JOHN 9 - LEKHARABU INTHENG (BSI)

A’ntetbia Hmitkacho Jesu’n Amandam

¹ A’ntetbia hmitkacho pase inkhat Jesu’n khanga alônna aleihmu.

² Asonle he’n ander, “Oja, ama hmit kachoa a’ntet hi, anu-apa setna jâra mo, ama bing setna jâra mo?”

³ Jesu’n amasôn hei, “Ama hmitkacho hi ama set jâra a-emak leh anu-apa set jâra heite changmak. Pathen ratha hratna kha ama chunga hin ṭōna hmuthei achangna sik a ahmit akacho kae.

⁴ Kani omlai seng, eini’n anijōng katirpa ṭōnhei kha nitlo manjôn nger sik kae; tûte inkhat ṭōn tlothei makna jân pha jōng katlung sik jo.

⁵ Kei raleichunga ka-omlai seng kei vânhnōi ralei sik a vâr eng kae.”

⁶ Hi ahrisōa Jesu’n raleia amachia bōn amannânga; bōnnâng kha mipa hmit chunga akano pek,

⁷ khana ahnenga, “Se ina Siloam tuikhura vasôp mathla roh,” ati. (Siloam tina chu, “Tirsōt,” tina kae.) Khava jâra ama kasea ahmai avaphet a, khō ahmua he’nle jo.

⁸ Khava pha, ama’n akut amadoa a’n-ong ri aleikahmu akhō avenhei leh mihei inder hei, “Hiva mipa hi kut indoa akader a’n-ong ri pa kha changmak mo?”

⁹ Ṭhahrep in, “Ama kae,” anti. Tâk-kha her khat in, “Ama changmak, ama kapō inkhat kae,” anti. Khava jâra ama’n abinga, “Khava mi kha kei eng kae,” aheiti.

¹⁰ Anmani’n ander, “Heikhonga mo nahmit akavâr?”

¹¹ Ama’n amasôn hei, “Arahming Jesu inti mipa khan bōnnâng amannânga kahmit a akanoa, ‘Se ina Siloam tuikhura nahmai vaphet roh,’ ati, khava jâra kei kase enga kavasôpsō lim leh khō kaleihmu tor jo.”

¹² Anmani’n ahnenga, “Ama khon mo aka-om?” tia ander. Ama’n amasôn hei, “Kei manhret mak eng.”

Pharisee he’n Amandamna Ṭong Antajong

¹³ Khava pha anmani’n hmit leikachopa kha Phariseehei hneng anṭhōi jo.

¹⁴ Jesu’n bōnnâng amannânga hmitkachopa hmit amanvâr pek ning kha Châmhngat kani ning leikae.

¹⁵ Khava pha Pharisee he’n mipa kha heikhonga mo khō ahmu jo ti ṭong ander nôk. Ama’n amanthei hei, “Kahmit a bōnnâng ajing akanoa, ke’n kavaphet pha, tûnchu khō kahmu tor jo.”

¹⁶ Pharisee ṭhahrep in, “Hiva katlopa hi, Châmhngat kani anitmak jâra ama Pathena inphut changmak ning,” anti. Achang ravâng her khat in, “Mikase inkhat in hinghiva ṭōn kalen inlak hi khonga mo atlo tor sik?” Khang’khan anmani kâra loi hnia inṭhenna kasōk jo.

¹⁷ Khava jâra Phariseehei khan ama hneng avea ander nôk, “Nang in nahmit amanvâr pek jo eng nati, kaṭha jo, ama chungchâng heimo nati?” Ama’n amasôn hei, “Ama Sânkathem inkhat kae.”

¹⁸ Achang ravâng Jehudi hlamkakeihei khan ahmit aleikachoa khō aheikahmu jo ama nu leh pa anbek mak kârseng lataksen hnōm mak hei,

¹⁹ khana anmani’n anu leh apa ander hei, “Ama hi nansapa mo? Ama hi hmit kachoa a’nte nanti; khan chu heikhonga mo tûnchu khō ahmu jo?”

