JOHN 4 - LEKHARABU INTHENG (BSI)

Jesu leh Samaria Nuhmei

¹ Jesu’n John kanek a mi katamtak tui manhlutna atlo heia, sonle’m akatam jôk asyem jo hei ti hi Pharisee he’n anthei jo tia Jesu’n amanhret jo.

² (Kadiktak a chu, ama khet in tûte tui manhlutna leitlo mak, asonlehei tatlo kae.)

³ Antahri kha athei pha Jesu’n Judea ram adahlona Galileeting inle nôk jo.

⁴ Ama’n khan asena Samaria ahro nger sik kasōk.

⁵ Ama’n Samaria ram shunga khōpui inkhat Sychar inti aphâk jo, khavakha Jacob in asapa Joseph ram apekna hnenga kae.

⁶ Khava hmun a khan Jacob tuikhur kha leika-om, Jesu ahlam heihrona kachâm joa khava tuikhur panga khan in-ong jo. Apha kha sûnṭim radontak a leikae.

⁷ Samaria nuhmei inkhat tui kathe sik kahonga, Jesu’n amanu hneng, “In sik tui apek roh,” ati.

⁸ (Asonlehei khōpuia sâk incho sik leikase hei.)

⁹ Nuhmei khan amasôn, “Nang Jehudi inkhat che’n kei Samaria kachang inkhat hneng, heikhong mo tui in sik nader eng?” (Ajârchu Samariahei tahmang kōklei leh thlengkamhei Jehudi he’n hmanglo hei kae.)

¹⁰ Jesu’n amasôn, “Nang in Pathen kutchoi pek kha namanhret a, khana tui in sik nakaderpa kha namanhret a, nang in ama hneng jôk nalei der inchu, ama’n hringna tui apek sik che kae.”

¹¹ Nuhmeinu khan ahnenga ati, “Apu, nang in alōkna sik heite neimak che, khana tuikhur hi inthûk a kae; khava hringna tui kha khona mo nalo sik.

¹² Kanpa-kanpu Jacob in hiva tuikhur hi apek ung kae, ama leh asa he’n khan chu aran he’n hinna inphut anta lei-in kae. Ama kanek a nang akalen che mo?”

¹³ Jesu’n amasôn: “Tu achang inum hiva tui ka-in hei kha antui kahre nôk sik.

¹⁴ Khana tu achang inum kei tapek sik tui ka-in mi khachu atui hrenôk hêrmak jo ning. Kei tui pek sik khachu, kapek mipa shunga khan hringna tui kapût a kalōng sik, khana kumleikōa hringna apek sik kae.”

¹⁵ Nuhmei khan, “Apu, khava tui kha apek roh! Khana katui ahre nôk hêrmakna sik leh hiva hmun a tui kathe kahong nôk makna sik,” ati.

¹⁶ Jesu’n amanu hneng, “Se ina napuise vabek ina hin hong ruh,” atipek.

¹⁷ Nuhmeinu khan amasôn, “Kei puise neimak eng.” Jesu’n amanu hneng ati, “Nang in puise neimak eng nati hi kadik hranghra.

¹⁸ Nang in puise 5 nanei jo, tuna na-ompuipa hi napuise inchênkhet changmak; nang in akadiktak kha nahri pek eng.”

¹⁹ Nuhmei khan ati, “Apu, nang sânkathem inkhat che kae ti kamanhret jo che.

²⁰ Kanpu sōn he’n hiva tlâng chunga hin Pathen anleikamuk, tâk Jehudi nangni’nchu, ‘Pathen kamukna sik hmun kha Jerusalem kae,’ nanti.”

²¹ Jesu’n amanu hneng ati, “Eh nuhmei, ataksen roh! Mihe’n hiva hmun a achanga, Jerusalema achang inum Pa kha antakamuk makna sik pha kha alajōng katlung sik kae.

²² Nangni Samaria mi’n nantamanhret manchênmak kha nankamuk. Keini Jehudi’n tu mo kantakamuk kha kanmanhret. Ajârchu Jehudi heia inphut hukmanhringna hi akajōng kae.

²³ Tâk-kha pha kha katluk jo, tûn jo hi kae. Kadiktak a inmuk hei khan Pa kha kadiktak a leh Rathla a antakamuk sik hi Pa tamadu kae.

²⁴ Pathen hi Rathla kae, khana ama Rathla hratna vâng rōk khan mihe’n ama antakamuk tor kae.”

²⁵ Nuhmei khan ahnenga, “Messiah kha kajōng sik, khana ama ajōng pha, heirakip amanthei sik me ti kha kamanhret,” ati.

²⁶ Jesu’n amasôn, “Ama kha kei eng kae, nahnenga ṭongkahri eng hi kae.”

²⁷ Khava laitak khan asonlehei kha hong inle jo hei; khana anmani’n ama nuhmei inkhat leh anle’nbek hei kha anhmu pha inlak ansak hêr jo, kha’num tûte’n, nuhmeinu kha, “Heimo namadu?” timak hei, a-emak leh Jesu hneng, “Heisa mo amanu na’nbekpui?” tia’m dermak hei.

