JOHN 6 - LEKHARABU INTHENG (BSI)

Jesu’n Mi 5,000 Avei

¹ Hivasōa Jesu Galilee dîr rekhat ting (Tiberius tia’m inhret) inle nôk jo.

² Mipui katamtak in ama kahnung anleijui, ajârchu Jesu’n mi kanahei amandama ṭōn-inlak atlo hei kha anmani’n anleihmua kae.

³ Jesu tlâng inkhat a kakea asonlehei leh in-ongsap hei.

⁴ Rakan Kût sik kha hong kahnai jo.

⁵ Jesu’n khō athlira mipui katamtak ahnengting ankahong hei kha aleihmu jo hei, khava jâra ama’n Philip hneng, “Mi soseng tlukna sik bu khona mo nirachôk tor sik?” ati.

⁶ (Hiva ṭong hi Philip enmansinna ahri kae; kadiktak a chu ama’n atlo sik kha amanhretsa jo.)

⁷ Philip in amasôn, “Mi inkha-khat in ahar ajing tete hrep anchenna sik, dangka 200 kakhea buhlom rachôkna kahlut sik.”

⁸ Sonlehei kâra ahlop inkhat, Simon Peter naipa Andreu in:

⁹ “Sathai buhlom pheng 5 leh nga 2 akanei rether naipang inkhat hin ka-om. Tâk-kha mi soseng sik a hiva hrep hin heimo akahnem sik?” ati.

¹⁰ Jesu’n, “Mihei kha man-ong hei ruh,” ati hei. (Khava hmun kha phi katamtak kakek a kae.) Khava jâra mi ankhenga 5,000 kapō hei kha in-ong jo hei.

¹¹ Jesu’n buhlom kha aloa, Pathen amanpâk a khana mi a’n-ong hei hneng khan asempek jo hei. Nga kha’m khanga in-anghrep a atloa, anmani’n ankhopna et a ansâk joa kae.

¹² Anmani ankhenga ankhopsō pha, Jesu’n asonlehei hneng, “Sâk manhlei ahar-ahak heite manhmang loa akhenga hrutsō ruh,” ati hei.

¹³ Khava jâra anmani’n akhenga anhrut sōa, buhlom pheng 5 leh nga 2 mihe’n antasâk manhlei kha hrai 12 kasip anhrutsōt a kae.

¹⁴ Mihei khan aṭōn inlak tlo kha anhmua anhri, “Kadiktak a ama hi raleichunga akajōng sik Sânkathem kha kae!”

¹⁵ Jesu kha ahnōm ada a reng manchang sik a, anmani akasur sik anhong sik kha Jesu’n amanhret a, tlâng ting abinga leikasesōt nôk jo.

Jesu Tui chunga Alôn

¹⁶ Khōhlei ahong tlung jo pha, asonlehei kha dîrting anjōn suk a,

¹⁷ rakōnga khan kahlut heia, dîr rekhat a Capernaum ting inle jo hei. Jân hongkachang jo, Jesu chu anhnenga lahong inlemak.

¹⁸ Khava phat a khan thli inhnaktak hongkahrânga tui in-nông joa kae.

¹⁹ Sonlehei khan kilometre 5 a-emak leh 6 kapō antôr pha, anmani’n Jesu tui chunga hongkalôna anrakōng ting aheijōn kha anhmu pha anmani inpir jo hei.

²⁰ Jesu’n anhnenga, “Ṭimak ruh, kei eng kae,” ati.

²¹ Anmani’n rakōng chunga inpâktak a anmanchōnga, inrangtak a anjōnna langting ram chârna leikatlung jo hei.

Mihe’n Jesu Antajong

²² Abân kania dîr rekhat tinga ka-om mihei khan rakōng inkhat rōk aka-om kha anmanhret. Sonle he’n Jesu kha inveiloa a’ntôr heia anta leidahlon kha mihei khan anmanhret jo.

²³ Tiberius a inphut akahong rakōnghei khan, Rōngpu’n Pathen manpâkna apeksōa mipui he’n buhlom ansâkna hmun kha heikatlung jo heia kae.

²⁴ Mipuihei khan Jesu achanga asonlehei anchanga khava hmun a khan om mak jo hei ti anmanhret pha, anmani rakōng shunga kahlut heia Jesu kajong sik a Capernaum ting kase jo hei.

Jesu Hringna Buhlom

²⁵ Mihei khan Jesu kha dîr rekhat ting khan anhmu jo pha anmani’n ahnenga, “Oja, heitik a aleikase jo che mo?” anti.

