JOHN INKHATNA 1 - LEKHARABU INTHENG (BSI)

Hringna Ṭong

¹ Vânhnōi inphut bia aleika-omsa, hringna ṭong hi nanhnenga kantahei mazet kae. Keini’n kanthei jo khana kanhmit khet vâng kanhmu jo; kadik, kanhmu jo khana kankut vâng kansit jo.

² Hiva hringna hi hmuthei ahongchang jo pha, keini’n kanleihmu jo; khava jâra Pa leh aleika-omsap kumsôt hringna kantahong manhret jo kha keini’n kanhrilea kanmanthei chei.

³ Apa leh asapa Jesu Christa leh inṭhōia kan-inloikhômna shunga hin nangni’m nanhong hlutna sik, kantahmu leh kantathei hei kha kantahri pek chei kae.

⁴ Ni’npâkna pui atluk theina sik hivahi kantahei mazet chei kae.

Pathen Kha Vâr Kae

⁵ Tûn keini’n asapa inphut kantathei ṭong khana kanta phôngsōt kha hi kae: Pathen kha vâr kae, khana ama hneng inthim inti hi om hêrmak.

⁶ Khan chu, eini’n ama leh inlôikhôm ung chu nitia, khō inthima nila-omṭhak inchu, niṭōn tlona leh niṭong hrina chunga malei kasei me kae.

⁷ Tâk-kha ama vâra a-om kapōa, eini vâra aka-om nichang inchu, eini inkhat leh inkhat a’nloikhôm me kae, khana asapa Jesu thisen khan setna rakip a inphut asôp mantheng jo me kae.

⁸ Eini’n setna neimak me niti’nchu, nibinga a’nhōn me kae, khana akadik kha nishunga om mak.

⁹ Tâk-kha eini’n nisetnahei Pathen hneng nihrisōt inchu, aṭong tepna kha ajui sik khana akadik kha atlo sik: nisetnahei kha arangei mandam sik me khana dikmak nilei tlona rakip a inphut amantheng sik me.

¹⁰ Eini’n setna neimak me niti’nchu, Pathen kha amalei nimansei, khana ṭongdik kha nishunga om mak.