JONAH 2 - LEKHARABU INTHENG (BSI)

Jonah Derna

¹ Ngavon shunga inphut Jonah’n Rōngpu Pathen hnenga ader:

² “O Rōngpu kei inrenglai hin, kader che, nang in namasôn eng. Kathikhō inthûk a inphut na’nthō puina sik enga kabek che, nathei pek eng.

³ Tui-ôngpui inthûk laia nahlon manhlut eng, khana khan tui in ani kekhum tlit eng, natui in-nông inhnak khan kachunga hong inlet a kae.

⁴ Nahmai kunga inphut nahnong sōt jo eng khana nakamukna Bek-inn kha hmu nôk mak jo ning tia kaleimandon.

⁵ Tui kha kachunga kahonga kaphuk amansân tor mak; tuipui in ani makhu tlit eng, tuia phi he’n kalu ankatōmbit eng.

⁶ Hmebung ketak a vakatlung eng, ahei tik a kot a’nkhar ṭhakna ram a khan. Tâk-kha, O Rōngpu ka-Pathen nang in tui inthûkna inphut namanhring nôk eng.

⁷ Kahringkhō hi inhmang jo ti kamanhret pha, khana O Rōngpu nahneng kader che, nabek-inn inthenga khan nathei pek eng.

⁸ Akahnem mak limsyem inmuk hei khan nang kha adahlon jo che.

⁹ Tâk-kha ke’n nahnenga manpâkna hla kasak sik; nahnenga inthoina kapek sik che khana ka’ntepna kha katlosōt sik. Hukmanhringna hi Rōngpu a inphut akahong kae!”

¹⁰ Khava sōa Rōngpu’n Jonah kha tuipanga amasōsōtna sik a nga hnenga ṭong apek jo, khana khanga kachang jo.