²⁶ Jesu’n amasôn hei, “Akadiktak kahri pek chei kae: ṭōn-inlak katlohei ariṭong nanmanhret jâra nantajong eng changmak, buhlom kha kakhōp a nansâk jâra nantajong eng kae.

²⁷ A’nhmangthei bu jongna sik a ṭōn rahnak a tlomak ruh; khava kanek a, kumsôt hringna bu jongna sik ṭōn rahnak a tlo jôk ruh. Hiva bu hi mihring Sapa’n apek sik chei, ajârchu Pa Pathen khan ama chunga hnōm pekna mêrchîkna adapek jo kae.”

²⁸ Khava jâra anmani’n ahnenga ander, “Keini’n Pathen tamantlo hnōm ung kha kantlo theina sik, hei-mo kantatlo sik?”

²⁹ Jesu’n amasôn hei, “Pathen in nangni amantlo hnōm chei ṭōn kha hi kae; ama’n ajōng tirpa kha taksen ruh.”

³⁰ Anmani’n anmasôn, “Keini’n heikhat kanhmu pha nang kantaksenna sik che, heiṭōn inlak mo natlosōt sik? Heimo natlo sik?

³¹ Ṭong intheng tahri: ‘Ama’n sâk sik buhlom marvâna inphut apek hei,’ ati kapōa, kanpu sōn he’n, ram thōia manna anleisâk a kae.”

³² Jesu’n, “Akadik kha kahri pek chei kae: Moses’n aleipek chei kha marvâna inphut buhlom changmak; marvâna inphut buhlom kadiktak anikapek khachu kapa kae.

³³ Pathen tapek chei buhlom khachu marvâna inphut a akajōng ama kha kae, ama khan vânhnōia hringna apek,” ati.

³⁴ Anmani’n ama hneng ander, “Apu khava buhlom kha keini ahei tik a apek ṭhak roh.”

³⁵ Jesu’n anhnenga ahri, “Hringna buhlom kha kei eng kae. Kei hnenga akahong mi kha ahei tik a avon ṭâmmak jo ning; kei anikataksen mi kha ahei tik a atui hremak jo ning.

³⁶ Tûnchu, ke’n nangni kamanthei chei kae; nanhmu jo eng tâk ataksen mak tin chei.

³⁷ Kapa’n apek eng hei seng kahnenga kahong sik hei. Kahnenga akahong mi kha tu achang innum ke’n hnongsōt hêrmak ning,

³⁸ ajârchu kei anijōng katirpa lungdo katlo sik a marvâna inphut kei akajōng eng kae; kalungdo katlo sik a akajōng changmak eng.

³⁹ Anijōng katirpa’n amantlo hnōm eng khachu hi kae; ti chu ama’n apek jo eng hei seng ankhenga manhmang loa, a’nchai ning hringna antachen sik kae.

⁴⁰ Ajârchu Sapa kahmua akataksen rakip in kumsôt hringna anneina sik a kae. Khana a’nchai ning kani khan anmani kahringa kamathōi sik hei.”

⁴¹ Jesu’n ati, “Marvâna inphut akajōng buhlom kha kei eng kae,” ati jâra Jehudihei kachōr inphut jo hei.

⁴² Khava jâra anmani’n indertō hei, “Hiva mi hi Joseph sapa Jesu kae, changmak mo? Eini’n anu leh apa nimanhret hei. Khan chu tûn ama’n heikhong mo marvâna inphut akajōng eng ati?”

⁴³ Jesu’n amasôn hei, “Nanbinga nangni nan-inbek chōr-chōr kha bâng ruh.

⁴⁴ Anijōng katir ka-Pa’n kahnenga aheikei manhlut tei loa tûte kahnenga hongtor mak; khana a’nchai ning kani khan kahringa kakei mathōi sik kae.

⁴⁵ Sânkathem he’n hing’hin anleimazet, ‘Pathen in mi rakip amanthei sik.’ Tu achang inum Pa hnenga inphut aṭong kathei leh a’nchû mi kha kahnenga kahong.

⁴⁶ Tu mo inkhat in Pa kha ahmu jo tina changmak; Pathena inphut a akajōng ama tei loa tûte’n Pa kha lahmu mak.

⁴⁷ Akadiktak kahri pek chei kae: akataksen mi khan kumsôt hringna anei jo.

⁴⁸ Kei hringna buhlom eng kae.