²⁰ Anu leh apa’n anmasôn hei, “Ama hi ahmit kachoa a’nte kansapa kae ti kanmanhret.

²¹ Tâk-kha ama hmit hi heikhonga khō ahmu jo khan chu ahmit kacho kha tu’n mo amandam pek ti chu keini’n manhret mak ung. Ama kalenpang jo, abinga amasôntor sik jo chei, ama der ruh!”

²² Anu leh apa’n hinga antati hi Jehudihei anṭit jâra kae; ajârchu Jesu hi Messiah kae kati mi kha an-intûpna inna inphut hnongsōt sik a Jehudi he’n inhnōmtōna anta leinei dek jo kae.

²³ Khava jâra anu leh apa’n, “Ama kalenpang jo, ama der ruh,” antati kae.

²⁴ Ahmit aleikachoa akavâr jo mipa kha vōi 2 tlukna anbek male nôk a, ahnenga, “Pathen hmaikunga intep ina akadik kha hri roh! Khava mipa kha mikase ti keini’n kanmanhret,” anti.

²⁵ Ama’n amasôn hei, “Ama mikase achang leh achangmak ke’n manhret mak eng. Ke’n kamanhret inkhat chu: kahmit leikacho kha tûnchu kahmu jo,” ati.

²⁶ Anmani’n ander, “Nang hneng heimo aleitlo? Heikhong mo ama’n nahmit amanvâr pek che?”

²⁷ Ama’n amasôn heia, “Ke’n kahri pek jo chei, khana nangni’n rangei hnōm mak chei. Heisa mo nangni’n nanta rangei hnōm nôk? Nangni’m ama sonle akachang hnōm chei mo?”

²⁸ Anmani’n ama anhâksêra anti, “Nang khava mipa sonle che kae; keini chu Moses sonle ung kae.

²⁹ Pathen in Moses a’nbekpui kanmanhret; ama khachu khona inphut akajōng mo ti kapha’m manhret mak ung!”

³⁰ Mipa khan amasôn hei, “Nangni’n ama khona inphut akajōng mo nantamanhret mak hi a’nlak inkhat kae! Tâk-kha ama’n kahmit chu amanvâr pek jo enga kae!

³¹ Pathen in mikaset-hei tader theipek mak; tâk ama kajana kapek hei leh amadu hlam katlo mihei derna athei pek hei ti eini’n nimanhret.

³² Vânhnōi ralei anphutbia inphut, hmitkacho inkhat hmit kavâr jo ti ṭong lathei phungmak hi me;

³³ Ama Pathena inphut akajōng achangmak inchu, ama’n hiva ṭōn hi atlo tor mak sik kae.”

³⁴ Anmani’n anmasôn, “Nang setna chunga a’nte hrep che’n, keini manthei sik nalarei ung mo?” antia, intûpna inna inphut anhei namsōt jo.

Rathla a Hmitkacho

³⁵ Jesu’n omchen kasōk kha aleithei jo pha, mipa kha aleihmua ahnenga, “Nang in Mihring Sapa kha nataksen mo?” ati.

³⁶ Ama’n amasôn, “Apu, tu mo ke’n kataksen sik kha amanthei roh!”

³⁷ Jesu’n ahnenga, “Nang in nahmu joa kae, tûntak a na’nbekpui ama kha kae,” ati.

³⁸ Khava pha mipa khan, “Rōngpu, ke’n kataksen!” atia, ahma inkuna akamuk jo.

³⁹ Jesu’n ahri, “Hmitkachohei khō hmuna sik, khō kahmuhei hmit chona sik, hiva raleichunga ṭong katan sik a kei akajōng eng kae.”

⁴⁰ Pharisee ṭhahrep ahnenga ka-om he’n khava ahri kha antheia, ahnenga, “Keini hi’m hmitkacho natina ung chu changmak nu?” anti.

⁴¹ Jesu’n amasôn hei, “Nangni hmitkacho nanleichang inchu, maset nantachenmak sik kae; tâk nangni’n khō kanhmutor nanti, hiva tina chu tûn katlung maset nanlachena kae.”