JOEL 1 - LEKHARABU INTHENG (BSI)

¹ Pehuel sapa Joel hnenga Rōngpu ṭong kha hi kae.

Hmuchi Inhmang jâra Mipui Ṭajaisui

² Upahei, ṭong hi rangei ruh; Judah shunga aka-om rakip, rangei ruh. Hivahi nangnihei achangmak leh nanpahei khanga aleikasōk phung jo mo?

³ Hiva ṭong hi nansahei hneng hri ruh; anmani’n ansahei hneng anhri nôk sik, anmani’n abânna khanghei hneng anhri nôk sik.

⁴ Khaikhu rup he’n sânghei chunga inkhat bânna inkhat hongkachu hei; rup khat hei sâkbang kha rup khat he’n ansâksō.

⁵ Ju inrui nangni, thōi unna ṭap ruh; Ju ka-in nangni, ông ruh, juther syemna sik vomhrui inhmangsō jo.

⁶ Khaikhu rup in niram anhlōsō jo; anmani teitor lohêr hei kae khana ratha annei hêr; anha kha shabakkai ha kangei kapō kae.

⁷ Anmani’n eini vomhruibi anman hmangsō jo. nitheipông kung ansâksō jo. Thingkung hok kapha ankhoksō jo, abâk kabangsō leoa anda.

⁸ Nuhngâk inkhat in a-ompui sik rether kathia ṭajai asui kapōa, mipui nangni ṭap ruh.

⁹ Bek-inna tōk sik a, hmuchi leh ju om mak jo; thempu he’n Rōngpu hneng tōk sik annei mak jâra ṭajai ansui jo.

¹⁰ Hleichi hei kaching jo hei; ralei in ṭajai asui jo ajârchu hmuchi inhmangsō jo hei, vomhrui thei kachâr jo hei, khana olive thing invōisō jo hei.

¹¹ Hlei kathlōhei, inreng ruh; thei rahōn kathlō nangni ông ruh, ajârchu gehu, bunim hei kadik, kara rakip inhmangpet jo.

¹² Vomhrui leh theipōng kung kachâr jo hei; theikung rakip invōisō heia kathi jo hei. Mihei inpâkna katlangsō jo.

¹³ Maichâma ṭōnkatlo thempuhei, borapōn insi unna ṭap jo ruh! Bek-inna se unna jân kathang ṭajai sui ruh! Nan-Pathen hneng tōk sik a hmuchi leh ju om mak jo.

¹⁴ Bu anhngōina sik ṭong pek hei ruh; mipui intûpna sik bek ruh! Hlamkakeihei leh Judah mi rakip Rōngpu nan-Pathen Bek-inna mantûp hei ruh khana ahnenga ôn ruh.

¹⁵ Rōngpu kani kha kahnai jo; Akahratpen in inhmangna ahei rôn sōtna kha. Khava kani khan heituk ṭit ka-om mo ahei rôn sōt sik!

¹⁶ Kansapâr hei a’nhmang jâra atloje omloa kanlei en. Kan-Pathen Bek-inna inpâkna om mak jo.

¹⁷ Ralei kachâra hmuchi kathi jo hei. Sasōra manbuk sik sâng leh be om mak jo, khava jâra sasōrhei inhmangsō jo hei.

¹⁸ Ranhring kachâmtak a inhrâm hei, ajârchu anmani sik phidông om mak jo; kemōng rup he’m khōdeng anthei jo.

¹⁹ Rōngpu nahnenga kaṭap eng, ajârchu hmei in akângsō hei kapōa thingkung leh phihei kachârsō jo hei.

²⁰ Ram a shahei kapha’m nahnenga kaṭap jo hei ajârchu kava dunghei kachârsō joa kae.