⁴⁹ Nanpusōn he’n ram thōia manna kha anleisâk, tâk kathihei.

⁵⁰ Tâk-kha marvâna inphut akajōng buhlom hichu tu achang inum akasâk rakip thimak jo ning.

⁵¹ Kei marvâna inphut akajōng hringna buhlom eng kha kae. Tu achang inum hiva buhlom kasâk mi kha ahei tik chen a kahring sik. Khana ke’n ama kapek sik buhlom kha kataksa ravōi hi kae, hivahi vânhnōi hringna sik a kapek kha kae.”

⁵² Hivahin anmani kâra hnuk kana tak a inkhena amanphut jo heia, “Hei-khong mo hiva mi hin sâk sik a ataksa ravōi apek sik me?” tia inder jo hei.

⁵³ Jesu’n anhnenga ahri, “Akadiktak kahri pek chei kae; nangni’n Mihring Sapa taksa ravōi nansâk mak a, athisen nan-inmak inchu, nanbinga hringna neimak tin chei.

⁵⁴ Tu achang inum kataksa ravōi kasâk leh kathisen ka-in mi khan kumsôt hringna anei jo, khana a’nchai ning ama kahringa kamathōi sik kae.

⁵⁵ Ajârchu kataksa ravōi hi thlai sâk sik khet kae, kathisen hi in sik khet kha kae.

⁵⁶ Tu achang inum kataksa ravōi kasâk a khana kathisen ka-in mi kha keia ama ka-om khana ama a kei ka-om eng.

⁵⁷ Akahring ṭhak Pa khan ajōngtir eng, khana kei um ama jâra akahring eng kae. Khava kapōa khan tu achang inum kei anikasâk mi kha kei jâra kahring sik.

⁵⁸ Khava jâra hiva buhlom hi marvâna inphut akajōng kha kae; nanpusōn he’n anta leisak a akathihei khava buhlom kapō kha changmak. Anmani hnunga chu kathihei, tâk hiva buhlom kasâk hei kha ahei tik chen a kahring sik hei.”

⁵⁹ Hivahi Capernauma intûpna innpuia Jesu’n aman theina heia ahri kae.

Kumsôt a Hringna Ṭonghei

⁶⁰ Asonle akatam lang in hiva ahri hei hi anthei pha, “Hiva aman theinahei hi manhret intak rei. Tu’n mo amanhret tor sik?” anti.

⁶¹ Manthei lo jen heia Jesu’n asonlehei leichōrna kha amanhret a anhnenga ati, “Hivahin nangni aman haihnōm jo chei mo?

⁶² Kha achang inchu, mandonna inkhat a, mihring Sapa kha ama aleiomna ting a’nle nanhmu inchu heikhonga sik jo chei hmen?

⁶³ Hringna kapek kha Rathla kae; taksa chu ahnemna heite om mak. Ke’n nanhnenga kaleihri jo ṭong khan hringna kapek Pathen Rathla kha ajōng rôn.

⁶⁴ Tâk-kha nankâra ṭhahrep in taksen mak cheia kae.” (Jesu’n anphutbia inphut akataksenmak sik leh mikut a akapek sōt sik inkhat kha amanhret a kae.)

⁶⁵ Khana ama’n ahrisa, “Hiva sik khet jâra ke’n kalei hripeksa jo chei kae, ti chu Pa khan a-etheina sik aleisyemsa achangmak inchu tûte kahnenga hongtor mak.”

⁶⁶ Hiva sik jâra khan akajui katamtak hei khan avea juihnōm mak jo heia ankahnungting inle jo hei.

⁶⁷ Khava pha Jesu’n asonle 12 hei hneng, “Nangni’num nantadahlon hnōm jo eng mo?” ati hei.

⁶⁸ Simon Peter in amasôn, “Rōngpu, tu hneng mo keini akase sik ung? Nang in kumsôt hringna kapek ṭong kha nanei kae.

⁶⁹ Khana tûn nang Pathena inphut akahong a’ntheng inkhat nachang kanmanhret a kantaksen che.”

⁷⁰ Jesu’n amasôn hei, “Ke’n nangni 12 kakadei chei changmak mo? Kha’num nankâra inkhat chu rathla kaṭhamak kae.”

⁷¹ Ama’n Simon Isca-riot sapa Judas akapek sōt sikpa kha atina kae. Ajârchu Judas kha sonle 12 hei kâra inkhat aleichang ravâng Jesu kha mikut chunga apek sōt sik kae.