JOHN INKHATNA 3 - LEKHARABU INTHENG (BSI)

Pathen Sahei

¹ Enruh, Pa’n heituk-hrep a alungset me mo! Alungsetna kha hingtuk hrep kalen khachu eini hi Pathen sa ati jo me, khava jâra kadiktak a asa kha kachang jo me. Vânhnōi in Pathen kha anmanhret mak jâra eini antamanhret mak me kae.

² Kaṭhōn marit hei, eini Pathen sa kachang jo me, tâk heimo ahong kachang sik me ti lahong inlârmak. Tâk-kha eini’n hi nimanhret ti chu Christa ajōng inlâr pha, ama kha nipō sik jo, ajârchu ama atak-khet kha inchêna nihmu sik jo.

³ Christa kha a’ntheng achang kapōa, tu achang inum Christa a inhōrna kanei mi kha abinga a’nsuk intheng kae.

⁴ Tu achang inum setna katlo mi kha Pathen dân kavōk-khōi ṭhena kanei kae, ajârchu setna hi dân kavōk-khōi kha kae.

⁵ Setnahei kalosōt sik a Christa kha jōng inlâr khana ama chu setna heite neimak ti hi nanmanhret.

⁶ Khava jâra tu achang inum Christa leh inchun a aka-om ṭhak mi khan setna tlomanjôn mak jo ning; tâk setna lakatlo injôn mi khachu Christa kha lahmu mak, manhret um lamanhret mak.

⁷ Kasahei, tûte’n hōnmathlâk mak chei rasoh! Christa kha akadik achang kapōa, tu achang inum ṭōndik katlo kha mikadik kae.

⁸ Tu achang inum setna katlo injônṭhak mi kha Diabol ta kae, ajârchu Diabol khan a’nphutbia inphut setna aleitloa kae. Diabol ṭōntlohei kha akasuk inhmang sik a Pathen Sapa kha ajōng inlâr kae.

⁹ Pathen sa kachang jo mi inkhatbek in setna tlomanjôn nôk mak jo ning, ajârchu Pathen chônngai kha anshunga ka-om jo; khana Pathen kha an-Pa achang jo jâra, anmani set tlomanjôn theimak jo hei.

¹⁰ Hivahi Pathen sa leh Diabol sa inkârna inchêntak a inlârna kha kae; tu achang inum ṭōndik katlomak leh mihlop inlungset mak mi kha Pathen sa changmak hei.

Inkhat leh Inkhat Inlungset ruh

¹¹ A’nphutbia inphut nantaleithei ṭong manrôn kha hi kae: eini khat leh khat a’nlungset sik me kae.

¹² Cain intipa kapō kha akachang hêrmak sik me kae; ama chu Akaṭhamak Inkhatpa ta kae khana asōpuikhet Abel kha aleithat a kae. Heisa mo Cain in ama kha aleithat? Ajârchu ama khet ṭōntlo kha leidikmak, tâk asōpuipa ṭōn leitlo khachu kadik a kae.

¹³ Khava jâra kasōpuihei, vânhnōi mi’n an-en kada chei inchu, inlak sakmak ruh.

¹⁴ Eini’n thina kha nidahlon joa hringna ahong kahlut jo me ti nimanhret; khavakha nimanhret ajârchu eini’n nisōpuihei nilungset heia kae. Tu achang inum asōpui inlungset mak mi khan thina ratha neina thōia alaka-om kae.

¹⁵ Mihlop ka-en kada mi kha mikathat-hei kae; mikathat-hei khan hringna anshunga neimak hei ti hi nanmanhret a kae.

¹⁶ Lungset hi heimo kae ti nimanhretna khachu: Christa khan ahringkhō eini sik apek sōt hi kae. Khava jâra eini’m nisōpuihei sik a nihringkhō nipek sōt sik kasōk!

¹⁷ Ansōpuihei tlâksamna kahmu mikahaohei, tâk malunga chu ankadōihei kha’n Pathen kha kanlungset titor mak hei ning.

¹⁸ Kasahei, hmur leh bei rōk a inlungset sik changmak; lungset kadiktak abing ṭōn vânga a’nlârsōt kha akae sik kae.

Pathen Ângkunga Inngamna

¹⁹ Khan chu, hing’hin eini akadik ta nichang kha a’nhret sik me kae; hing’hin Pathen hmaikunga inngamna kha ninei sik kae.

²⁰ Eini mandon ṭhen theina khan maset apek me’nchu, eini mandon ṭhen theina kanek a Pathen kha kalen chet khana ama’n heirakip amanhretsō ti hi nimanhret.

²¹ Khava jâra kaṭhōn marit hei, eini mandon ṭhen theina khan maset apek mak me’nchu, Pathen hmaikunga eini kangamtor sik mea kae.

²² Eini’n aṭongpek nijuia, amalung tlaina kha nitlo achang jâra nider rakip ahnenga inphut nichena kae.

²³ Ama ṭongpek khachu, Christa’n ṭong aleipek me kapōa, eini khat leh khat a’nlungset sik me khana asapa Jesu Christa rahming nitaksen sik hi kae.

²⁴ Tu achang inum Pathen ṭongpek kajui mi kha Pathen leh inchun a ka-oma kae, khana Pathen kha ama leh inchunna shunga ka-oma kae. Khana Pathen tapek me Rathla vâng hin Pathen in eini leh inchun a a-om hi nimanhret a kae.