JOHN 11 - LEKHARABU INTHENG (BSI)

Lazarus Thina

¹ Bethany khōa pase inkhat arahming Lazarus intipa kha leikana a kae. Bethany hi Martha khana asōpuinu Mary omna khōpui kae.

² (Hiva Mary hi Rōngpu ke thai marim katui akanoa asam vânga kahninu kha kae. Akana Lazarus hi ansōpuipa kae.)

³ Aser he’n Jesu hneng mi antira, “Rōngpu naṭhōn maritpa kana jo,” anva manti.

⁴ Jesu’n kha athei pha, “Hiva natna hin Lazarus kha akathi sik changmak; Pathen lûrna sik a akana kae; ama akathi sik changmak; hinna inphut Pathen Sapa khan lûrna achen sik kae,” ati.

⁵ Jesu’n Martha leh a-unu khana Lazarus alungset hei.

⁶ Jesu’n Lazarus kana ti ṭong athei ninga inphut a-omna hmun a khan ni 2 laka-omsa a kae.

⁷ Khava sōa ama’n asonlehei hneng, “Eini Judeating inle jo rih,” ati hei.

⁸ Sonlehei khan anmasôn, “Oja, mihe’n denghlon sik a anreina che lasôt loa, sonting se nôk sik a a’ntluk che mo?”

⁹ Jesu’n ati, “Ni khat shunga pung 12 aka-om changmak mo? Khava jâra tu achang inum sûn kanivâr thōia akalôn khan inpai inthlûkmak ning, ajârchu anmani’n vânhnōi vâr kha ahmua kae.

¹⁰ Tâk-kha anmani jân a anlôn inchu inpai inthlûk sik hei, ajârchu vâr kha anmani’n neimak hei.”

¹¹ Kha ahrisō pha Jesu’n anhnenga, “Niṭhōn Lazarus kaje jo, tâk kase sik enga kha kavamathōi sik,” ati.

¹² Sonlehei khan anmasôn, “Rōng-pu, ama aje jo’nchu, kadam sik jo.”

¹³ Tâk-kha Jesu’n chu Lazarus kathi jo atina kae; anmani’n chu angaia akajea antamandon kae.

¹⁴ Khava jâra Jesu’n inche’ntak a amanthei hei, “Lazarus kathi jo;

¹⁵ Tâk nangni’n nantaksenna sik, ahnenga kaleiom mak kha kei inpâk enga kae. Eini ahnenga se jo rih.”

¹⁶ Thomas (A’npher intipa) khan asonle changpui hei hneng, “Eini Oja leh nithisap theina sik akahnung jui rih,” atia kae.

Jesu hi Thōi nôkna leh Hringna

¹⁷ Jesu ahong tlung pha khan chu, Lazarus kha thlâna anleihrena ni 4 katluk jo ti amanhretsōt jo.

¹⁸ Bethany kha Jerusalema inphut kilometre 3 tluktaklo kapōhrep a’nkâr kae,

¹⁹ khana Judea mi katamtak Mary leh Martha hneng ansōpuipa thi jâra lungmōng kathlâk sik a kahong hei.

²⁰ Martha’n Jesu kahong ti ṭong athei pha, kasesōt a avaratōa kae; tâk Mary chu innshunga in-onga leika-om.

²¹ Martha’n Jesu hneng ahri, “Rōngpu, nang hin naleiom inchu kasōpuipa leithi mak ning.

²² Kha achang inum tûn nang in Pathen hnenga nader rakip kha apek sik che ti kamanhret.”

²³ Jesu’n amanu hneng, “Nasōpuipa kahringsōt sik,” atipek.

²⁴ Amanu’n amasôn, “A’nchai ning kania akahringsōt sik ti khachu kamanhret.”

²⁵ Jesu’n amanu hneng, “Kei thōi nôkna leh hringna eng kha kae; tu achang inum anikataksen mi kha akathi achang inum akahring sik kae.

²⁶ Khana tu achang inum kei kataksen akahring mi kha thi nôk hêrmak jo ning. Hivahi nataksen mo?” ati.

²⁷ Amanu’n amasôn, “Ôk, Rōngpu, nang Pathen Sapa raleichunga akajōng sik Messiah che kae ti ke’n kataksen che.”

Jesu Kaṭap

²⁸ Martha’n hi ahrisō pha, asōpuinu Mary hneng inlea marûk a abek a, “Oja kha hin ka-oma nang ajong che,” tia ava manthei.

²⁹ Mary in kha athei pha, kangirsōt a a’nhmupui sik inranga kasesōt jo.

³⁰ (Tâk-kha Jesu chu Martha leh an-inhmuna hmun a khan laka-om hia, khōshunga laheihlut mak a kae.)

³¹ Mary inna lungmōng kathlâk a ka-om mihe’n Mary akangirsōt a inrangtak a asesōt kha anhmu pha akahnung anleijui. Ajârchu anmani’n Mary kha thlâna akasea avakaṭap sik tia anleimandon.

