JOHN INKHATNA 4 - LEKHARABU INTHENG (BSI)

Rathla Kadik leh Rathla Kadikmak

¹ Kaṭhōn marit hei, Rathla kachen ung kati rakip taksen mak hei ruh; tâk anmani rathla nei kha Pathena inphut mo enmansin hei ruh. Ajârchu sânkathem kadikmak katamtak hmun rakip a kasesōt jo heia kae.

² Hing’hin Pathen Rathla achang leh achangmak nangni’n nanmanhret thei sik; ti chu Jesu Christa kha mihring jōng kachang kati kha Pathena inphut akajōng Rathla kha achen jo kae.

³ Tâk-kha Jesu chunga akahnōm mak rathla kha Pathena inphut changmak. Ama rathla chen khachu Christa kadōipa a inphut kae; nangni’n ajōngna sik ṭong nanthei, kha tûn vânhnōia ka-omdek joa kae.

⁴ Tâk-kha kasahei, nangni Pathen ta chei kae, khana sânkathem kadikmak hei kha nantator jo hei kae; ajârchu nanshunga ka-om Rathla khan ralei ta kachang rathlahei kanek a ratha aneichet a kae.

⁵ Khava sânkathem kadikmak hei kha’n vânhnōi neinâk-hei chunga anhri, anṭong kha ralei mihe’n anrangei pek hei ajârchu anmani kha ralei tahei kae.

⁶ Tâk-kha eini chu Pathen ta me kae. Tu achang inum Pathen tahei khan niṭong anrangei. Hina inphut eini’n Rathla kadik leh akadik mak manhretṭhen torna kha nihritor.

Pathen hi Lungset Kae

⁷ Kaṭhōn marit hei, eini khat leh khat inlungset rih; ajârchu lungset hi Pathena inphut kae. Tu achang inum lungsetna kanei mi kha Pathen sa leh Pathen inhret kha kae.

⁸ Lungsetna kaneimak mi’n Pathen kha manhret mak; ajârchu Pathen kha lungset kae.

⁹ Eini’n ama a inphut hringna ninei theina sik, Pathen in Sapa inkhat rōk kha raleichunga ajōng tira eini alungsetna me kha amalâra kae.

¹⁰ Lungset kha hi kae: eini’n Pathen nilungset jâra changloa, ama’n eini alungset mea nisetnahei rangei mandam theina sik a Sapa kha ajōngtir kha kae.

¹¹ Kaṭhōn marit hei, Pathen in hinghrep a alungset me achang inchu, eini khat leh khat a’nlungset sik me kasōk.

¹² Tûte’n Pathen kha lahmu phung hêrmak, tâk eini khat leh khat ni’nlungset inchu Pathen kha eini inchunna shunga ka-om, khana nishunga alungsetna kha pui amathluk a kae.

¹³ Eini Pathen leh inchun a ka-om me khana ama’n eini leh inchun a ka-om ti hi nimanhret manchên, ajârchu ama’n arathla kha apek jo me.

¹⁴ Khana Pa khan asapa kha vânhnōi kahuk inhring sik a ajōngtir kha eini’n nihmu jo khana milak-hei nihri pek heia kae.

¹⁵ Tu achang inum Jesu Christa kha Pathen Sapa kae tia akaphôngsōt kha Pathen leh inchun a aka-om kae; khana Pathen kha ama leh inchun a aka-om kae.

¹⁶ Khana Pathen in nichunga lungsetna anei kha eini’n nimanhret khana nitaksen. Pathen kha lungset kae, lungsetna shunga akahring hei kha Pathen leh inchun a kahring hei, khana Pathen kha anmani leh inchun a ka-om.

¹⁷ Ṭongtan ning khan inngamna nineina sik nishunga lungsetna kha pui amathlukpek me, khana vânhnōia nihringkhō hi Christa kapōhrep nichang jo jâra khavakha eini’n ninei sik.

¹⁸ Lungset in ṭit neimak; lungset pui katluk in ṭitna rakip ahnong sōt. Khava jâra ṭitna kanei mi khan lungsetna pui mathluk mak; ajârchu ṭitna hin karâkna achen sik a ka-om.

¹⁹ Pathen in ahma inkeia alungset me jâra eini’n ama nilungset kae.

²⁰ Eini’n Pathen nilungset nitia, nisōpuihei ni-en kada he’nchu, malei kasei me kae. Ajârchu mihe’n anhmit a antahmu ansōpuihei hmen anlungset tor mak inchu, anhmit a antahmu mak Pathen kha lungset tor mak hei ning.

²¹ Christa ṭong pek me kha hi kae: Pathen inlungset mi rakip khan asōpui kha’m alungset nger sik kae.