²⁸ Khava pha nuhmeinu khan atuibe adahlona, khōpuia inlea, mihei hneng,

²⁹ “Ke’n kaleitlo rakip akhenga ani kahri pek mipa so hong una hong-en ruh! Ama so Christa changmak ning mo?” atia avabek hei.

³⁰ Khava jâra anmani khōpui andahlona Jesu hneng kase jo hei.

³¹ Khava laitak khan sonle he’n Jesu hneng, “Oja, bu hongsâk jo roh,” tia anleingêk.

³² Tâk-kha ama’n amasôn hei, “Nangni taman hretmak busâk sik ke’n kanei.”

³³ Khava jâra asonlehei inkhat leh inkhat indertō hei, “Tu mo inkhat in busâk sik ahei choi pek nâk mo?”

³⁴ Jesu’n anhnenga, “Kei bu khachu anijōng katirpa lungdo pui katluk a tlo mathluk sik kha kae,” ati.

³⁵ Nangni’n, “Sa-âtna sik thla 4 laka-om,” nanti. Ke’n kahri pek chei kae; Kaṭha a khō thlir una hlei rajeiso enruh: sâng kahmin sō jo, a-ât pha katluk joa kae.

³⁶ Sâng ka-ât pa kha tloman inpek a kumleikōa hringna sik sâng kha amantûp; khang’khan akalingpa leh aka-âtpa kha inpâksap sik hei.

³⁷ Ajârchu, ‘Mi inkhat in alinga, mihlop inkhat in a-ât kae,’ inti kha akadik kae.

³⁸ Nangni talei thlōmakna hleihmun a khan sâng ka-ât sik a ke’n nangni katir chei kae; khana khan milak he’n ṭōn antlo khana anmani ṭōna khan nangni’m hnemna nanchen,” ati.

³⁹ Nuhmeinu khan, “Ama’n kaleitlo rakip ahrisōt pek eng,” ati jâra Samaria khōpui mi katamtak in Jesu kha antaksen jo.

⁴⁰ Khava jâra Samaria mihei kha Jesu hneng kahong heia, Jesu’n ala-ompui sik heia anngek pha, Jesu’n anmani 2 ala-ompui heia kae.

⁴¹ Jesu ṭonghri jâra mi katamtak in antaksen jo.

⁴² Anmani’n nuhmei hneng khan anti, “Keini khet in aṭong hri kanthei joa, ama hi vânhnōi kahuk inhringpa akadik khet achang kha kanmanhret a kantataksen jo kae, nang hrina jâra changmak jo.”

Jesu’n Sarkâr Ṭōnkarôn Inkhat Sapa Amandam

⁴³ Khava hmun a khan Jesu ni 2 a-omsō leh Galileeting kase jo.

⁴⁴ Ajârchu Jesu khet in, “Sânkathem inkhat hi aram shunga mi’n kajana neimak hei,” aleiti.

⁴⁵ Ama Galilee atlung pha, mihe’n anleiratō, ajârchu anmanitak inum Rakan Kût pha khan Jerusalema aleikase heia Jesu ṭōntlo inlak rakip kha anta leihmu jo kae.

⁴⁶ Khava sōa Jesu’n tui kha ju amanchangna khō Galilee ram a Cana a inle nôk jo. Khava ram a sarkâr ṭōnkatlo mi inkhat asapa Capernauma akana leika-om.

⁴⁷ Khava mipa khan Judea ram a inphut Galileea Jesu kahong jo ti ṭong athei pha, Jesu hneng kasea, asapa thi rong kati kha a’ndam sik a Capernauma ajōngna sik aleingek a kae.

⁴⁸ Jesu’n ama hneng, “Ṭōn kalen leh ṭōn inlak-hei nanhmu mak inchu, ahei tik a tûte’n taksen mak tinnei,” ati.

⁴⁹ Sarkâr ṭōn katlopa khan, amasôn, “Apu, kasapa athimak hma hong roh, se rih.”

⁵⁰ Jesu’n ahnenga, “Se roh, nasapa kahring sik!” ati. Mipa khan Jesu ṭonghri kha ataksena kase jo.

⁵¹ A-innting ama kha khanga inlea aselai khan hlam a asōk he’n an-intō puia, “Nasapa kha kahring jo,” anleiti pek.

⁵² Ama’n asapa aṭhatdetna pha kha ader hei, anmani’n, “Jâning khōhlei pung khat a Ahritlun in amasō jo,” anti.

⁵³ Jesu’n ama hneng, “Nasapa kahring sik jo,” atipek phatak achang kha apa khan amandonsōt a kae. Khava jâra ama leh a-innshung mi seng in antaksen joa kae.

⁵⁴ Hivahi Judea ram a inphut Galilee ram a ahongsōa, ṭōn-inlak atlo vōi 2 tlukna kae.