³² Mary in Jesu omna hmun atlunga ahmu pha, ahmai kunga inkuna, “Rōngpu, nang hin naleiom inchu, kasōpuipa leithi mak ning!” ati.

³³ Jesu’n amanu kaṭap leh ahe’nṭhōipui mihei kaṭap kha’m aleihmu hei, amalung atônna, inphuhronga kae.

³⁴ Ama’n ader hei, “Khon mo nantavûm?” Anmani’n anmasôn, “Hong inna va-en roh, Rōngpu,” anti.

³⁵ Jesu leikaṭap.

³⁶ Mihe’n, “Enruh ama heituk a alungset mo!” anti.

³⁷ Tâk-kha ṭhahrep he’n, “Ama’n hmitkacho amanvâr changmak mo? Ama’n thina inphut Lazarus hi aleihuktor mak mo?” antia kae.

Lazarus Amanhring

³⁸ Khana Jesu inphuhrong nôk a, hlungkhur, akot hlungpheng inkhat vâng a’nkhâr thlânting khan leikasea kae.

³⁹ Jesu’n ṭong apek heia, “Hlung kha losōt ruh,” ati hei. Akathipa sernu Martha khan amasôn, “Rōngpu, a’nvûmna kani 4 jo kae, amarim kase sik jo!”

⁴⁰ Jesu’n amanu hneng, “Nang in nataksen inchu, Pathen lûrna kha nahmu sik timak che eng mo?” ati.

⁴¹ Anmani’n hlung kha anlosōt jo, khana Jesu’n chungting a-ena, “Apa, kaderna nathei pek eng jâra kamanpâk che.

⁴² Ke’n kaderna rakip nathei pek eng kamanhret, tâk hinna mi ka-om hei hin najōngtir eng kachangna hi antaksen theina sik kader che,” ati.

⁴³ Ama’n hi ahrisōa rasa inhnaktak a a-ôna, “Lazarus heisōk roh,” ati.

⁴⁴ Mikathipa kha akalōng kazena vâng akut, ake inzea khana ahmai kha pōn a’nkhua heikasōk jo. Jesu’n anhnenga, “Sōt ruh, khana manse ruh,” ati.

Jesu Thatna sik Ṭōnmantluk

⁴⁵ Mary hneng akahong mi katamtak he’n Jesu ṭōntlo kha anhmu pha, ama antaksen jo.

⁴⁶ Tâk-kha ankâra ṭhahrep Phariseehei hneng inle heia Jesu tatlo kha anvahri jo.

⁴⁷ Khava jâra Phariseehei leh thempu kalen he’n Sehmang-pachonghei an-inhmupui jo heia, “Heimo nitlo sik? Hiva mipa hin ṭōn-inlak rakip atlosōt jo heiso va-en ruh!

⁴⁸ Eini’n ama hing’hin nimasō jo’nchu mi rakip in ama antaksen sik jo, khana Rome ratha kanei he’n ni-Bek-inn leh nijât anmanhmang sik jo!” anti.

⁴⁹ Khava kum a Thempu Kalen hongkachang arahming, Caiaphas inti inkhat khan, “Heituk a akamo chei mo!

⁵⁰ Jât pumpui inhmang kanek a, mipui sik a mi inkhat akathi sik hi akaṭha jôk kae ti hi manhret mak chei mo?” ati.

⁵¹ Ama’n hi ahri hi ama bing rachama ahri changmak. Khava kum a ama Thempu Kalen inkhat achangna dungjuia, Jehudi mihei sik a Jesu akathi sik kha asânsōt jôk kae.

⁵² Khana anmani sik rōk changloa, Pathen sahei seng inthek inchaia ka-om hei kha taksa pumkhat a ṭhōi manchuna sik um kae. 3

⁵³ Khava kania inphut Jesu thatna sik Jehudi hlamkakei he’n mantlukna anleinei jo.

⁵⁴ Khava jâra Judea ram a inphôngtak a Jesu lônngam mak jo, tâk nêrdiram hnenga khōpui inkhat arahming, “Ephraim,” inti hmun a khan asonlehei leh vaka-om jo hei.

⁵⁵ Jehudihei Rakan Kût sik hong kahnai jo, khana aram aram a mi katamtak Rakan Kût mak hma Jerusalema suk inthengna katlo sik a leikase hei.

⁵⁶ Anmani’n Jesu an-en lelea, Bek-inn shunga an-intûpna inkhat leh inkhat inder hei, “Heimo nanmandon? Tûn chunga Rakan Kût reveia hin ama akahongmak sik inchên jo mo, akahong sik mo?”

⁵⁷ Khana thempu kalenhei leh Pharisee he’n Jesu kha ansur theina sik tu achang inum Jesu omna hmun inhret mi khan anmani antamanthei nger sik hei kae tia ṭong anleipek hei.