atorsō hei ajârchu Rōngpu Israelhei Pathen in Israel sik a re aleituk a kae.

⁴³ Hivasōa, Joshua leh aremi he’n Gilgal a anrephōra he’nle jo hei.