JEREMIAH 52 - LEKHARABU INTHENG (BSI)

Jerusalem Atlûkna

¹ Zedekiah’n Judah reng achang pha ama kum 21 kae jo, ama’n Jerusalema kum 11 vai aleirôn. Ama kachoi anu rahming chu Libnah khōpuia ka-om Jeremiah sanu Hamutal intia kae.

² Rn Zedekiah’n, Jehoiakim taleitlo kapōa, Rōngpu dōina setna aleitlo.

³ Rōngpu’n Jerusalem leh Judah chunga ahnuk kana reia ahmit hmua inphut ahnong sōt heia kae. Zedekiah’n Babylon reng Nebuchadnezzar dōina re aleitlo,

⁴ khava jâra ama’n vai arônna kum 9 thla 10 ni 10 tluk ning Babylon rengpa Nebuchadnezzar in aremi ahei thōi heia Jerusalema re aleitlo. Anmani’n khōpui vângting rephōr ansyema, akekhumna rape akimvea anleisyem,

⁵ khana Zedekiah vairôn kum 11 katlunga khōpui kha kekhuma leika-om.

⁶ Khava kum shunga thla 4 kani 9 tluk ning khan vonṭâm kha akhôkrei jâra mihei kha sâk sik heite neimak jo hei,

⁷ khōpui bang kha anleivōk khōi jo. Babylon mihe’n khōpui kimvea ankaketlit inum, jâna khan remi rakip kasōksōt jo hei. Anmani kha reng rahōn jōnna hlam a katlânsōt hei, bangrape 2 kâk a kekot a kasōksōt hei, khana Jordan phaichamting katlân hei.

⁸ Tâk-kha Babylon remi he’n Reng Zedekiah kha anhnonga Jericho hnenga phaichama anleisur, aremi he’n anleidahlonpet jo.

⁹ Reng Zedekiah kha Hamath ram shunga Ribla khōpuia aleika-om Reng Nebuchadnezzar hneng anleiṭhōi, khana khan Reng Nebuchadnezzar in Zedekiah karâkna ṭong amathlâk a kae.

¹⁰ Ribla a Zedekiah sapahei kha ahmaikung tak a athatpek hei, khana Judah ṭōnpui karôn he’m aleithat hei.

¹¹ Khava sōa, Zedekiah hmit akhersōt pek, thirhruia akhit a Babylon ting aleikei. Zedekiah kha athimak kârseng Babylona kurkhum a leika-oma kae.

Bek-inn Vōkkhōina

¹² Babylon reng Nebuchadnezzar vairôn kum 19 thla 5 ni 10 tluk ning, remi hlamkakei, rengpa ṭong-insea inṭang Nebuzaradan kha Jerusalema kahlut jo.

¹³ Ama’n Bek-inn, reng-innpui, Jerusalema ṭōnpui karônhei inn aro mathlâk jo hei;

¹⁴ aremi he’n khōpui kurbanghei kha anvōkkhōi jo hei.

¹⁵ Khava sōa Nebuzaradan in khōpuia antadahlon mi, kut themna kanei ṭōn katlohei khana marûk a Babylon heia inphut ale’nthup hei seng kha Babylon ting aṭhōi jo hei.

¹⁶ Tâk-kha heite kaneimak, misarapen hei khachu Judah ram a adahlon hei, vomhrui rahōnna leh hleipuk heia ṭōn amantlo hei.

¹⁷ Bek-inna aka-om sum-êng kachohei, gârihei leh sum-êng tuikhur kha akhenga anvōkkhōi hei, khana sum-êng seng chu Babylona anchoipet hei.

¹⁸ Anmani’n maichâm mantheng sōtna hmangchâk-hei, ravut khōrna leh amadona hei, thaihmei thatna, thisen madona thlengkam, bero rona thlengkam, khana Bek-inna hmangchâk sum-êng seng chu akhenga anrônpet jo.

¹⁹ Sana leh dangka vânga ansyem neinâk rakip: thlengkam kasinhei, hmei choina khângbe, inthoina thisen madona thlengkamhei, ravut madona behei, thaihmei matungna hei, bero rona thlengkam, ju inthoina sunna sik thlengkamhei seng.

²⁰ Solomon in Bek-inn sik a aleisyemsōt sum-êng neinâk-hei - kachopui 2, gârihei, tuikhur kalentak, khava indom sehratche 12 – hihei hichu kahrik rei heia inte theimak hei.

^21-22 Kacho 2 hei kha ahlopdet hei kae: inkhat et kha metre 8 inshâng, apum kimve kha metre 5.3 kalen. Khahei kha ashung kave hei, a’nsâ kha millimetre 75 kae. Inkhat et chunga sum-êng lubur a-inshâng kha metre 2.2 kae, alubur kimvea thirhrui in ankake, khavakha kapothei vânga aret insyem, khahei seng kha’m sum-êng vânga ansyem hei kae.

²³ Kacho inkhat et a hrui inher kapō ret chunga khan kapothei akhenga 100 ka-om hei, raleia inphut 96 hei chu inhmu tor hei.

Judah Mihei Babylona Antaṭhōi hei

²⁴ Hiva chunga, rehlam kakeipa Nebuzaradan in Thempu Kalen Seraiah, ama bânna thempu Zephaniah, khana Bek-inn ṭōnkarôn ahlop 3 aṭhōisa hei.

²⁵ Khōpuia inphut remi rup-hei hlamkakei inkhat, khōpui shunga aleika-om ṭhak rengpa mansena kanei mi 7, rehlam kakeipa inthōpui, remihei lekharabu katintapa, khana apui karôn pase 60 hei aleiṭhōi hei.

²⁶ Nebuzaradan in anmani kha Hamath ramṭhen a Ribla khōpuia

²⁷ aka-om Babylon rengpa hneng aleiṭhōi hei. Khana khan rengpa’n amanvōk heia amanthat jo hei. Khang’khan Judah mihei kha anrama inphut rehringa ankei jo hei.

²⁸ Nebuchadnezzar in kurkhum sik a aṭhōi hei seng mija mazetna kha hi kae: areng changna kum 7 tlukna ama’n 3,023 aṭhōi hei;

²⁹ areng changna kum 18 tlukna Jerusalema inphut 832 aleiṭhōi hei;

³⁰ khana areng changna kum 23 tlukna Nebuzaradan in 745 aleiṭhōi hei. Ankhenga mi 4,600 anleiṭhōisōt heia kae.

³¹ Evilmerodach in Babylon reng achang kum a, ama’n Judah Reng Jehoiachin kha kurkhum a inphut aleimasōa alungsetna aleimalâr. Khavakha khum mi inkhat a Jehoiachin anṭhōisōtna kum 37 thla 12 kani 25 tlukna aleikasōk omchen kae.

³² Evilmerodach in ahnenga marittak a aleirazen khana Babylona ama leh rehring surmi akachangsap reng ralak-hei kanek a akalen chet kajana hmun a aleida.

³³ Hing’hin Jehoiachin in kurkhum a pōn leh der athlengsōtna sik khana ahringkhō katlung bit a rengpa dokhânga bu asâkna sik a hnōm pekna ka-om joa kae.

³⁴ Ahring lai seng arangei seng rachôkna sik a ani tina sêr le’npek ṭhak a kae.